Lia̍t-ông-kì Hā-koàn 3

Lia̍t-ông-kì Hā-koàn 3 - 現代台語譯本羅馬字版(TTVR)-闽南语

Í-sek-lia̍t kap Mô͘-ap Kau-chiàn

1 Iû-tāi-ông Iok-sa-hoat cha̍p-poeh nî, A-hap ê kiáⁿ Iok-hô-lân tī Sat-má-lī-a chòe Í-sek-lia̍t-ông cha̍p-jī nî.

2I chòe Siōng Chú khòaⁿ-chòe pháiⁿ ê sū, m̄-kú bô chhin-chhiūⁿ i ê pē-bú só͘ chòe--ê hiah-ni̍h pháiⁿ, in-ūi i ū chiong i ê lāu-pē só͘ chō Pa-le̍k ê thiāu-siōng tû--khì.

3Iáu-kú i kap Nî-pat ê kiáⁿ Iâ-lô-pho-an kâng-khoán, hō͘ Í-sek-lia̍t-lâng hām-lo̍h chōe, lóng bô thêng-chí.

4 Mô͘-ap-ông Bí-sa chhī chin chōe iûⁿ, bat ēng cha̍p-bān chiah iûⁿ-á, cha̍p-bān chiah mî-iûⁿ-káng ê mn̂g, ǹg Í-sek-lia̍t-ông chìn-kòng.

5A-hap sí liáu-āu, Mô͘-ap-ông pōe-poān Í-sek-lia̍t-ông.

6Hit-sî Iok-hô-lân-ông tùi Sat-má-lī-a chhut-hoat, tiàu-chi̍p Í-sek-lia̍t kun-peng.

7Siâng-sî, i mā phài lâng khì kìⁿ Iû-tāi-ông Iok-sa-hoat, kóng, “Mô͘-ap-ông pōe-poān góa, lí kiám beh kap góa chòe-hé khì kong-táⁿ Mô͘-ap?”

Iok-sa-hoat kóng, “Góa goān-ì kap lí chòe-hé khì; góa ê chiū-sī lí ê, góa ê jîn-bîn chiū-sī lí ê jîn-bîn, góa ê bé chiū-sī lí ê bé.

8Taⁿ lán beh tùi tó chi̍t tiâu lō͘ khì kong-táⁿ?”

Iok-hô-lân kóng, “Tùi Í-tong khòng-iá ê lō͘.”

9 Í-sek-lia̍t-ông kap Iû-tāi-ông, í-ki̍p Í-tong-ông chòe-hé chhut-hoat; in se̍h chi̍t-tōa-lìn kiâⁿ chhit ji̍t ê lō͘-chām, kun-tūi kap tè in ê cheng-siⁿ bô chúi thang lim.

10Í-sek-lia̍t-ông kóng, “Chhám ah, Siōng Chú chū-chi̍p lán saⁿ ê ông, goân-lâi sī beh chiong lán kau tī Mô͘-ap-lâng ê chhiú.”

11 Iok-sa-hoat kóng, “Chia kiám bô Siōng Chú ê sian-ti hō͘ lán thang chhéng-būn Siōng Chú?”

Í-sek-lia̍t-ông chi̍t ê jîn-sîn ìn kóng, “Í-chêng teh ho̍k-sāi Í-lī-a

, Sa-hoat ê kiáⁿ Í-lī-sa tī chia.”

12 Iok-sa-hoat kóng, “I it-tēng ū Siōng Chú ê ōe.” Í-sek-lia̍t-ông, Iok-sa-hoat, kap Í-tong-ông chiū lo̍h-khì kìⁿ i.

13 Í-lī-sa tùi Í-sek-lia̍t-ông kóng, “Góa kap lí ū sím-mi̍h koan-hē? Lí khì chhē lín lāu-pē lāu-bú ê sian-ti.”

Í-sek-lia̍t-ông kā i kóng, “Mài án-ni kóng. Siōng Chú chū-chi̍p goán saⁿ ê ông, sī beh chiong goán kau tī Mô͘-ap-lâng ê chhiú sī--bô?”

