Chim-giân 26

Chim-giân 26 - 現代台語譯本羅馬字版(TTVR)-闽南语

1Chhin-chhiūⁿ joa̍h-thiⁿ lo̍h-seh, siu-koah ê sî lo̍h-hō͘,

gōng-lâng tit-tio̍h chun-êng, bô ha̍p-gî.

2Chhin-chhiūⁿ chhek-chiáu-á pe-khí-pe-lo̍h, ìⁿ-á pe-lâi-pe-khì,

bô-lí-bô-iû ê chiù-chó͘ bōe hoat-seng chok-iōng.

3Tùi bé tio̍h ēng piⁿ, tùi lû tio̍h ēng kā-kiuⁿ;

gōng-lâng ê ka-chiah tio̍h ēng tîn-tiâu.

4M̄-thang chiàu gōng-lâng ê gōng-ōe ìn i,

chiah bián lí kap i kâng-khoán.

5Tio̍h chiàu gōng-lâng ê gōng-ōe ìn i,

chiah bián i khòaⁿ ka-kī chòe ū tì-sek.

6Thok gōng-lâng thoân-ta̍t siau-sit,

chhin-chhiūⁿ chām-tn̄g ka-kī ê kha, siong-hāi ka-kī.

7Chim-giân tī gōng-lâng ê chhùi,

chhin-chhiūⁿ khê--khì ê kha bô chok-iōng.

8Chiong chun-êng hō͘ gōng-lâng,

chhin-chhiūⁿ ēng pó-chio̍h chòe chio̍h-thâu khǹg tī hìⁿ-soh hìⁿ.

9Gōng-lâng ê chhùi kóng chim-giân,

chhin-chhiūⁿ chùi-hàn gia̍h ū chhì ê chhiū-ki loān sut.

10Chhiàⁿ gōng-lâng á-sī chùi-hàn chòe tāi-chì,

chhin-chhiūⁿ chìⁿ loān siā siong-tio̍h lâng.

11Gōng-lâng it-chài chòe gû-gōng ê sū,

chhin-chhiūⁿ káu oa̍t tńg-lâi chia̍h ka-kī thò͘--chhut-lâi ê mi̍h.

12Lí bat khòaⁿ-tio̍h siūⁿ-kóng ka-kī sī chhong-bêng ê lâng bô?

Liân gōng-lâng to pí i khah ū ǹg-bāng.

13Pîn-tōaⁿ ê lâng kóng, “Lō͘--ni̍h ū sai,

koe-lō͘--ni̍h ū béng-sai.”

14Pîn-tōaⁿ-lâng tī bîn-chhn̂g kō-lâi-kō-khì,

chhin-chhiūⁿ mn̂g khui-lâi-khui-khì.

15Pîn-tōaⁿ ê lâng chhiú chhun kàu pôaⁿ--ni̍h,

the̍h kàu chhùi mā hiâm hùi-khì.

16Pîn-tōaⁿ-lâng khòaⁿ ka-kī chin khiáu,

iâⁿ-kè chhit ê gâu ìn-tap ê lâng.

17Kè-lō͘-lâng khì chhap kap i bô koan-hē ê kiù-hun,

chhin-chhiūⁿ lâng khì khiú káu-á ê hī-á.

18-19Lâng khi-phiàn chhù-piⁿ, kóng,

“Góa sī teh kún-chhiò”,

sī chhin-chhiūⁿ siáu-lâng hiat hé-pé,

lāi-chìⁿ, kap bú-khì hō͘ lâng sí.

20Hé bô chhâ chiū hoa--khì;

bô lâng o̍h-ōe, saⁿ-chiⁿ chiū soah--khì.

21Ài saⁿ-chiⁿ ê lâng siàn-tōng hun-cheng,

chhin-chhiūⁿ thòaⁿ-siōng-ka-thòaⁿ, hé-siōng-thiam-chhâ.

22Hī-khang piⁿ ê êng-á-ōe chhin-chhiūⁿ hó-chia̍h-mi̍h, chi̍t-ē ji̍p-chhùi chiū thun-lo̍h pak.

23Chhùi tiⁿ, sim kan-ok,

chhin-chhiūⁿ hûi-khì chhat chho͘-gûn.

24Ké-hó ê lâng kóng hó-thiaⁿ-ōe,

sim-lāi khiok chûn khúi-chà.

25I kóng hó-thiaⁿ-ōe, lí m̄-thang sìn,

in-ūi i sim-lāi ū chhit hāng thang iàm-ò͘ⁿ.

26I sui-jiân ēng khúi-chà am-khàm ka-kī ê oàn-hūn,

i ê siâ-ok ōe lō͘-hiān tī kong-chiòng bīn-chêng.

27Ku̍t hām-chíⁿ ê lâng, ka-kī ōe poa̍h-lo̍h hit lāi-bīn;

kō chio̍h-thâu ê lâng, chio̍h-thâu ōe kō tò-tńg-lâi teh-tio̍h ka-kī.

28Pe̍h-chha̍t ê chi̍h ōe siong-hāi lâng;

phô͘-tháⁿ ê chhùi ōe húi-bia̍t lâng.

Chim-giân 26 - 現代台語譯本羅馬字版(TTVR)-闽南语

Learn More About Us