Chhòng-sè-kì 41

Chhòng-sè-kì 41 - 現代台語譯本羅馬字版(TTVR)-闽南语

Iok-sek kā Ông Kái-bāng

1Nn̄g nî āu, Ai-ki̍p-ông choh-bāng. I bāng-kìⁿ i khiā tī Nî-lô hô-piⁿ,

2khòaⁿ-tio̍h chhit chiah pûi koh súi ê gû-bú tùi hô--ni̍h khí--lâi, tī lô͘-tek-á lāi teh chia̍h-chháu.

3Tè-āu, ū chhit chiah sán koh pháiⁿ-khòaⁿ ê gû-bú tùi hô--ni̍h khí--lâi; kap thâu-chêng hiah-ê gû-bú chòe-hé khiā tī hô-piⁿ.

4Chiah-ê sán koh pháiⁿ-khòaⁿ ê gû-bú kā hit chhit chiah pûi koh súi ê gû-bú chia̍h-liáu-liáu. Ai-ki̍p-ông chiū chhíⁿ--khí-lâi.

5I koh khùn, koh bîn-bāng, bāng-tio̍h chi̍t châng be̍h-á chhut chhit sūi pá-chúi koh hó-khòaⁿ ê be̍h-sūi.

6Āu-lâi, i koh khòaⁿ-tio̍h hit-châng be̍h-á chhut chhit sūi be̍h-sūi, phàⁿ-phàⁿ koh hō͘ tang-hong chhe kah chhàu-ta.

7Chiah-ê phàⁿ ê be̍h-sūi kā hit chhit sūi pá-chúi koh hó-khòaⁿ ê be̍h-sūi thun--lo̍h-khì. Ai-ki̍p-ông chhíⁿ--khí-lâi, chiah chai sī bîn-bāng.

8Kàu thiⁿ-kng, Ai-ki̍p-ông sim-lāi chhau-hoân put-an, chiū phài lâng tiàu Ai-ki̍p só͘-ū ê su̍t-sū kap ū tì-hūi ê lâng lâi. Ông chiū chiong i ê bāng kā in kóng; m̄-kú in bô hoat-tō͘ kā ông kái-bāng.

9Hit-sî chiú-chèng-tiúⁿ tùi Ai-ki̍p-ông kóng, “Góa kin-á-ji̍t chiah siūⁿ-tio̍h góa ū sit-chhò.

10Khah-chá, ông tùi lí ê po̍k-jîn hoat siū-khì, chiong góa kap tû-pâng-tiúⁿ koaiⁿ tī sī-ōe-tiúⁿ hú-lāi ê kaⁿ-lô.

11Goán nn̄g ê kâng chi̍t mî choh-bāng, ū bô siâng-khoán ê ì-sù.

12Ū chi̍t ê Hi-pek-lâi ê siàu-liân-lâng chiū-sī sī-ōe-tiúⁿ ê lô͘-lē, kap goán koaiⁿ chòe-hé; goán kā i kóng goán ê bāng, i chiū kā goán kái-bāng.

13Āu-lâi goán nn̄g ê lâng ê kiat-kó, lóng chiàu i só͘ kā goán kóe-seh--ê, ông kā góa ho̍k-chit, tû-pâng-tiúⁿ siū tiàu--sí.”

14 Ai-ki̍p-ông phài lâng khì tiàu Iok-sek lâi, in chiū kóaⁿ-kín tòa i chhut-kaⁿ. Iok-sek chiū chián thâu-mn̂g siu-bīn, ōaⁿ-saⁿ, lâi kìⁿ Ai-ki̍p-ông.

15Ai-ki̍p-ông kā Iok-sek kóng, “Góa bāng-tio̍h chi̍t ê bāng, bô lâng ōe-tàng kā góa kóe-seh. Ū lâng kā góa kóng, lí thiaⁿ-tio̍h bāng chiū ōe kái-bāng.”

16 Iok-sek ìn kóng, “Che m̄-sī chāi-tī góa, sī Siōng-tè beh chiong pêng-an hok-khì ê lō͘ chí-sī Ai-ki̍p-ông.”

17 Ai-ki̍p-ông kā Iok-sek kóng, “Góa bāng-tio̍h góa khiā tī Nî-lô hô-piⁿ,

18ū chhit chiah pûi koh súi ê gû-bú tùi hô--ni̍h khí--lâi, tī lô͘-tek-á lāi teh chia̍h-chháu.

19Tè-āu, ū chhit chiah sán koh pháiⁿ-khòaⁿ ê gû-bú khí--lâi; tī Ai-ki̍p-tōe, góa iáu m̄-bat khòaⁿ-tio̍h chiah-ni̍h bái ê gû.

