Í-se-kiat-su 1

Í-se-kiat-su 1 - 現代台語譯本羅馬字版(TTVR)-闽南语

Í-se-kiat Khòaⁿ-kìⁿ Tē-it Ê Īⁿ-siōng(1.1-7.27)Siōng-tè ê Pó-chō

1Tē-saⁿ-cha̍p nî sì-ge̍h chhoe-gō͘, góa kap siū hòng-tio̍k kàu Pa-pí-lûn ê Iû-thài-lâng chòe-hé tòa tī Ka-pa-ló͘ hô-piⁿ. Hit-sî thiⁿ phah-khui, góa khòaⁿ-kìⁿ Siōng-tè ê īⁿ-siōng.

2Chit-ê tāi-chì hoat-seng tī Iok-ngá-kun-ông siū-lia̍h khì Pa-pí-lûn í-āu tē-gō͘ nî.

3Tī Pa-pí-lûn ê Ka-pa-ló͘ hô-piⁿ, Siōng Chú tùi Pò͘-se ê kiáⁿ chè-si Í-se-kiat kóng-ōe; Siōng Chú siúⁿ-sù i khùi-la̍t.

4Góa teh koan-khòaⁿ ê sî, khòaⁿ-kìⁿ tōa-hong tùi pak-pêng sàu--kè-lâi; ū chi̍t tōa-phìⁿ hûn koh ū siám-sih ê hé, hûn ê sì-chiu-ûi kng-iàⁿ-iàⁿ, tùi hit tiong-kan hoat-chhut ê hé chhin-chhiūⁿ ōe sih ê kim-sio̍k hiah-ni̍h kng.

5Tī tiong-ng ū chhut-hiān sì ê oa̍h-mi̍h: In ê hêng-chōng chhin-chhiūⁿ lâng,

6ta̍k-ê lóng ū sì ê bīn, sì ki si̍t;

7in ê kha ti̍t-ti̍t, kha-tôe chhin-chhiūⁿ gû ê tôe, kng-iàⁿ-iàⁿ chhin-chhiūⁿ bôa-kng ê tâng,

8tī ta̍k-ki si̍t-kó͘ ē-bīn ū lâng ê chhiú. Sì ê bīn, sì ki si̍t sī án-ni:

9In ê si̍t lóng saⁿ liân-chiap; hêng-tōng ê sî m̄-bián tńg-sin, lóng ōe-tàng tùi ta̍k-pêng ti̍t-kiâⁿ.

10Sì ê oa̍h-mi̍h kok ū sì khoán bīn: Thâu-chêng ê bīn chhin-chhiūⁿ lâng, chiàⁿ-pêng ê bīn chhin-chhiūⁿ sai, tò-pêng ê bīn chhin-chhiūⁿ gû, āu-bīn ê bīn chhin-chhiūⁿ eng.

11In ê si̍t ǹg téng-bīn thí-khui, ta̍k-ê oa̍h-mi̍h ê nn̄g ki si̍t kap nn̄g pêng ê oa̍h-mi̍h ê si̍t sio-chiap, lēng-gōa nn̄g ki si̍t jia-khàm ka-kī ê seng-khu.

12Ta̍k-ê oa̍h-mi̍h ê bīn hiòng-chêng, chiàu sim-ì chòe-hé hêng-tōng, ti̍t-kiâⁿ m̄-bián tńg-oat.

13Chiah-ê oa̍h-mi̍h ê hêng-chōng chhin-chhiūⁿ teh to̍h ê hé-thòaⁿ, mā chhin-chhiūⁿ hé-pé, hé-iām put-toān tī oa̍h-mi̍h tiong-ng lâi-hôe sóa-ūi tín-tāng; hé chin kng, tùi hé ê tiong-kan hoat-chhut sih-nà.

14Chiah-ê oa̍h-mi̍h chêng-āu chông-lâi-chông-khì, sok-tō͘ chhin-chhiūⁿ sih-nà hiah-ni̍h kín.

15Góa teh koan-khòaⁿ chiah-ê oa̍h-mi̍h ê sî, khòaⁿ-kìⁿ múi chi̍t ê ū sì ê bīn ê oa̍h-mi̍h piⁿ--á lóng ū chi̍t ê lián-á tī thô͘-kha.

