Sat-bó-ní-kì Siōng-koàn 26

Sat-bó-ní-kì Siōng-koàn 26 - 現代台語譯本羅馬字版(TTVR)-闽南语

Tāi-pi̍t koh Chi̍t Piàn Bô Thâi Sò-lô

1 Se-hut-lâng koh khì Ki-pí-a kā Sò-lô pò-kò, kóng Tāi-pi̍t bih tī Iok-su-bûn tang-pêng ê Hap-ki-la-soaⁿ.

2Sò-lô chiū khí--lâi, chhōa Í-sek-lia̍t tiong te̍k-soán ê peng saⁿ-chheng, lo̍h-khì Se-hut ê khòng-iá beh chhē Tāi-pi̍t.

3Sò-lô tī Iok-su-bûn tang-pêng ê Hap-ki-la-soaⁿ lō͘-piⁿ chat-iâⁿ. Tāi-pi̍t tiàm tī khòng-iá, thiaⁿ-tio̍h Sò-lô lâi khòng-iá beh tui-jip i,

4chiū chhe kúi-nā ê cheng-thàm khì thàm, chiah chai Sò-lô chin-chiàⁿ lâi lah.

5Tāi-pi̍t chiū chhut-hoat, khì Sò-lô chat-iâⁿ ê só͘-chāi, khòaⁿ-tio̍h Sò-lô kap Nî-ní ê kiáⁿ goân-sòe Ap-nî-ní khùn ê só͘-chāi, Sò-lô khùn tī kun-iâⁿ ê tiong-ng, pō͘-tūi tī i ê chiu-ûi chat-iâⁿ.

6 Tāi-pi̍t tùi Hek-lâng A-hi-bí-le̍k kap Sé-lō͘-ngá ê kiáⁿ, Iok-ap ê hiaⁿ-tī A-pí-su, kóng, “Siáⁿ-lâng beh kap góa lo̍h-khì Sò-lô ê iâⁿ-lāi?”

A-pí-su kóng, “Góa kap lí lo̍h--khì.”

7 Tāi-pi̍t kap A-pí-su thàu-mî kàu pō͘-tūi hia, khòaⁿ-tio̍h Sò-lô tī kun-iâⁿ ê tiong-ng teh khùn; i ê chhiuⁿ tī thâu-khak piⁿ, chhah tī thô͘-kha; Ap-nî-ní kap kun-peng khùn tī i ê chiu-ûi.

8A-pí-su tùi Tāi-pi̍t kóng, “Kin-á-ji̍t Siōng-tè chiong lí ê tùi-te̍k kau tī lí ê chhiú. Chhiáⁿ chún góa ēng chhiuⁿ kā i chha̍k thàng--kè, tèng tī thô͘-kha; chi̍t ē chiū hó, bián chha̍k nn̄g ē.”

9 Tāi-pi̍t kā A-pí-su kóng, “M̄-thang kā i thâi-sí! Siáⁿ-lâng siong-hāi Siōng Chú só͘ soán-li̍p ê ông koh ōe-tàng bô chōe?”

10Tāi-pi̍t koh kóng, “Góa kí éng-oa̍h ê Siōng Chú chiù-chōa, Siōng Chú ōe kā i phah-sí, nā m̄-sī sí-kî kàu sí--khì, chiū-sī tī chiàn-tiûⁿ chiàn-sí.

11Góa choa̍t-tùi m̄-káⁿ hē-chhiú phah Siōng Chú soán-li̍p ê ông; kan-ta the̍h i thâu-khak piⁿ ê chhiuⁿ kap chúi-pân, lán chiū cháu.”

12Tāi-pi̍t chiū khì the̍h Sò-lô thâu-khak piⁿ ê chhiuⁿ kap chúi-pân. Nn̄g lâng lī-khui, bô lâng khòaⁿ--tio̍h, bô lâng chai, mā bô lâng chhíⁿ; in lóng teh khùn, in-ūi Siōng Chú hō͘ in khùn tāng-bîn.

13Āu-lâi, Tāi-pi̍t kè-khì lēng-gōa hit-pêng, khiā tī soaⁿ-téng, kap in saⁿ-lī put-chí hn̄g.

14Tāi-pi̍t tùi kun-tūi kap Nî-ní ê kiáⁿ Ap-nî-ní hoah kóng, “Ap-nî-ní ah, lí ū thiaⁿ--tio̍h-bô, lí ná m̄ ìn?”

