Chhut-ai-ki̍p-kì 15

Chhut-ai-ki̍p-kì 15 - 現代台語譯本羅馬字版(TTVR)-闽南语

Mô͘-se ê Koa

1Hit-sî, Mô͘-se kap Í-sek-lia̍t-lâng tùi Siōng Chú chhiùⁿ chit-siú si-koa:

Góa beh tùi Siōng Chú chhiùⁿ-koa, in-ūi I tōa sèng-lī;

I chiong chiàn-bé kap bé-peng chhia-lo̍h hái.

2Siōng Chú sī góa ê khùi-la̍t, góa beh chhiùⁿ-koa chheng-chàn,

I kā góa kái-kiù.

I sī góa ê Siōng-tè, góa beh chheng-chàn I;

I sī góa lia̍t-chó͘ ê Siōng-tè, góa beh chun-chông I.

3Siōng Chú sī chiàn-sū;

Siōng Chú sī I ê chheng-ho͘.

4 Ai-ki̍p-ông ê chiàn-chhia kap kun-peng, Siōng Chú kā in hiat tī hái--ni̍h;

Ai-ki̍p-ông te̍k-soán ê kun-koaⁿ, lóng tîm-lo̍h Âng-hái.

5Tōa-éng thun-bia̍t in;

in chhin-chhiūⁿ chio̍h-thâu tîm kàu chhim ê só͘-chāi.

6Siōng Chú, lí ê chiàⁿ-chhiú ū bô-pí ê koân-lêng;

Siōng Chú, lí ê chiàⁿ-chhiú phah-chhùi tùi-te̍k.

7Lí hoat-chhut tōa ui-le̍k, chhia-tó hiah-ê khí-lâi kong-kek lí--ê;

lí hoat-chhut tōa siū-khì, sio-húi in chhin-chhiūⁿ sio be̍h-kó.

8Lí phīⁿ-khang ê khì hō͘ chúi chhèng-koân,

hō͘ tōa-chúi thia̍p kui-tui;

hái chin chhim ê chúi kian-tàng.

9Tùi-te̍k kóng, “Góa beh tui in, beh jip-tio̍h in;

góa beh pun chiàn-lī-phín lâi chiok góa ê sim-goān;

góa beh pu̍ih to kā in siau-bia̍t.”

10Lí chi̍t-ē pûn-hong,

hái-chúi chiū kā in im-sí;

in chhin-chhiūⁿ iân tîm-lo̍h tōa-chúi.

11Siōng Chú ah, chèng sîn-bêng tó chi̍t ê ōe-tàng kap lí pí?

Tó chi̍t ê chhin-chhiūⁿ lí sîn-sèng ui-giâm,

thang kiaⁿ-ùi, siū chheng-chàn, kiâⁿ kî-sū?

12Lí chhun-chhut chiàⁿ-chhiú,

tōe chiū kā in thun-bia̍t.

13Lí ēng chû-ài chhōa lí kiù-sio̍k ê chú-bîn;

lí ēng koân-lêng chhōa in chìn-ji̍p lí sèng ê só͘-chāi.

14Lia̍t-pang thiaⁿ--kìⁿ chiū ngia̍uh-ngia̍uh-chhoah;

tòa tī Hui-lī-sū-tōe--ê hō͘ thòng-khó͘ pau-ûi.

15Hit-sî, Í-tong ê cho̍k-tiúⁿ kiaⁿ-hiâⁿ;

Mô͘-ap ê eng-hiông phi̍h-phi̍h-chhoah;

tòa tī Ka-lâm-tōe--ê kiaⁿ kah phòa-táⁿ.

16Gông-ngia̍h kiaⁿ-hiâⁿ pau-ûi in;

Siōng Chú, in-ūi lí ê tōa koân-lêng,

in chhin-chhiūⁿ chio̍h-thâu bōe tín-tāng,

thèng-hāu lí ê chú-bîn keng-kè,

thèng-hāu lí sio̍k-hôe ê chú-bîn kè--khì.

17Lí beh chhōa in ji̍p-khì lí sán-gia̍p ê soaⁿ, kā in chai-pôe;

Siōng Chú, hia sī lí ūi ka-kī chún-pī beh khiā-khí ê só͘-chāi,

Chú ah, chiū-sī lí ê chhiú só͘ kiàn-li̍p ê sèng-só͘.

18Siōng Chú beh choh-ông, ti̍t-kàu éng-oán.

Bí-lī-an ê Koa

19 Ai-ki̍p-ông ê chiàn-bé, chiàn-chhia, kap bé-peng poa̍h-lo̍h hái ê sî, Siōng Chú hō͘ hái-chúi hôe-ho̍k goân-chōng kā in im-ba̍t; m̄-kú Í-sek-lia̍t-lâng tī hái-tiong kiâⁿ ta-tōe.

20 A-lûn ê tōa-chí, lú sian-ti Bí-lī-an, chhiú the̍h lin-long-kó͘; chèng hū-lú mā the̍h lin-long-kó͘, tè i ná phah-kó͘ ná thiàu-bú.

21Bí-lī-an hôe-èng, chhiùⁿ kóng:

Lín tio̍h chhiùⁿ-koa chheng-chàn Siōng Chú, in-ūi I tōa sèng-lī;

I chiong chiàn-bé kap bé-peng chhia-lo̍h hái.

Khó͘-chúi Pìⁿ Kam

22 Mô͘-se chhōa Í-sek-lia̍t-lâng tùi Âng-hái hiòng-chêng kiâⁿ, kàu Su-ní ê khòng-iá; in tī khòng-iá kiâⁿ saⁿ ji̍t, chhē bô chúi.

23Kàu Má-la

ê sî, Má-la ê chúi ōe khó͘, bōe-lim--tit; in kā hit-ê só͘-chāi kiò-chòe Má-la.

24Jîn-bîn bâi-oàn Mô͘-se, kóng, “Goán beh lim siáⁿ?”

25Mô͘-se chiū kiû-kiò Siōng Chú. Siōng Chú chí-sī i chi̍t châng chhiū-á, i chiong hit-châng chhiū-á hiat tī chúi--ni̍h, chúi chiū pìⁿ kam.

Siōng Chú tī hia ūi-tio̍h in tēng kui-lē kap bēng-lēng, tī hia kā in khó-giām.

26Siōng Chú kóng, “Lín nā chù-ì thiaⁿ góa Siōng Chú — lín ê Siōng-tè ê ōe, chòe góa khòaⁿ-chòe chèng-ti̍t ê sū, chin-chiàⁿ thiaⁿ-thàn góa ê kài-bēng, chun-siú góa só͘-ū ê kui-lē, góa chiū bōe hō͘ Ai-ki̍p-lâng tì--tio̍h ê pīⁿ tī lín ê sin-chiūⁿ hoat-seng, in-ūi góa sī i-tī lín ê Siōng Chú.”

27In kàu Í-lîm, tī hia ū cha̍p-jī ê chúi-chôaⁿ, chhit-cha̍p châng ê chang-chhiū; in chiū tī hia ê chúi-piⁿ chat-iâⁿ.

Chhut-ai-ki̍p-kì 15 - 現代台語譯本羅馬字版(TTVR)-闽南语

Learn More About Us