16Sì ê lián-á lāi-gōa ê hêng-chōng lóng kâng-khoán, ná-chhin-chhiūⁿ múi chi̍t ê lián-á lāi-bīn koh ū chi̍t ê lián-á; lián-á lóng chhin-chhiūⁿ pó-chio̍h hoat-kng.

17Chit sì ê lián-á tín-tāng ê sî, lóng ōe-tàng ǹg ta̍k-pêng ti̍t-kiâⁿ, m̄-bián tńg-oat.

18Sì ê lián-á ê lián-kheng, koân koh hō͘ lâng kiaⁿ-ùi; kheng ê gōa-piáu lóng sī ba̍k-chiu.

19Chiah-ê oa̍h-mi̍h hêng-tōng ê sî, sì ê lián-á tè tī piⁿ--á tńg-se̍h; oa̍h-mi̍h lī-khui tōe-bīn, lián-á mā lī-khui tōe-bīn.

20Oa̍h-mi̍h ê sim-ì beh khì tó-ūi, lián-á chiū khì tó-ūi, in-ūi oa̍h-mi̍h ê sim-ì khòng-chè lián-á.

21Tng oa̍h-mi̍h hêng-tōng, lián-á mā hêng-tōng; oa̍h-mi̍h thêng--teh, lián-á mā thêng--teh; oa̍h-mi̍h tùi tōe-bīn seng-koân, lián-á mā tùi tōe-bīn seng-koân, in-ūi oa̍h-mi̍h ê sim-ì khòng-chè lián-á.

22Chiah-ê oa̍h-mi̍h ê thâu-khak téng ū kiong-chhong ê hêng-chōng, chhin-chhiūⁿ teh hoat-kng, hiáⁿ-ba̍k ê chúi-chiⁿ tī in ê thâu-khak téng tián-khui.

23Tī kiong-chhong ē-bīn, in ê si̍t ti̍t-ti̍t thí-khui, kap piⁿ--á ê oa̍h-mi̍h ê si̍t saⁿ liân-chiap, múi chi̍t ê oa̍h-mi̍h ēng nn̄g ki si̍t jia-khàm ka-kī ê seng-khu.

24Oa̍h-mi̍h hêng-tōng ê sî, góa thiaⁿ-kìⁿ in ê si̍t hoat-chhut siaⁿ, siaⁿ chhin-chhiūⁿ tōa-chúi hōa-hōa-háu, mā chhin-chhiūⁿ kun-tūi teh chō siaⁿ-sè, koh chhin-chhiūⁿ Choân-lêng Siōng-tè ê siaⁿ. In thêng-chí, khiā--teh ê sî, si̍t chiū sûi--lo̍h-lâi.

25M̄-kú oa̍h-mi̍h thêng--teh, si̍t sûi--lo̍h-khì ê sî, iû-goân ū siaⁿ-im tùi in thâu-khak téng ê kiong-chhong thoân--chhut-lâi.

26Tī oa̍h-mi̍h thâu-khak téng ê kiong-chhong téng-bīn, ū chi̍t ê hêng-chōng chhin-chhiūⁿ ēng nâ-pó-chio̍h chō ê pó-chō; chē tī pó-chō téng--ê, hêng-chōng chhin-chhiūⁿ lâng.

27Góa khòaⁿ-kìⁿ i ê io téng-koân chhin-chhiūⁿ ōe sih ê kim-sio̍k hiah-ni̍h kng, sì-chiu-ûi chhin-chhiūⁿ teh to̍h ê hé; i ê io í-hā chhin-chhiūⁿ hé teh to̍h, sì-bīn hoat-chhut kng.

28Chiu-ûi ê kong-hui chhin-chhiūⁿ lo̍h-hō͘ ê sî hûn-tiong ê khēng kâng-khoán. Che chiū-sī Siōng Chú hián-hiān ê sî êng-kng ê hêng-chōng.

Siōng-tè Soán-tiàu Í-se-kiat Choh Sian-ti

Góa chi̍t-ē khòaⁿ-kìⁿ chit-ê kéng-siōng, chiū phak tī thô͘-kha. Góa koh thiaⁿ-kìⁿ ū lâng teh kóng-ōe ê siaⁿ.

Í-se-kiat-su 1 - 現代台語譯本羅馬字版(TTVR)-闽南语

Learn More About Us