Ap-nî-ní kóng, “Lí sī siáⁿ-lâng, káⁿ kā ông chhá-chhíⁿ?”

15 Tāi-pi̍t tùi Ap-nî-ní kóng, “Lí kiám m̄-sī Í-sek-lia̍t tiong siōng-kiông ê ióng-sū? Sī-án-chóaⁿ lí bô pó-hō͘ lí ê chú lí ê ông? Tú-chiah ū chi̍t ê peng-á ji̍p-khì beh hāi lí ê ông lí ê chú.

16Lí bô chīn chek-jīm. Góa kí éng-oa̍h ê Siōng Chú chiù-chōa, lín lóng kai-sí, in-ūi bô pó-hō͘ lín ê chú, chiū-sī Siōng Chú só͘ soán-li̍p ê ông. Lí khòaⁿ-bāi leh, ông thâu-khak piⁿ ê chhiuⁿ kap chúi-pân tī tó-ūi?”

17 Sò-lô jīn-chhut sī Tāi-pi̍t ê siaⁿ, chiū kóng, “Góa ê kiáⁿ Tāi-pi̍t, sī lí o͘h?”

Tāi-pi̍t kóng, “Ông, góa ê chú ah, sī góa!”

18I koh kóng, “Góa ê chú sī-án-chóaⁿ teh tui-jip lí ê lô͘-po̍k? Góa ū chòe sím-mi̍h? Góa ū chòe sím-mi̍h pháiⁿ?

19Ông, góa ê chú ah, kiû lí thiaⁿ lô͘-po̍k ê ōe. Nā-sī Siōng Chú kek-tōng lí kong-kek góa, goān I hoaⁿ-hí chiap-siū góa hiàn ê chè. Nā-sī lâng kā lí sái-lōng, goān in siū Siōng Chú chiù-chó͘, in-ūi in kin-á-ji̍t kā góa kóaⁿ-chhut Siōng Chú èng-ún ê thó͘-tōe, hāi góa tio̍h khì ho̍k-sāi pa̍t-ê sîn-bêng.

20Kiû lí m̄-thang hō͘ góa sí tī gōa-kok, lī-khui Siōng Chú bīn-chêng. Í-sek-lia̍t-ông ná tio̍h chhut-lâi chhē chi̍t chiah ka-cháu, ná tio̍h tī soaⁿ--ni̍h chhin-chhiūⁿ teh jip chi̍t chiah iá-chiáu!”

21 Sò-lô ìn kóng, “Góa m̄-tio̍h. Góa ê kiáⁿ Tāi-pi̍t, lí thang tò--lâi. Góa bōe koh hāi lí, in-ūi kin-á-ji̍t lí ū khòaⁿ-tāng góa ê sìⁿ-miā. Góa si̍t-chāi chin hô͘-tô͘, hoān chiah-ni̍h tōa ê chhò-gō͘!”

22 Tāi-pi̍t kóng, “Ông ah, lí ê chhiuⁿ tī chia, chhiáⁿ kiò chi̍t ê pō͘-hā kè-lâi gia̍h--tńg-khì.

23Siōng Chú ōe chiàu ta̍k-ê lâng ê chèng-gī sìn-si̍t kā i pò-tap; kin-á-ji̍t Siōng Chú ū chiong lí kau tī góa ê chhiú, m̄-kú góa bô chhut-chhiú siong-hāi Siōng Chú soán-li̍p ê ông.

24Góa kin-á-ji̍t khòaⁿ-tāng lí ê sìⁿ-miā, goān Siōng Chú mā án-ni khòaⁿ-tāng góa ê sìⁿ-miā, kiù góa thoat-lī só͘-ū ê hoān-lān.”

25 Sò-lô kā Tāi-pi̍t kóng, “Góa ê kiáⁿ Tāi-pi̍t, goān lí tit-tio̍h Siōng-tè ê chiok-hok; lí ōe chòe tōa tāi-chì, só͘ chòe--ê it-tēng ōe sêng-kong.”

Tāi-pi̍t chiū lī-khui, Sò-lô mā tò-tńg-khì i tòa ê só͘-chāi.

Sat-bó-ní-kì Siōng-koàn 26 - 現代台語譯本羅馬字版(TTVR)-闽南语

Learn More About Us