A-mô͘-sū-su 3

A-mô͘-sū-su 3 - 現代台語譯本羅馬字版(TTVR)-闽南语

Sian-ti ê Jīm-bū

1 Í-sek-lia̍t-lâng ah, tio̍h thiaⁿ góa Siōng Chú chek-pī lín ê ōe:

Lín choân-ke sī góa tùi Ai-ki̍p-tōe chhōa--chhut-lâi--ê;

2tī tōe-chiūⁿ bān-cho̍k tiong góa chí-ū kéng lín,

só͘-í góa beh in-ūi lín só͘ hoān it-chhè ê chōe hêng-hoa̍t lín.

3Nn̄g ê lâng nā bô sio-iok,

ná ōe tàu-tīn kiâⁿ?

4Sai nā bô la̍h-bu̍t,

kiám ōe tī chhiū-nâ lāi háu?

Sai-á-thûn nā bô tit-tio̍h chia̍h-mi̍h,

kiám ōe tī tōng-lāi chhut-siaⁿ?

5Oa̍h-tauh nā bô khǹg jī,

ná ōe tng-tio̍h chiáu-á?

Nā bô ta̍h-tio̍h ki-koan,

oa̍h-tauh ná ōe ha̍p--khí-lâi?

6Siâⁿ-lāi nā ū sàu-kak ê siaⁿ,

chū-bîn kiám bōe kiaⁿ?

Siâⁿ-lāi nā ū chai-hō,

kiám m̄-sī Siōng Chú só͘ kàng?

7Chì-koân ê Siōng Chú kè-ōe beh chòe tāi-chì,

it-tēng ōe tāi-seng chí-sī I ê po̍k-jîn sian-ti.

8Sai teh háu,

siáⁿ-lâng bōe kiaⁿ?

Chì-koân ê Siōng Chú kóng-ōe,

siáⁿ-lâng káⁿ bô thoân-ta̍t?

Sat-má-lī-a ê Kiat-kio̍k

9Tio̍h tī A-si̍t-tu̍t ê kiong-tiān

kap Ai-ki̍p ê kiong-tiān soan-pò͘:

Tio̍h tī Sat-má-lī-a ê soaⁿ chū-chi̍p,

khòaⁿ siâⁿ-lāi ê tōa jiáu-loān

kap lāi-bīn khi-ap jîn-bîn ê sū.

10In-ūi in bōe-hiáu chòe chèng-ti̍t ê tāi-chì;

in ê kiong-tiān tún-móa ēng kiông-pō chhiúⁿ--lâi ê mi̍h.

Siōng Chú án-ni soan-kò.

11Só͘-í Chì-koân ê Siōng Chú án-ni kóng:

Ū tùi-te̍k beh lâi ûi-khùn chit-ê tōe,

kong-phòa lí ê hông-ōe-sòaⁿ,

chhiúⁿ lí ê kiong-tiān.

12Siōng Chú án-ni kóng: Chhin-chhiūⁿ bo̍k-chiá tùi sai ê chhùi chhiúⁿ--chhut-lâi--ê, kan-ta nn̄g ki iûⁿ-kha, á-sī chi̍t-tè-á hī-á, tī Sat-má-lī-a kè chhia-chhí seng-oa̍h ê Í-sek-lia̍t-lâng, ōe-tàng tô-thoat--ê mā-sī hiah-ni̍h chió.

13Chì-koân ê Siōng Chú — Bān-kun ê Thóng-sòe Siōng-tè kóng:

Tio̍h thiaⁿ, tio̍h kéng-kò Ngá-kok ê hō͘-tāi.

14Góa in-ūi Í-sek-lia̍t-lâng hoān-chōe kā in hêng-hoa̍t hit-ji̍t,

góa beh húi-hoāi Pek-te̍k-lī ê chè-tôaⁿ;

tôaⁿ ê kak ōe siū chám-tn̄g, lak-lo̍h tōe.

15Góa beh thiah-húi in tang-thiⁿ joa̍h-thiⁿ ê pia̍t-chong;

chhiūⁿ-gê chng-thāⁿ ê chhù ōe siū húi-bia̍t,

liân tōa keng chhù to ōe bô--khì.

Siōng Chú án-ni soan-kò.

A-mô͘-sū-su 3 - 現代台語譯本羅馬字版(TTVR)-闽南语

Learn More About Us