Chhut-ai-ki̍p-kì 22

Chhut-ai-ki̍p-kì 22 - 現代台語譯本羅馬字版(TTVR)-闽南语

Pê-siông ê Tiâu-lē

1Siōng Chú tùi Mô͘-se kóng, “Lâng nā thau-khan gû á-sī iûⁿ, bô-lūn sī lia̍h-khì thâi á-sī khan-khì bōe, chi̍t chiah gû tio̍h pê gō͘ chiah, chi̍t chiah iûⁿ tio̍h pê sì chiah.

2-4Chha̍t it-tēng tio̍h pê-siông; nā bô thang pê, i tio̍h bōe-sin lâi pê i thau ê mi̍h-kiāⁿ. I só͘ thau ê gû, lû, á-sī iûⁿ, nā iáu oa̍h--teh, i chiū tio̍h pê têng-pē. Chha̍t nā tī mî--sî ó͘-khang thau-the̍h, hō͘ lâng tú--tio̍h, koh hō͘ lâng phah-sí, phah-sí lâng--ê bô sǹg ū-chōe. Nā ji̍t-thâu í-keng chhut, phah-sí lâng--ê chiū ū-chōe.

5“Lâng pàng cheng-siⁿ tī ka-kī ê hn̂g á-sī phû-tô-hn̂g chia̍h-chháu, nā chhut-chāi in chia̍h pa̍t-lâng hn̂g--ni̍h ê mi̍h, tio̍h ēng ka-kī hn̂g--ni̍h á-sī phû-tô-hn̂g siōng-hó ê chhut-sán pê-siông.

6“Lâng nā khí-hé sio chhì-phè, thòaⁿ kàu koah-liáu ê be̍h-tui, á-sī iáu-bē koah ê be̍h-á, á-sī chhân-hn̂g, khí-hé ê lâng it-tēng tio̍h pê-siông.

7“Lâng chiong gûn á-sī mi̍h-kiāⁿ kià chhù-piⁿ pó-koán, chiah-ê mi̍h-kiāⁿ tī pó-koán ê lâng in tau nā tio̍h-chha̍t-thau, chha̍t-á nā ū lia̍h--tio̍h, chha̍t-á tio̍h pê têng-pē;

8chha̍t-á nā bô lia̍h--tio̍h, hit-ê hō͘ lâng kià ê lâng tio̍h khì sím-phòaⁿ-koaⁿ hia, chèng-bêng i bô the̍h chhù-piⁿ ê mi̍h-kiāⁿ.

9“Koan-hē chhim-chiàm gû, lû, iûⁿ, i-ho̍k, á-sī phah-m̄-kìⁿ mi̍h-kiāⁿ ê sò͘-siōng, nā ū lâng kóng ‘Che sī góa ê’, soah ín-khí hun-cheng, siang-hong tio̍h khì sím-phòaⁿ-koaⁿ hia; sím-phòaⁿ-koaⁿ nā chhâi-koat sím-mi̍h-lâng ū-chōe, hit-ê lâng tio̍h têng-pē pê i ê chhù-piⁿ.

10“Lâng nā chiong gû, iûⁿ, lû, á-sī pa̍t-khoán cheng-siⁿ kià chhù-piⁿ chiàu-kò͘, cheng-siⁿ nā sí--khì, á-sī siū-siong, á-sī hō͘ lâng chhiúⁿ--khì, m̄-kú bô lâng khòaⁿ--tio̍h,

11nn̄g ê lâng tio̍h kàu Siōng Chú bīn-chêng chiù-chōa; siū-thok ê lâng piáu-bêng i bô tāng-tio̍h chhù-piⁿ ê cheng-siⁿ, goân-chú chiū tio̍h chiap-siū, siū-thok ê lâng m̄-bián pê.

12Nā khak-si̍t chai cheng-siⁿ sī hō͘ lâng thau-khan--khì, siū-thok ê lâng tio̍h pê goân-chú.