20Chiah-ê sán koh pháiⁿ-khòaⁿ ê gû-bú kā hit chhit chiah pûi ê gû-bú chia̍h-liáu-liáu;

21thun-lo̍h pak liáu-āu, hit chhit chiah sán koh pháiⁿ-khòaⁿ ê gû-bú, khòaⁿ bōe chhut ū sím-mi̍h koh-iūⁿ, iû-goân hiah-ni̍h sán koh pháiⁿ-khòaⁿ; góa chiū chhíⁿ--khí-lâi.

22Góa koh bāng-tio̍h chi̍t châng be̍h-á, chhut chhit sūi pá-chúi koh hó-khòaⁿ ê be̍h-sūi.

23Āu-lâi, hit-châng be̍h-á koh chhut chhit sūi be̍h-sūi, phàⁿ-phàⁿ koh hō͘ tang-hong chhe kah chhàu-ta.

24Chiah-ê phàⁿ ê be̍h-sūi kā hit chhit sūi hó ê be̍h-sūi thun--lo̍h-khì. Góa chiong chiah-ê bāng kóng hō͘ su̍t-sū thiaⁿ, m̄-kú in bô hoat-tō͘ kā góa kóe-seh.”

25 Iok-sek tùi Ai-ki̍p-ông kóng, “Ông ê bāng kî-si̍t sī chi̍t ê; Siōng-tè chiong I beh chòe ê sū chí-sī ông.

26Chhit chiah súi ê gû-bú kap chhit sūi hó ê be̍h-sūi sī chí chhit nî; chit nn̄g ê bāng sī kâng chi̍t ê ì-sù.

27Hiah-ê tè-āu khí--lâi ê chhit chiah sán koh pháiⁿ-khòaⁿ ê gû-bú, kap chhit sūi phàⁿ koh hō͘ tang-hong chhe chhàu-ta ê be̍h-sūi, mā-sī chí chhit nî, tāi-piáu chhit nî ê ki-hng.

28Che sī góa tùi ông só͘ kóng--ê: Siōng-tè chiong I beh chòe ê sū, tùi ông hián-sī.

29Ai-ki̍p choân-tōe ōe ū chhit nî hó nî-tang;

30āu-lâi ōe ū chhit nî pháiⁿ nî-tang, sīm-chì Ai-ki̍p choân-kok lóng bōe-kì-tit í-chêng ê hong-siu, choân-tōe ōe hō͘ ki-hng húi-hoāi;

31in-ūi āu-lâi ê ki-hng chin siong-tiōng, soah bōe-kì-tit í-chêng bat ū hong-siu.

32Ông nn̄g piàn ê bîn-bāng, sī Siōng-tè teh chí-sī I koat-tēng beh chòe, koh chin kín beh oân-sêng ê sū.

33“Só͘-í ông tio̍h kéng chi̍t ê chhong-bêng koh ū tì-hūi ê lâng, phài i koán-lí Ai-ki̍p choân-kok.

34Ông koh tio̍h phài koaⁿ-oân koán-lí choân-kok; tī chhit nî hó nî-tang, Ai-ki̍p choân-tōe ê siu-sêng tio̍h gō͘ hūn thiu chi̍t hūn.

35Chhiáⁿ ông bēng-lēng in siu-chi̍p hó nî-tang siu-sêng ê ngó͘-kok, chek-chū tī chhek-chhng, phài lâng koán-lí, thang chòe ta̍k-ê siâⁿ ê niû-si̍t.

36Chek-chū--khí-lâi ê niû-si̍t, thang chòe Ai-ki̍p choân-tōe chiong-lâi chhit nî ki-hng ê lō͘-ēng, chiah bián chit-ê kok-ka in-ūi ki-hng bia̍t-bông.”

Iok-sek Hōng-bēng Tī-lí Ai-ki̍p

37 Ai-ki̍p-ông kap i só͘-ū ê jîn-sîn lóng chàn-sêng chit-ê kè-ōe.

38Ai-ki̍p-ông tùi i ê jîn-sîn kóng, “Lán kiám ōe-tàng chhē-tio̍h chi̍t ê lâng, chhin-chhiūⁿ chit-ê lâng ū Siōng-tè ê sîn tī i ê lāi-bīn?”

39Ai-ki̍p-ông tùi Iok-sek kóng, “Siōng-tè í-keng chiong chit-ê tāi-chì lóng chí-sī lí, khó-kiàn bô lâng chhin-chhiūⁿ lí chiah-ni̍h chhong-bêng ū tì-hūi.