14 Í-lī-sa kóng, “Góa kí góa só͘ sū-hōng Éng-oa̍h ê Siōng Chú — Bān-kun ê Thóng-sòe chiù-chōa, góa nā m̄-sī chun-tiōng Iû-tāi-ông Iok-sa-hoat, chiū m̄ kìⁿ lí, m̄ chhap lí.

15Taⁿ tio̍h kā góa kiò chi̍t ê khîm-su lâi chia.”

Khîm-su tôaⁿ ê sî, Siōng Chú ê khùi-la̍t lîm-kàu Í-lī-sa.

16I chiū kóng, “Siōng Chú án-ni kóng, ‘Lín tio̍h tī chit-ê soaⁿ-kok ta̍k só͘-chāi ó͘ kau.

17In-ūi Siōng Chú án-ni kóng, sui-jiân lín bô khòaⁿ-kìⁿ hong, bô khòaⁿ-kìⁿ hō͘; iáu-kú chit-ê soaⁿ-kok beh ū chúi móa-móa, thang hō͘ lín kap lín ê gû iûⁿ cheng-siⁿ lim.’

18Chit-ê sū tùi Siōng Chú lâi kóng iáu-sī sió-sū; I beh koh chiong Mô͘-ap-lâng kau tī lín ê chhiú.

19Lín beh kong-phòa in ta̍k-ê kian-kò͘ ê siâⁿ kap súi ê siâⁿ, chhò ta̍k-châng hó ê ké-chí-chhiū, that-tiâu lóng-chóng ê chúi-chôaⁿ, ēng chio̍h-thâu húi-hoāi só͘-ū hó ê chhân-hn̂g.”

20Keh-chá-khí hiàn-chè ê sî, hut-jiân ū chúi tùi Í-tong lâu--lâi, ta̍k só͘-chāi ū chúi móa-móa.

Mô͘-ap-lâng Chiàn-pāi

21 Mô͘-ap-lâng thiaⁿ-tio̍h chit saⁿ ê ông chiūⁿ--lâi, beh kap in kau-chiàn, só͘-ū ōe-tàng gia̍h bú-khì--ê, tùi lāu kàu siàu-liân, lóng lâi pian-kài hông-siú.

22Keh-chá-khí in chá-chá khí--lâi, ji̍t-thâu chiò tī chúi-bīn, in tùi hn̄g-hn̄g khòaⁿ, chúi âng chhin-chhiūⁿ huih.

23Mô͘-ap-lâng chiū kóng, “Kui-ê lóng sī huih! Hiah-ê ông hō͘-siōng kong-kek, it-tēng lóng sí ah. Mô͘-ap-lâng ah, lán tio̍h lâi-khì chhiúⁿ chiàn-lī-phín.”

24 Mô͘-ap-lâng lâi kàu Í-sek-lia̍t ê kun-iâⁿ, Í-sek-lia̍t-lâng khí-lâi kong-kek in, in chiū tô-cháu. Í-sek-lia̍t-lâng tui-sat in,

25húi-hoāi in ê siâⁿ; ēng chio̍h-thâu thūn-móa só͘-ū hó ê chhân-hn̂g, that-tiâu lóng-chóng ê chúi-chôaⁿ, koh chhò in ta̍k-châng hó ê ké-chí-chhiū; chí-ū chhun Kiat-ní Hap-lia̍t-siat ê chio̍h-chhiûⁿ; hìⁿ-chio̍h ê peng sì-ûi kong-kek chit-ê siâⁿ.

26 Mô͘-ap-ông khòaⁿ-tio̍h kau-chiàn tùi i put-lī, chiū tòa chhit-pah ê gia̍h-to ê peng beh chhiong-chhut pau-ûi, khì Sū-lī-a-ông hia, m̄-kú bô hoat-tō͘.

27I chiū chiong beh sòa-chiap i choh-ông ê tōa-kiáⁿ, tī siâⁿ-téng hiàn chòe sio-hòa-chè; ū tōa siū-khì lîm-kàu Í-sek-lia̍t. Hit saⁿ ê ông chiū lī-khui Mô͘-ap, tò-khì in pún-kok.

Lia̍t-ông-kì Hā-koàn 3 - 現代台語譯本羅馬字版(TTVR)-闽南语

Learn More About Us