Thoân-tō-su 11

Thoân-tō-su 11 - 現代台語譯本羅馬字版(TTVR)-闽南语

Ū Tì-hūi ê Lâng ê Chok-ûi

1Chiong lí ê bí-niû khǹg tī chúi-bīn hō͘ i lâu--khì, kè chi̍t tōaⁿ sî-kan ōe koh tit--tio̍h.

2Chiong sán-gia̍p pun-chòe chhit hūn á-sī poeh hūn, in-ūi m̄ chai chiong-lâi ū sím-mi̍h chai-lān.

3Hûn nā ū chúi-khì móa-móa, hō͘ chiū piàⁿ-lo̍h tōe; chhiū nā tó ǹg lâm á-sī ǹg pak, tó tī sím-mi̍h só͘-chāi, chiū tiāⁿ-tiāⁿ tī hia.

4Khòaⁿ hong-sè ê lâng bōe khì iā-chéng; koan-chhat thiⁿ-sek ê lâng bōe khì siu-koah.

5Sìⁿ-miā ê oa̍h-khì án-chóaⁿ tī lāu-bú ê chú-kiong chiâⁿ-chòe hêng-thé, lí m̄ chai; chhòng-chō bān-mi̍h ê Siōng-tè ê chok-ûi, lí mā m̄ chai.

6Chá-khí-sî tio̍h iā-chéng, kàu ē-hng-sî chhiú mā m̄-thang thêng; in-ūi lí m̄ chai ōe kiat-si̍t--ê sī chit-ê á-sī hit-ê; á-sī nn̄g ê lóng ōe kiat-si̍t.

7Kng si̍t-chāi chin hó; ba̍k-chiu khòaⁿ-tio̍h ji̍t-thâu chin hoaⁿ-hí.

8Lâng oa̍h jōa kú, tio̍h khoài-lo̍k hiah kú; m̄-kú mā tio̍h kì-tit o͘-àm ê ji̍t-chí, in-ūi o͘-àm ê ji̍t-chí ōe chin kú. Beh hoat-seng ê sū lóng sī khang-hu.

Tùi Siàu-liân-lâng ê Khoàn-kò

9Siàu-liân-lâng ah, tio̍h tī nî-khin ê sî hoaⁿ-hí khoài-lo̍k; tī siàu-liân ê ji̍t, chiàu sim só͘ ì-ài, ba̍k-chiu só͘ khòaⁿ--kìⁿ-ê khì chòe; chóng-sī tio̍h chai, ūi-tio̍h che it-chhè, lí tio̍h tùi Siōng-tè hū-chek.

10Tio̍h chiong chhau-hoân tùi lí ê sim sàu-tû, thòng-khó͘ tùi seng-khu tû--khì; in-ūi chheng-chhun bô kú-tn̂g, lóng sī khang-hu.

Thoân-tō-su 11 - 現代台語譯本羅馬字版(TTVR)-闽南语

Learn More About Us