Ka-lia̍p-thài-su 6

Ka-lia̍p-thài-su 6 - 現代台語譯本羅馬字版(TTVR)-闽南语

Hun-tam Tāng-tàⁿ

1Hiaⁿ-tī chí-bē, nā ū lâng hām-lo̍h kè-sit, lín chiah-ê sio̍k-lêng ê lâng tio̍h ēng un-hô ê sim kā i kiù-chèng. Lín ka-kī mā tio̍h sió-sim, chiah bián siū ín-iú.

2Tio̍h hun-tam tāng-tàⁿ, án-ni chòe chiah sī teh si̍t-hiān Ki-tok ê lu̍t-hoat.

3Ka-kī bô gâu siūⁿ-kóng chin gâu, sī teh khi-phiàn ka-kī.

4Ta̍k-ê lâng tio̍h séng-chhat ka-kī ê hêng-ûi; nā ū hó hêng-ûi, i kan-ta thang tùi ka-kī khoa-kháu, m̄-bián kap pa̍t-lâng pí-kàu.

5In-ūi ta̍k-ê lâng tio̍h taⁿ ka-kī ê tàⁿ.

6Ha̍k-si̍p tō-lí ê lâng tio̍h kap kàu-tō i ê lâng hun-hióng ta̍k-hāng hó-mi̍h.

7M̄-thang phiàn ka-kī, Siōng-tè sī bōe-ēng-tit bú-bān--ê. Lâng chèng sím-mi̍h chiū siu sím-mi̍h.

8Lâng só͘ iā--ê nā-sī ūi-tio̍h boán-chiok ka-kī ê io̍k-bōng, chiū ōe siu-sêng bia̍t-bông; lâng só͘ iā--ê nā-sī ūi-tio̍h beh hō͘ Sèng Sîn hoaⁿ-hí, chiū ōe tùi Sèng Sîn siu éng-oán ê oa̍h-miā.

9Chòe hó-sū m̄-thang siūⁿ siān; nā bô hoe-sim, sî kàu chiū thang siu-sêng.

10Só͘-í, bô-lūn sím-mi̍h sî-chūn, tio̍h pá-ak ki-hōe tùi chèng-lâng chòe hó-sū, te̍k-pia̍t sī tùi sìn-gióng chiâⁿ-chòe chi̍t ke ê lâng.

Chòe-āu ê Kéng-kò kap Chiok-hok

11Lín khòaⁿ, góa chhin-pit ēng chiah-ni̍h tōa ê jī siá hō͘ lín!

12Hiah-ê chù-tiōng gōa-piáu thé-biān ê lâng, siūⁿ-beh kiông-pek lín chiap-siū kat-lé. In án-ni chòe kan-ta sī bô ài ūi-tio̍h Ki-tok ê si̍p-jī-kè siū pek-hāi.

13Kî-si̍t, liân hiah-ê siū kat-lé ê lâng pún-sin mā bô chun-siú Lu̍t-hoat. In pek lín siū kat-lé, chiah ōe-tàng khoa-kháu kóng lín ū chun-siú gōa-piáu ê lé-gî.

14Góa leh, góa chí-ū beh khoa-kháu lán ê Chú Iâ-so͘ Ki-tok ê si̍p-jī-kè, thong-kè chit-ê si̍p-jī-kè, tùi góa lâi kóng, sè-kài í-keng tèng-sí tī si̍p-jī-kè; tùi sè-kài lâi kóng, góa mā í-keng tèng-sí.

15Ū siū kat-lé bô siū kat-lé lóng bô tiōng-iàu; tiōng-iàu--ê sī lán tio̍h chiâⁿ-chòe sin chhòng-chō ê lâng.

16Chiàu chit-ê chún-chek seng-oa̍h ê lâng chiū-sī Siōng-tè ê Í-sek-lia̍t chú-bîn. Goān pêng-an kap lîn-bín kap in tông-chāi!

17Tùi taⁿ í-āu, bô-lūn sím-mi̍h-lâng to lóng m̄-thang kā góa kiáu-jiáu; in-ūi Iâ-so͘ ū tī góa ê seng-khu khàm-ìn chòe kì-hō, chèng-bêng góa sio̍k I.

18Hiaⁿ-tī chí-bē, goān lán ê Chú Iâ-so͘ Ki-tok ê un-tián kap lín tông-chāi. Amen!

Ka-lia̍p-thài-su 6 - 現代台語譯本羅馬字版(TTVR)-闽南语

Learn More About Us