Iok-ná-su 2 - 現代台語譯本羅馬字版(TTVR)-闽南语

Iok-ná ê Kî-tó

1 Iok-ná tī hî ê pak-tó͘ lāi tùi Siōng Chú — i ê Siōng-tè kî-tó, kóng:

2Góa tī gûi-kip ê sî kiû-kiò Siōng Chú,

I ū ìn góa;

góa tùi Im-kan siōng-chhim ê só͘-chāi ai-kiò,

lí ū thiaⁿ--tio̍h.

3Lí kā góa hiat-lo̍h chhim-hái, kàu hái-tóe;

tōa-chúi ûi góa, lí ê pho-lōng, lí ê tōa-éng khàm góa.

4Góa siūⁿ, “Lí tùi lí ê bīn-chêng kā góa kóaⁿ-cháu,

góa beh án-chóaⁿ chiah ōe-tàng koh khòaⁿ-tio̍h lí ê sèng-tiān?”

5Góa hō͘ chúi kek kah beh bô-miā;

Chhim-ian ûi-khùn góa;

hái-chháu tîⁿ-tiâu góa ê thâu-khak.

6Góa tîm lo̍h-khì kàu soaⁿ ê kun-ki;

tōe ê mn̂g-chhòaⁿ éng-oán kā góa chhòaⁿ--teh;

m̄-kú, Siōng Chú — góa ê Siōng-tè,

lí ū kiù góa ê sìⁿ-miā thoat-lī sí-bông.

7Góa ê sìⁿ-miā kiông-beh bô--khì ê sî,

góa siūⁿ-khí Siōng Chú;

góa ê kî-tó chìn-ji̍p lí ê sèng-tiān,

kàu tī lí ê bīn-chêng.

8Só͘-ū khîⁿ-tiâu bô lō͘-ēng ê ngó͘-siōng ê lâng,

khì-sak in tùi lí ê tiong-sêng.

9Chóng-sī góa beh ēng kám-un ê siaⁿ chòe chè hiàn hō͘ lí,

siā góa hē ê goān.

Chín-kiù sī tùi Siōng Chú lâi!

10Siōng Chú chiū bēng-lēng hit-bé hî, kā Iok-ná thò͘ tī lio̍k-tōe.

Learn More About Us