40Lí thang koán-lí góa ê tiâu-têng; góa ê jîn-bîn lóng tio̍h ho̍k-chiông lí, hō͘ lí koán-lí; chí-ū chē tī ông-ūi ê góa pí lí khah tōa.”

41Ai-ki̍p-ông koh kā Iok-sek kóng, “Góa phài lí koán-lí Ai-ki̍p choân-tōe.”

42Ai-ki̍p-ông chiū chiong i chòe ìn-kàm ê chhiú-chí pak--khí-lâi, kòa tī Iok-sek ê chńg-thâu-á; kā i chhēng iù-môa-pò͘ ê saⁿ, chiong kim phoa̍h-liān kòa tī i ê ām-kún.

43Ông koh hō͘ Iok-sek chē tiâu-têng ê tē-jī hō chhia; khui-tō--ê kiò kóng, “Siám-khui!” Án-ni, Ai-ki̍p-ông phài Iok-sek koán-lí Ai-ki̍p choân-tōe.

44Ai-ki̍p-ông tùi Iok-sek kóng, “Góa sī ông, nā bô lí ún-chún, tī Ai-ki̍p choân-tōe, put-chún lâng sûi-piān pān tāi-chì.”

45Ai-ki̍p-ông kā Iok-sek hō-miâ kiò-chòe Sat-hoat-ná-te̍k Pa-lōe-a, koh chiong Hi-lī-pho-lí-siâⁿ ê chè-si Pho-thê Hui-la ê cha-bó͘-kiáⁿ A-se-la̍p hō͘ i choh-bó͘. Iok-sek chiū tī Ai-ki̍p-tōe chhut-sûn.

46 Iok-sek khai-sí ho̍k-sāi Ai-ki̍p-ông ê sî saⁿ-cha̍p hè. I lī-khui Ai-ki̍p-ông, khì Ai-ki̍p choân-tōe sûn-sī.

47Chhit ê hó nî-tang, tōe ê chhut-sán tōa hong-siu.

48Iok-sek siu-chi̍p Ai-ki̍p-tōe chhit ê hó nî-tang só͘-ū ê ngó͘-kok, chek-chū tī ta̍k-ê siâⁿ; ta̍k-ê siâⁿ chiu-ûi chhân-tōe ê niû-si̍t, lóng chek-chū tī hù-kūn ê siâⁿ-lāi.

49Iok-sek chek-chū ngó͘-kok, chōe kah chhin-chhiūⁿ hái-piⁿ ê soa, bô hoat-tō͘ sǹg, in-ūi sǹg bōe liáu.

50Pháiⁿ nî-tang iáu-bē kàu í-chêng, Hi-lī-pho-lí-siâⁿ ê chè-si Pho-thê Hui-la ê cha-bó͘-kiáⁿ A-se-la̍p kā Iok-sek siⁿ nn̄g ê kiáⁿ.

51Iok-sek kā tōa-kiáⁿ hō-miâ kiò-chòe Má-ná-se; i kóng, “Siōng-tè hō͘ góa bōe-kì-tit góa só͘-ū ê khùn-khó͘, kap su-liām góa ê lāu-pē choân-ke ê khó͘-chêng.”

52I kā tē-jī ê kiáⁿ hō-miâ kiò-chòe Í-hoat-liân; i kóng, “Siōng-tè hō͘ góa tī góa siū-khó͘ ê só͘-chāi heng-ōng.”

53 Ai-ki̍p-tōe chhit nî hó nî-tang chi̍t-ē kè--khì,

54chhit nî ki-hng chiū lâi, tú-tú chiàu Iok-sek só͘ kóng--ê; ta̍k-kok lóng ū ki-hng, kan-ta Ai-ki̍p choân-tōe ū bí-niû.

55Kàu Ai-ki̍p choân-tōe niû-si̍t bô-kàu ê sî, jîn-bîn lâi tùi ông ai-kiû bí-niû; ông tùi Ai-ki̍p ê jîn-bîn kóng, “Lín khì chhē Iok-sek, i kā lín kóng sím-mi̍h, lín lóng chiàu án-ni khì chòe.”

56Hit-sî ta̍k-kok lóng ū ki-hng, Ai-ki̍p-tōe mā chin siong-tiōng; Iok-sek khui ta̍k só͘-chāi ê chhek-chhng, bōe bí-niû hō͘ Ai-ki̍p-lâng.

57Ta̍k-kok ki-hng chin giâm-tiōng, ta̍k só͘-chāi ê lâng lóng khì Ai-ki̍p, khì Iok-sek hia bóe bí-niû.

Chhòng-sè-kì 41 - 現代台語譯本羅馬字版(TTVR)-闽南语

Learn More About Us