Le̍k-tāi-chì Siōng-koàn 23

Le̍k-tāi-chì Siōng-koàn 23 - 現代台語譯本羅馬字版(TTVR)-闽南语

1 Tāi-pi̍t nî-lāu, hè-siū chiok, chiū siat-li̍p i ê kiáⁿ Só͘-lô-bûn chòe Í-sek-lia̍t-ông.

Lī-bī-lâng ê Chit-bū

2 Tāi-pi̍t tiàu-chi̍p Í-sek-lia̍t ê chèng léng-siù, chè-si, kap Lī-bī-lâng.

3Lī-bī-lâng saⁿ-cha̍p hè í-siōng ê ta-po͘-lâng, chóng-kiōng ū saⁿ-bān poeh-chheng.

4Tāi-pi̍t hun-phòe kî-tiong nn̄g-bān sì-chheng lâng koán-lí Siōng Chú ê tiān ê sū-bū, la̍k-chheng lâng chòe koaⁿ-tiúⁿ kap su-hoat jîn-oân,

5sì-chheng lâng chòe sèng-tiān mn̂g-kháu ê siú-ōe, koh sì-chheng lâng ēng Tāi-pi̍t só͘ chòe ê ga̍k-khì chheng-chàn Siōng Chú.

6Tāi-pi̍t chiong Lī-bī ê kiáⁿ, Kek-sūn, Ko-hat, kap Bí-la-lī ê hō͘-tāi hun-phòe pan-chhù.

7 Kek-sūn ū nn̄g ê kiáⁿ: La-tān kap Sī-múi.

8La-tān ū saⁿ ê kiáⁿ: Tōa--ê sī Iâ-hiat, koh ū Se-thán kap Iok-ní.

9In lóng chòe La-tān ka-cho̍k ê cho̍k-tiúⁿ. Sī-múi ū saⁿ ê kiáⁿ: Sī-lô-bi̍t, Hap-sih, kap Hap-lân

10Sī-múi ū sì ê kiáⁿ: Ngá-hap, Sè-sat, Iâ-o͘-si, Pí-lī-a.

11Ngá-hap sī tōa-kiáⁿ, tē-jī--ê sī Sè-sat; Iâ-o͘-si kap Pí-lī-a ê kiáⁿ-sun bô jōa-chōe, só͘-í sǹg-chòe chi̍t cho̍k.

12 Ko-hat ū sì ê kiáⁿ: Àm-lân, Í-su-hap, Hi-pek-lûn, kap O͘-siat.

13Àm-lân ê kiáⁿ ū A-lûn kap Mô͘-se. A-lûn kap i ê hō͘-tāi siū soán-phài lâi sèng-hòa chì-sèng ê mi̍h, thang éng-oán tī Siōng Chú bīn-chêng sio-hiuⁿ, ho̍k-sāi, hōng I ê miâ chiok-hok.

14Siōng-tè tiōng-iōng ê lâng Mô͘-se, i ê hō͘-tāi sio̍k Lī-bī chi-cho̍k.

15Mô͘-se ū nn̄g ê kiáⁿ: Kek-sūn kap Í-lī-í-siā.

16Kek-sūn ê hō͘-tāi Sè-pò͘-gia̍p sī léng-siù.

17Í-lī-í-siā chí-ū chi̍t ê kiáⁿ Lī-hap-pí-ngá, m̄-kú Lī-hap-pí-ngá ê hō͘-tāi chin chōe.

18Í-su-hap ê kiáⁿ, tōa--ê sī Sī-lô-bi̍t.

19Hi-pek-lûn ê kiáⁿ, tōa--ê sī Iâ-lī-ngá, tē-jī--ê sī A-má-lī-ngá, tē-saⁿ--ê sī Ngá-hap-sek, tē-sì--ê sī Iâ-ka-biān.

20O͘-siat ê kiáⁿ, tōa--ê sī Bí-ka, tē-jī--ê sī I-sī-ngá.

21 Bí-la-lī ū nn̄g ê kiáⁿ: Boat-lī kap Bō͘-sī; Boat-lī ū nn̄g ê kiáⁿ: Í-lī-a-sat kap Ki-sū.

22Í-lī-a-sat sí, bô kiáⁿ, chí-ū cha-bó͘-kiáⁿ, i ê hiaⁿ-tī Ki-sū hiah-ê kiáⁿ chhōa in.

23Bō͘-sī ū saⁿ ê kiáⁿ: Boat-lī, Í-tek, kap Iâ-lī-mô͘.

24Téng-bīn chiah-ê lâng chiàu in ê ka-cho̍k lóng sī Lī-bī ê hō͘-tāi; ta̍k-ê lâng chiàu in ê miâ teng-lio̍k chòe cho̍k-tiúⁿ; jī-cha̍p hè í-siōng ê lâng tī Siōng Chú ê tiān chham-ú ho̍k-sāi ê kang-chok.

25Tāi-pi̍t kóng, “Siōng Chú — Í-sek-lia̍t ê Siōng-tè í-keng hō͘ I ê chú-bîn an-ku-lo̍k-gia̍p, koh I mā éng-oán tiàm tī Iâ-lō͘-sat-léng.

26Lī-bī-lâng m̄-bián koh kng hōe-bō͘ kap ho̍k-sāi ēng ê khì-khū.”

27Chiàu Tāi-pi̍t chòe-āu ê hoan-hù, Lī-bī-lâng jī-cha̍p hè í-siōng lóng tio̍h teng-kì.

28In ê chit-bū sī chòe A-lûn hō͘-tāi ê chō͘-chhiú, tī Siōng Chú ê tiān ho̍k-sāi, koán-lí chiah-ê tiâⁿ kap pâng-keng, chheng-kiat chiah-ê sèng ê khì-khū, lâi chòe Siōng-tè sèng-tiān ê sū-bū,

29koán-lí hiàn-chè ê piáⁿ, sò͘-chè ê mī-hún, bô-kàⁿ ê po̍h-piáⁿ, í-ki̍p ēng chian-pôaⁿ chian--ê kap ēng iû tiâu-hô ê mi̍h; koh koán-lí chè-mi̍h ê sò͘-liōng kap tōa-sòe.

30In ta̍k-ji̍t chá àm lóng tio̍h kám-siā chheng-chàn Siōng Chú.

31Koh tī An-hioh-ji̍t, ta̍k kò-ge̍h ê chhoe-it, kap choeh-kî, chiàu chè-mi̍h ê sò͘-liōng, kui-lē, hiàn sio-hòa-chè hō͘ Siōng Chú.

32Koh kau-tài in kò͘-siú hōe-bō͘ kap sèng-só͘; hia̍p-chō͘ in ê chhin-chiâⁿ A-lûn ê hō͘-tāi koán-lí Siōng Chú sèng-tiān ê sū-bū.

Le̍k-tāi-chì Siōng-koàn 23 - 現代台語譯本羅馬字版(TTVR)-闽南语

Learn More About Us