Si-phian 58 - 現代台語譯本羅馬字版(TTVR)-闽南语

Tāi-pi̍t ê kim-si, kau hō͘ sèng-ga̍k-tiúⁿ; tiāu, ēng “M̄-thang Húi-hoāi”.Kiû Siōng-tè Hêng-hoa̍t Choh-pháiⁿ ê Lâng

1Chip-chèng-chiá, lín kiám ū chin-chiàⁿ teh kóng kong-gī?

Kiám ū chiàu kong-pêng sím-phòaⁿ lâng?

2Bô, lín sim-lāi kè-ōe chòe pháiⁿ tāi-chì,

tī tōe-chiūⁿ, lín ēng chhiú tùi lâng si kiông-pō.

3Pháiⁿ-lâng tùi chhut bú-thai chiū kiâⁿ bê-lō͘;

chi̍t-ē lī-khui lāu-bú ê pak-tó͘ chiū kiâⁿ phian-lō͘, kóng pe̍h-chha̍t.

4In ê to̍k chhin-chhiūⁿ chôa ê to̍k;

in chhin-chhiūⁿ to̍k-chôa that-ba̍t ka-kī ê hī-khang,

5m̄ thiaⁿ lāng-chôa ê lâng,

á-sī gâu liām-chiù ê lâng ê siaⁿ.

6Siōng-tè ah, kiû lí phah-chi̍h in ê chhùi-khí;

Siōng Chú ah, kiû lí kòng-tn̄g béng-sai ê tōa-ki gê-khí.

7Goān in siau-sit chhin-chhiūⁿ chúi lâu-liáu-liáu,

chhin-chhiūⁿ chháu siū thún-ta̍h ta--khì.

8Goān in chhin-chhiūⁿ lō͘-lê sô--kè ê jiah liâm-piⁿ bô--khì;

chhin-chhiūⁿ hū-jîn-lâng liû-sán ê thai bô kìⁿ-tio̍h thiⁿ-ji̍t.

9Lín ēng chhì-á hiâⁿ-hé, tiáⁿ iáu-bē jia̍t,

I beh ēng kńg-lê-á-hong, chiong tâm--ê kap ta--ê chòe-chi̍t-ē sàu--khì.

10Gī-lâng khòaⁿ-kìⁿ in siū pò-èng chiū hoaⁿ-hí;

i ēng pháiⁿ-lâng lâu ê huih sóe-kha.

11Lâng chiū kóng, gī-lâng chin-chiàⁿ ū hó-pò;

tī tōe-bīn-chiūⁿ Siōng-tè kó-jiân ū teh sím-phòaⁿ.

Learn More About Us