Si-phian 40

Si-phian 40 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Siōng-chàn ê Koa

1Góa nāi-sim thèng-hāu Siōng Chú;

I ū àⁿ hī-khang thiaⁿ góa ê ai-kiû.

2I tùi sí-bông ê hām-khiⁿ, tùi thô͘-bê tiong kā góa khiú--khí-lâi;

I hō͘ góa khiā tī chio̍h-pôaⁿ téng, hō͘ góa ê kha-pō͘ ún-kò͘.

3I kà góa gîm sin ê si, chhiùⁿ-koa o-ló lán ê Siōng-tè;

chin chōe lâng khòaⁿ--tio̍h chiū kèng-ùi lâi sìn-khò Siōng Chú.

4Choan-sim sìn-khò Siōng Chú ê lâng chin ū hok-khì!

I bô pài ngó͘-siōng,

bô kap pài ké-sîn ê lâng chòe-hé.

5Siōng Chú — góa ê Siōng-tè ah, lí ū ūi goán sêng-chiū chin chōe kî-sū;

siáⁿ-lâng ōe-tàng kap lí pí?

Lí ūi goán an-pâi ê kè-ōe hiah-ni̍h chōe,

beh kóng mā kóng bōe liáu.

6Chè-sū kap lé-mi̍h, lí bô kah-ì;

sio-hòa-chè kap sio̍k-chōe-chè, lí mā bô ài.

Lí ū khui góa ê hī-khang thang thiaⁿ,

7só͘-í góa ìn kóng, “Góa tī chia!

Lí tùi góa ê chí-sī lóng kì tī Lu̍t-hoat.

8Góa ê Siōng-tè ah, lí ê chí-ì góa hoaⁿ-hí thiaⁿ-thàn;

lí ê Lu̍t-hoat tī góa sim-lāi.”

9Góa tī tōa chū-hōe tiong soan-iông lí kong-gī ê hó siau-sit;

Siōng chú ah, lí chai góa beh it-ti̍t soan-iông.

10Góa m̄-bat chiong lí ê kong-gī khàm-ba̍t tī sim-lāi;

góa í-keng ū kóng-khí lí ê sìn-si̍t kap kiù-un.

Góa m̄-bat tī tōa chū-hōe tiong am-khàm lí ê chû-ài kap sìn-si̍t.

11Siōng Chú ah, kiû lí m̄-thang tùi góa siu-hôe lí ê chû-pi;

goān lí ê chû-ài kap sìn-si̍t put-sî pó-siú góa.

12In-ūi ū sǹg bōe liáu ê chai-hō ûi-khùn góa;

góa ê chōe-ok jip-tio̍h góa, hō͘ góa ê ba̍k-chiu bōe khòaⁿ--kìⁿ;

chiah-ê chōe-ok pí góa ê thâu-mn̂g khah chōe;

góa oân-choân sit-khì ióng-khì.

Kiû Pang-chān ê Kî-tó(Si 70)

13Siōng Chú ah, kiû lí hoaⁿ-hí chín-kiù góa;

Siōng Chú ah, kiû lí kín lâi pang-chān góa.

14Goān siàu-siūⁿ beh hāi góa sìⁿ-miā ê lâng lóng làu-khùi kiàn-siàu;

goān ài góa siū hām-hāi ê lâng pāi-thè siū lêng-jio̍k.

15Goān tùi góa kóng “Hò͘, lí chhám ah” hiah-ê lâng,

in-ūi kiàn-siàu bia̍t-bông.

16Goān chhē-kiû lí ê lâng lóng in-ūi lí hoaⁿ-hí khoài-lo̍k;

goān him-bō͘ lí chín-kiù ê lâng sî-siông kóng,

“Tio̍h chun Siōng Chú chòe tōa!”

17Chóng-sī góa khùn-khó͘ sàn-chhiah;

Chú iáu-kú siàu-liām góa.

Lí sī góa ê pang-chān, góa ê chín-kiù;

góa ê Siōng-tè ah, kiû lí m̄-thang iân-chhiân.

Si-phian 40 - 現代台語譯本羅馬字版(TTVR)-闽南语

Learn More About Us