Í-sài-a-su 31

Í-sài-a-su 31 - 現代台語譯本羅馬字版(TTVR)-闽南语

Siōng-tè Beh Pó-hō͘ Iâ-lō͘-sat-léng

1Chhám ah, hiah-ê lo̍h-khì Ai-ki̍p kiû pang-chān ê lâng!

In óa-khò bé,

óa-khò chin chōe chiàn-chhia,

óa-khò chin kiông ê bé-peng.

In bô ài gióng-bōng Í-sek-lia̍t sîn-sèng ê Siōng-tè,

mā bô beh chhē-kiû Siōng Chú ê pang-chān.

2M̄-kú, Siōng Chú ū tì-hūi,

I ōe kàng chai-lān,

bōe siu-hôe I ê ōe,

ōe khí-lâi kong-kek pháiⁿ-lâng ê ke,

tùi-khòng hiah-ê pang-chān choh-pháiⁿ ê lâng.

3 Ai-ki̍p-lâng put-kò sī lâng, m̄-sī Siōng-tè;

in ê bé sī hiat-jio̍k, m̄-sī sîn-lêng.

Siōng Chú chi̍t-ē chhut-chhiú,

pang-chān--ê ōe poa̍h-tó,

siū pang-chān--ê ōe tó--lo̍h-khì;

nn̄g pêng ê lâng lóng ōe chòe-hé bia̍t-bông.

4Siōng Chú ū tùi góa án-ni kóng:

Sai á-sī sai-á-thûn ūi-tio̍h i ê la̍h-bu̍t hm̄-hm̄-háu,

kui-tīn bo̍k-chiá chi̍p óa-lâi kong-kek i ê sî,

i bōe in-ūi in ê háng-hoah tio̍h-kiaⁿ,

bōe in-ūi in ê soan-hoa cháu-siám.

Chhin-chhiūⁿ án-ni, Siōng Chú — Bān-kun ê Thóng-sòe ōe lo̍h-lâi Sek-an-soaⁿ ê soaⁿ-niá chok-chiàn.

5Chhin-chhiūⁿ thí-si̍t teh pe ê chiáu án-chóaⁿ pó-hō͘ i ê kiáⁿ,

Siōng Chú — Bān-kun ê Thóng-sòe mā beh án-ni pó-hō͘ Iâ-lō͘-sat-léng;

I beh siú-hō͘, beh tháu-pàng,

beh kái-kiù, beh pó-siú.

6 Í-sek-lia̍t-lâng ah, tio̍h hóe-kái, kui-ǹg lín só͘ pōe-ge̍k ê Siōng Chú.

7Tī hit-ji̍t, ta̍k-ê lâng beh sàu-tû kim ê ngó͘-siōng kap gûn ê ngó͘-siōng, chiū-sī lín siang-chhiú só͘ chō tì-kàu lín ka-kī hoān-chōe ê ngó͘-siōng.

8 A-su̍t ōe sí tī to-ē, m̄-sī in-ūi lâng ê to chō-sêng--ê;

A-su̍t ōe hō͘ to thun-bia̍t, m̄-sī in-ūi lâng ê to.

In hō͘ to-kiàm tui-jip tô-cháu;

in ê siàu-liân-lâng it-tēng ōe chòe khó͘-kang.

9 A-su̍t-ông ōe khióng-hông siau-iûⁿ;

in ê koaⁿ-tiúⁿ in-ūi kiaⁿ-hiâⁿ pàng-sak kun-kî tô-cháu.

Siōng Chú án-ni soan-pò͘.

Siōng Chú tī Sek-an-soaⁿ ū hé,

tī Iâ-lō͘-sat-léng ū hé-lô͘.

Í-sài-a-su 31 - 現代台語譯本羅馬字版(TTVR)-闽南语

Learn More About Us