Si-phian 85 - 現代台語譯本羅馬字版(TTVR)-闽南语

Khó-la hō͘-tāi ê si, kau hō͘ sèng-ga̍k-tiúⁿ.Kiû Siōng Chú Un-thāi I ê Chú-bîn

1Siōng Chú ah, lí ū si-un hō͘ lí ê tōe;

Í-sek-lia̍t siū-lia̍h ê lâng lí ū kái-kiù in tò--lâi.

2Lí ū sià-bián lí chú-bîn ê chōe-ok,

chhat-siau in it-chhè ê chōe-kò.

3Lí ū siu-hôe lí lóng-chóng ê siū-khì,

soah lí béng-lia̍t ê siū-khì.

4Chín-kiù goán ê Siōng-tè ah, kiû lí hō͘ goán tò-tńg--lâi,

soah lí tùi goán ê siū-khì.

5Lí kiám beh éng-oán tùi goán siū-khì?

Kiám beh kè-sio̍k siū-khì kàu bān-tāi?

6Lí kiám m̄ koh kā goán kiù oa̍h,

hō͘ lí ê chú-bîn in-ūi lí lâi hoaⁿ-hí?

7Siōng Chú ah, kiû lí hō͘ goán keng-giām lí put-piàn ê thiàⁿ,

chiong lí ê kiù-un sù hō͘ goán.

8Góa beh thiaⁿ Chú Siōng-tè só͘ beh kóng ê ōe;

in-ūi I beh tùi I ê chú-bîn, chiū-sī sèng ê chú-bîn, èng-ún sù pêng-an hoân-êng;

chóng-sī in m̄-thang tò-tńg-khì kiâⁿ gû-gōng ê lō͘.

9I it-tēng ōe chín-kiù kèng-ùi I ê lâng,

hō͘ I ê êng-kng lîm-chāi tī lán kéng-lāi.

10Chû-ài kap sìn-si̍t saⁿ-tú;

kong-gī kap hô-pêng sio-lám.

11Sìn-si̍t tùi tōe hoat-chhut;

kong-gī tùi thiⁿ kàng-lo̍h.

12Siōng Chú sù hó-mi̍h;

lán ê thó͘-tōe tōa hong-siu.

13Kong-gī ōe kiâⁿ tī Siōng Chú thâu-chêng,

ūi I chún-pī tō-lō͘.

Learn More About Us