Sin-bēng-kì 24

Sin-bēng-kì 24 - 現代台語譯本羅馬字版(TTVR)-闽南语

Lî-hun kap Chài-hun ê Tiâu-lē

1Nā ū lâng chhōa-bó͘ liáu-āu, chai bó͘ ū kiàn-siàu-sū, bô ài i, chiū thang siá lî-hun-su hō͘ i, kiò i lī-khui.

2I lī-khui hit-ê ke liáu-āu, thang kè pa̍t-lâng.

3Nā-sī i āu-lâi ê tiōng-hu bô ài i, koh siá lî-hun-su hō͘ i, kah i lī-khui; á-sī hit-ê tiōng-hu sí--khì,

4hit-ê í-chêng kah i lī-khui ê tiōng-hu bōe-ēng-tit tī i siū phah lâ-sâm liáu-āu, kiò i tńg--lâi, koh chhōa i choh-bó͘, in-ūi che sī Siōng Chú iàm-ò͘ⁿ--ê; m̄-thang tī Siōng Chú — lín ê Siōng-tè siúⁿ-sù lín chòe sán-gia̍p ê tōe hoān-chōe.

Kî-tha ê Tiâu-lē

5Tú chhōa-bó͘ ê lâng m̄-thang khì kau-chiàn, mā m̄-thang hō͘ i tam-jīm kong-bū; tio̍h hō͘ i tī ke-lāi chheng-êng chi̍t nî, hō͘ i ê bó͘ hoaⁿ-hí khoài-lo̍k.

6M̄-thang the̍h pa̍t-lâng ê chio̍h-bō, á-sī chio̍h-bō ê téng-tún chòe tí-ah; in-ūi che chiū-sī the̍h lâng ê sìⁿ-miā chòe tí-ah.

7Nā hoat-kiàn ū lâng kiap Í-sek-lia̍t tiong chi̍t ê tông-pau, kā i tòng-chòe lô͘-lē tùi-thāi, á-sī kā i bōe--khì, hit-ê kiap-lâng ê lâng tio̍h hō͘ sí; án-ni, chiū tùi lín tiong-kan tû-khì hit-ê siâ-ok ê sū.

8Tùi bâ-hong-pīⁿ, lín tio̍h te̍k-pia̍t sòe-jī; Lī-bī-lâng chòe chè-si--ê só͘ kà-sī lín, chiū-sī góa só͘ bēng-lēng lín--ê, tio̍h chhiat-si̍t chun-hêng.

9Tio̍h ōe-kì--tit, lín chá-chêng chhut Ai-ki̍p ê sî, Siōng Chú — lín ê Siōng-tè tī lō͘--ni̍h án-chóaⁿ tùi-thāi Bí-lī-an.

10Lín bô-lūn ū sím-mi̍h mi̍h-kiāⁿ chioh chhù-piⁿ, m̄-thang ji̍p-khì in tau the̍h mi̍h-kiāⁿ tí-ah;

11tio̍h khiā tī gōa-bīn, thèng-hāu kā lín chioh ê lâng the̍h tí-ah ê mi̍h-kiāⁿ chhut-lâi hō͘ lín.

12Hit-ê lâng nā sàn-chhiah, lín m̄-thang the̍h i ê gōa-saⁿ chòe tí-ah tau kè-mî;

13ji̍t lo̍h ê sî, it-tēng tio̍h chiong hit-ê tí-ah ê mi̍h-kiāⁿ hêng i, hō͘ i thang ēng i ê gōa-saⁿ kah-teh khùn; i ōe kā lín chiok-hok, Siōng Chú — lín ê Siōng-tè mā ōe khòaⁿ chit-hāng sū chòe lín ê hó tek-hēng.

14Khùn-khó͘ sàn-chhiah ê kang-lâng, bô-lūn sī lín ê tông-pau, á-sī tòa tī lín siâⁿ-lāi ê gōa-cho̍k-lâng, lín m̄-thang kā in khi-hū.

15In ê kang-chîⁿ, ji̍t lo̍h í-chêng tio̍h hō͘ in, in-ūi in sàn-chhiah, khò hit-ê chîⁿ teh tō͘-oa̍h; chiah bián in in-ūi lín ê só͘-chòe kā Siōng Chú tâu, lín chiū ū chōe.

16M̄-thang in-ūi kiáⁿ-jî ê só͘-chòe kā lāu-pē chhú-sí, mā m̄-thang in-ūi lāu-pē ê só͘-chòe kā kiáⁿ-jî chhú-sí; ta̍k-ê lâng tio̍h in-ūi ka-kī ê chōe sí.

17Lín sím-phòaⁿ, m̄-thang oan-óng gōa-cho̍k-lâng kap ko͘-jî, mā m̄-thang the̍h kóaⁿ-hū ê gōa-saⁿ chòe tí-ah.

18Tio̍h ōe-kì-tit lín bat tī Ai-ki̍p chòe lô͘-châi, Siōng Chú — lín ê Siōng-tè ū kā lín tùi hia kiù--chhut-lâi; só͘-í góa bēng-lēng lín tio̍h án-ni chòe.

19Lín tī hn̂g--ni̍h siu ngó͘-kok, nā ū chi̍t khún bōe-kì--tit, iáu pàng tī hn̂g--ni̍h, m̄-thang oat tńg-khì the̍h, tio̍h lâu hō͘ gōa-cho̍k-lâng kap ko͘-jî kóaⁿ-hū; án-ni, Siōng Chú — lín ê Siōng-tè ōe tī lín só͘ chòe it-chhè ê sū, sù-hok lín.

20Lín phah lín ê kaⁿ-ná-chhiū liáu-āu, m̄-thang koh sûn hiah-ê chhiū-ki; tio̍h lâu hō͘ gōa-cho̍k-lâng kap ko͘-jî kóaⁿ-hū.

21Lín bán phû-tô liáu-āu, chhun--ê m̄-thang koh bán; tio̍h lâu hō͘ gōa-cho̍k-lâng kap ko͘-jî kóaⁿ-hū.

22Tio̍h ōe-kì-tit lín bat tī Ai-ki̍p chòe lô͘-châi, só͘-í góa bēng-lēng lín tio̍h án-ni chòe.

Sin-bēng-kì 24 - 現代台語譯本羅馬字版(TTVR)-闽南语

Learn More About Us