13Nā-sī hō͘ iá-siù thiah-chhùi, siū-thok ê lâng tio̍h tòa hit-ê si-thé lâi chòe chèng-kù, i chiū m̄-bián pê.

14“Lâng kā chhù-piⁿ chioh cheng-siⁿ khì sú-iōng, cheng-siⁿ nā ū siū-siong á-sī sí--khì, goân-chú bô chāi-tiûⁿ, chioh ê lâng it-tēng tio̍h pê.

15Goân-chú nā ū chāi-tiûⁿ, chioh ê lâng chiū m̄-bián pê; nā-sī cho͘--ê, sún-sit tùi cho͘-kim tú.”

Tō-tek kap Chong-kàu ê Tiâu-lē

16“Lâng nā ín-iú iáu-bē tēng-hun ê chhù-lú kap i chòe-hé khùn, hit-ê lâng tio̍h hù phèng-kim chhōa i chòe bó͘.

17Cha-bó͘ gín-á ê lāu-pē nā kian-chhî m̄ chiong i kè hō͘ hit-ê lâng, chhù-lú ê phèng-kim hit-ê lâng tio̍h chiàu la̍p.

18“Chòe ang-î--ê, m̄-thang hō͘ i oa̍h.

19“Kap siù kau-ha̍p--ê, it-tēng tio̍h hō͘ i sí.

20“Tû-liáu Siōng Chú í-gōa, koh kā pa̍t-ê sîn-bêng hiàn-chè ê lâng, tio̍h kā i tû-bia̍t.

21“M̄-thang khi-hū kià-ku ê lâng, mā m̄-thang ap-chè in; in-ūi lín mā bat kià-ku tī Ai-ki̍p.

22M̄-thang pháiⁿ khoán-thāi ko͘-jî kóaⁿ-hū.

23Lín nā chin-chiàⁿ pháiⁿ khoán-thāi in, in ai-kiò góa, góa it-tēng ōe thiaⁿ in ê ai-kiò,

24beh tùi lín hoat tōa siū-khì, ēng to thâi lín, hō͘ lín ê bó͘ chòe kóaⁿ-hū, lín ê kiáⁿ-jî chòe ko͘-jî.

25“Lí nā chîⁿ chioh hō͘ góa ê chú-bîn tiong-kan ê sàn-chhiah-lâng, m̄-thang chhin-chhiūⁿ pàng-lī ê lâng kā in the̍h lī-sek.

26Lí nā the̍h chhù-piⁿ ê gōa-phàu chòe tí-ah, ji̍t lo̍h í-chêng tio̍h hêng i;

27i chí-ū chit-niá saⁿ thang kah; nā bô, i beh án-chóaⁿ khùn? I nā tùi góa ai-kiû, góa beh thiaⁿ, in-ūi góa sī chû-pi--ê.

28“M̄-thang siat-to̍k Siōng-tè; mā m̄-thang chiù-mē jîn-bîn ê léng-siù.

29“Lí tio̍h chiong siu-sêng ê ngó͘-kok, sin-iû kap sin-chiú hōng-hiàn hō͘ Siōng Chú, m̄-thang iân-tî.

“Lí tio̍h chiong tōa-kiáⁿ hiàn hō͘ góa;

30thâu-chiūⁿ-siⁿ ê gû kap iûⁿ mā tio̍h chiàu án-ni chòe; chhut-sì liáu thang tè i ê bú chhit ji̍t, tē-poeh ji̍t tio̍h kui hō͘ góa.

31“Lín tio̍h chòe góa sèng-kiat ê chú-bîn; tī iá-gōa hō͘ iá-siù thiah-li̍h ê bah, lín m̄-thang chia̍h, tio̍h hiat hō͘ káu chia̍h.”

Chhut-ai-ki̍p-kì 22 - 現代台語譯本羅馬字版(TTVR)-闽南语

Learn More About Us