Si-phian 31

Si-phian 31 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Sìn-khò ê Kî-tó

1Siōng Chú ah, góa khò lí chòe góa ê pó-hō͘.

Kiû lí hō͘ góa éng-oán bōe sit-pāi kiàn-siàu;

lí sī kong-gī ê Siōng-tè, kiû lí kái-kiù góa.

2Kiû lí àⁿ hī-khang thiaⁿ góa, kóaⁿ-kín lâi kiù góa,

chòe góa kian-kò͘ ê chio̍h-pôaⁿ, chòe pó-lúi chín-kiù góa.

3Lí sī góa ê soaⁿ-giâm, góa ê pó-lúi,

kiû lí chiàu lí ê miâ léng-tō góa, ín-chhōa góa.

4Lâng àm-tiong siat lô-bāng beh bāng góa, kiû lí kiù góa thoat-lī,

in-ūi lí sī góa ê pó-lúi.

5Góa chiong góa ê lêng-hûn kau-tài lí;

Siōng Chú — sìn-si̍t ê Siōng-tè ah, lí ōe kiù-sio̍k góa.

6Góa iàm-ò͘ⁿ khîⁿ-tiâu bô lō͘-ēng ê ngó͘-siōng ê lâng;

góa chí-ū sìn-khò Siōng Chú.

7Góa beh in-ūi lí ê chû-ài hoaⁿ-hí khoài-lo̍k;

in-ūi lí ū khòaⁿ-kìⁿ góa ê kan-khó͘, chai góa lāi-sim ê khó͘-thàng.

8Lí bô kā góa kau tī tùi-te̍k ê chhiú;

lí hō͘ góa ê kha khiā tī khui-khoah an-ún ê só͘-chāi.

9Siōng Chú ah, góa tī hoān-lān tiong, kiû lí lîn-bín góa.

Góa ê ba̍k-chiu in-ūi iu-siong hoe--khì;

góa ê sim-sîn, góa ê seng-khu soe-jio̍k.

10Góa ê sìⁿ-miā in-ūi iu-khó͘ siau-chīn;

góa ê nî-hè in-ūi ai-siong kiám-chió.

Góa ê khùi-la̍t in-ūi góa ê chōe-kò soe-lám;

góa ê kut-thâu ko͘-tâ.

11Góa só͘-ū ê tùi-te̍k lóng lêng-jio̍k góa;

góa ê chhù-piⁿ kā góa bú-jio̍k;

liân bat góa ê lâng mā lóng kiaⁿ góa;

tī lō͘--ni̍h khòaⁿ-tio̍h góa ê lâng lóng siám-khui.

12Góa chhin-chhiūⁿ sí-lâng hō͘ lâng bōe-kì--tit, bô lâng siàu-liām;

góa chhin-chhiūⁿ phòa--khì ê khì-khū hō͘ lâng hìⁿ-sak.

13Góa thiaⁿ-kìⁿ chin chōe lâng sì-kòe teh chō-iâu;

chiu-ûi chhiong-móa khióng-pò͘.

In chham-siông beh kong-kek góa,

kè-bô͘ beh hāi góa ê sìⁿ-miā.

14Siōng Chú ah, góa iáu-kú beh óa-khò lí;

góa kóng, “Lí sī góa ê Siōng-tè.”

15Góa ê it-seng tī lí ê chhiú-tiong;

kiû lí kiù góa thoat-lī tùi-te̍k ê chhiú kap khún-pek góa ê lâng.

16Kiû lí ēng lí ê bīn ê kng chiò lí ê po̍k-jîn,

chiàu lí ê chû-ài chín-kiù góa.

17Siōng Chú ah, kiû lí hō͘ góa bô tì-kàu kiàn-siàu,

in-ūi góa kiû-kiò lí.

Kiû lí hō͘ pháiⁿ-lâng sit-pāi kiàn-siàu,

hō͘ in tī Im-hú tiām-tiām bô ōe thang kóng.

18Goān lí hō͘ pe̍h-chha̍t ê chhùi pìⁿ é-káu,

bōe koh kiau-ngō͘ kā lâng khòaⁿ-khin, lām-sám bú-jio̍k gī-lâng.

19Tī sè-kan-lâng bīn-chêng, lí ūi-tio̍h kèng-ùi lí ê lâng chek-chū ê un-hūi jōa-á-ni̍h tōa!

Lí ūi-tio̍h chhē lí chòe pī-lān-só͘ ê lâng só͘ sù ê un-hūi jōa-á-ni̍h hó!

20Lí kā in chhàng tī lí ê bīn-chêng ún-ba̍t ê só͘-chāi,

in chiah bián hām-lo̍h lâng ê im-bô͘.

Lí àm-chīⁿ pó-siú in tī tiùⁿ-bō͘ lāi,

in chiah bián siū chhùi-chi̍h ê tiòng-siong.

21Siōng Chú eng-kai siū chheng-chàn,

in-ūi siâⁿ siū ûi-khùn ê sî, I ū tùi góa hián-chhut kî-biāu ê thiàⁿ.

22Góa bat tio̍h-kip kóng “Lí kā góa kóaⁿ-cháu m̄ chhap góa”,

m̄-kú góa kiû-kiò ê sî, lí ū thiaⁿ góa khún-kiû ê siaⁿ.

23Siōng Chú sèng ê chú-bîn ah, lín lóng tio̍h thiàⁿ I.

Siōng Chú pó-siú tiong-sìn ê lâng,

giâm-giâm pò-èng kiau-ngō͘ ê lâng.

24Só͘-ū gióng-bōng Siōng Chú ê lâng ah,

lín tio̍h chòng-táⁿ, sim kian-kò͘.

Si-phian 31 - 現代台語譯本羅馬字版(TTVR)-闽南语

Learn More About Us