Bí-ka-su 4

Bí-ka-su 4 - 現代台語譯本羅馬字版(TTVR)-闽南语

Éng-oán ê Hô-pêng(Sài 2.2-4)

1Tī chiong-lâi ê ji̍t-chí,

Siōng Chú sèng-tiān ê soaⁿ ōe kian-li̍p tī chèng-soaⁿ ê téng-bīn,

pí lóng-chóng ê soaⁿ-niá khah koân;

bān-bîn lóng ōe ek óa-lâi kui I.

2Bān-kok ōe lâi, kóng,

“Lán lâi chiūⁿ Siōng Chú ê soaⁿ,

lâi-khì Ngá-kok ê Siōng-tè ê tiān.

I ōe ēng I ê tō-lō͘ kà-sī lán,

hō͘ lán thang kiâⁿ I ê lō͘.”

Lu̍t-hoat ōe tùi Sek-an hoat-chhut;

Siōng Chú ê ōe ōe tùi Iâ-lō͘-sat-léng thoân-khui.

3I ōe tī bān-bîn tiong si-hêng sím-phòaⁿ,

ūi hn̄g-hn̄g ê kiông-kok pâi-kái hun-cheng;

in ōe chiong to phah-chòe lôe-thâu,

chiong chhiuⁿ phah-chòe liâm-to;

chit-kok bōe koh gia̍h to kong-kek hit-kok,

mā bián koh o̍h chiàn-cheng.

4Ta̍k-ê lâng lóng chē tī ka-kī ê phû-tô-chhiū kha kap bû-hoa-kó-chhiū kha,

bô lâng ōe kā in phah-chhiⁿ-kiaⁿ;

che sī Siōng Chú — Bān-kun ê Thóng-sòe chhin-chhùi kóng--ê.

5Sui-jiân bān-bîn lóng khò ka-kī sîn-bêng ê miâ seng-oa̍h,

m̄-kú goán beh hōng Siōng Chú — goán ê Siōng-tè ê miâ kiâⁿ-ta̍h, ti̍t-kàu éng-éng-oán-oán.

Í-sek-lia̍t-lâng Kui-hôe Pún-kok

6Siōng Chú kóng,

“Tī hit-ji̍t, góa beh chū-chi̍p kha-pái--ê,

chio-chi̍p siū hòng-tio̍k--ê,

kap góa bat hō͘ in siū-khó͘--ê.

7Góa beh hō͘ kha-pái--ê chiâⁿ-chòe só͘ chhun ê chú-bîn,

hō͘ siū hòng-tio̍k--ê chiâⁿ-chòe kiông-kok.

Siōng Chú beh tī Sek-an-soaⁿ choh-ông tī-lí in,

tùi chit-sî kàu éng-oán.”

8 Iâ-lō͘-sat-léng ah, Sek-an-siâⁿ ê pó-lúi ah,

lí chòe iûⁿ-kûn ê siú-bōng-tâi,

chá-chêng ê chú-koân beh koh kui hō͘ lí,

ông-koân beh hôe-ho̍k hō͘ lí.

9Lí sī-án-chóaⁿ teh tōa-siaⁿ ai-khàu?

Sī in-ūi lí bô ông, tāi-sîn sí-liáu-liáu,

lí chiah chhin-chhiūⁿ sán-hū chhui-chūn thòng-khó͘ sī--bô?

10 Sek-an ê chú-bîn ah, lí ōe chhin-chhiūⁿ sán-hū chhui-chūn thòng-khó͘,

in-ūi lí ōe lī-khui chit-ê siâⁿ khì tòa tī iá-gōa, khì kàu Pa-pí-lûn,

m̄-kú lí ōe tī hia tit-tio̍h kái-kiù.

Siōng Chú beh tùi tùi-te̍k ê chhiú-tiong kā lí sio̍k-hôe.

11Hiān-chāi chin chōe kok-ka í-keng liân-ha̍p khí-lâi beh kong-kek lí.

In kóng: Tio̍h hō͘ Sek-an siū lêng-jio̍k,

lán thang chhin-ba̍k khòaⁿ--tio̍h.

12M̄-kú in m̄ chai Siōng Chú ê sim-ì,

bô bêng-pe̍k I ê kè-ōe;

I í-keng kā in chū-chi̍p--khí-lâi,

chhin-chhiūⁿ siu-chi̍p be̍h-khún tī ngó͘-kok-tiûⁿ.

13Siōng Chú kóng: Sek-an ê chú-bîn ah, khí-lâi lún ngó͘-kok.

Góa beh hō͘ lí thih ê kak, tâng ê kha-tôe, thang phah-chhùi lia̍t-kok,

chiong in só͘ chhiúⁿ ê mi̍h the̍h-lâi hiàn hō͘ góa,

chiong in ê châi-bu̍t hiàn hō͘ phó͘-thiⁿ-ē ê Chú.

Bí-ka-su 4 - 現代台語譯本羅馬字版(TTVR)-闽南语

Learn More About Us