Í-su-la-kì 4

Í-su-la-kì 4 - 現代台語譯本羅馬字版(TTVR)-闽南语

Tiông-kiàn Sèng-tiān Siū Chó͘-tòng

1 Iû-tāi kap Piān-ngá-bín ê tùi-te̍k thiaⁿ-kìⁿ hiah-ê liû-hòng--tò-lâi ê lâng, ūi Siōng Chú — Í-sek-lia̍t ê Siōng-tè khí sèng-tiān,

2chiū lâi kìⁿ Só͘-lô-pa-pek kap ta̍k-cho̍k ê cho̍k-tiúⁿ, kā in kóng, “Chhiáⁿ chún goán kap lín chòe-hé khí, in-ūi goán kap lín kâng-khoán chhē-kiû lín ê Siōng-tè; tùi A-su̍t-ông Í-sat Hap-tùn tòa goán lâi kàu chia í-lâi, goán chiū siông-siông hiàn-chè hō͘ Siōng-tè.”

3M̄-kú Só͘-lô-pa-pek, Iâ-su-a, kap Í-sek-lia̍t kî-tha ê cho̍k-tiúⁿ kā in kóng, “Goán khí goán ê Siōng-tè ê sèng-tiān, bô su-iàu lín pang-chān. Goán sī chiàu Pho-su hông-tè Sài-ló͘-sū tùi goán ê bēng-lēng, beh ka-kī ūi Siōng Chú — Í-sek-lia̍t ê Siōng-tè khí sèng-tiān.”

4Tùi án-ni, tong-tōe ê chū-bîn chiū tī Iû-thài-lâng khí-chō sèng-tiān ê sî kā in khióng-hat, chó͘-tòng in ê kang-thêng.

5Chiah-ê lâng tùi Pho-su hông-tè Sài-ló͘-sū nî-kan, kàu Pho-su hông-tè Tāi-liû-sū chē-ūi ê sî, hóe-lō͘ koaⁿ-oân beh phò-hoāi Iû-thài-lâng khí sèng-tiān ê kè-ōe.

Tiông-kiàn Iâ-lō͘-sat-léng Siū Chó͘-tòng

6 A-hap-sûi-ló͘ hông-tè khai-sí chip-chèng ê sî, ū lâng siá sò͘-chn̄g khòng-kò Iû-tāi kap Iâ-lō͘-sat-léng ê chū-bîn.

7Tī Pho-su hông-tè A-ta̍t-sih-se thóng-tī ê sî, Pí-si-lân, Bí-thê-lī-ta̍t, Tha-pí-le̍k, kap in ê tông-sū, koh siá-phoe hō͘ A-ta̍t-sih-se; phoe ēng A-lân-bûn siá, tha̍k ê sî chiah hoan-e̍k.

8Chóng-tok Lī-hông, su-kì Sin-sòe mā khòng-kò Iâ-lō͘-sat-léng-lâng, siá-phoe hō͘ A-ta̍t-sih-se hông-tè,

9“Chóng-tok Lī-hông, su-kì Sin-sòe, kap kî-tha kâng-tóng--ê, pau-koat hoat-koaⁿ, koaⁿ-oân, kun-koaⁿ, Pho-su koaⁿ-oân, Í-le̍k-lâng, Pa-pí-lûn-lâng, Su-san-lâng, chiū-sī Í-lân-lâng;

10í-ki̍p hō͘ úi-tāi chun-kùi ê A-su-ná-pa chhian-sóa lâi tòa tī Sat-má-lī-a-siâⁿ kap Hô-se-séng ê jîn-bîn, chòe-hé siá-phoe siōng-chàu.”

11Chàu-pún ê lōe-iông sī,

“Lí ê po̍k-jîn, Hô-se-séng ê jîn-bîn siōng-chàu A-ta̍t-sih-se Pho-su hông-tè.

12“Goān hông-siōng cha-bêng, tùi lí hia tò-khì Iû-tāi-tōe ê Iû-thài-lâng, í-keng kàu Iâ-lō͘-sat-léng, tio̍k-chhiú tiông-kiàn chit-ê hoán-poān koh siâ-ok ê siâⁿ; in í-keng khí siâⁿ-chhiûⁿ, hē tōe-ki.

13Goān hông-siōng cha-bêng, chit-ê siâⁿ it-tàn khí hó, siâⁿ-chhiûⁿ oân-kang, in chiū bōe koh chìn-kòng, la̍p-sè, kiáu niû-si̍t; kok-khò͘ ê siu-ji̍p it-tēng ōe kiám-chió.

14Goán siū hông-siōng ê kiong-kip, tio̍h chīn chek-jīm, m̄-ài khòaⁿ-kìⁿ hông-siōng sún-sit, só͘-í pín-pò hō͘ hông-siōng chai.

15Chhiáⁿ chhâ-khó sian-hông ê kì-lio̍k, chiū ōe chai chit-ê siâⁿ sī pōe-poān ê siâⁿ, chiâⁿ-chòe lia̍t-ông kap ta̍k-séng ê siong-hāi. Tùi kó͘-chá, chit-ê siâⁿ siông-siông hoán-poān, só͘-í siū húi-bia̍t.

16Goán kín-sīn khé-chàu hông-siōng, chit-ê siâⁿ nā koh khí-hó, siâⁿ-chhiûⁿ oân-kang, hông-siōng chiū ōe sit-khì Hô-se-séng.”

17Hit-sî, hông-tè chiū hôe-ho̍k chóng-tok Lī-hông, su-kì Sin-sòe, í-ki̍p hiah-ê tòa tī Sat-má-lī-a kap Hô-se-séng ê tông-sū, kóng, “Goān lín pêng-an.

18Lín ê siōng-chàu-bûn, góa ū siông-sè tha̍k--kè.

19Góa í-keng hā-lēng chhâ-khó, chai chit-ê siâⁿ tùi kó͘-chá chiū pōe-poān lia̍t-ông, siông-siông ū bô͘-hoán pōe-ge̍k ê sū.

20Í-chêng bat ū úi-tāi ê kun-ông thóng-tī Iâ-lō͘-sat-léng, koán-lí choân-pō͘ Hô-se tōe-khu, kiò in chìn-kòng, la̍p-sè, kiáu niû-si̍t.

21Taⁿ lín tio̍h bēng-lēng hiah-ê lâng thêng-kang, tû-liáu góa ū kàng-chí, bōe-ēng-tit tiông-kiàn chit-ê siâⁿ.

22Lín tio̍h sûi-sî pān-lí chit-ê sū, m̄-thang so͘-hut, chiah bián hông-tè siū khah-tōa ê sún-sit.”

23 A-ta̍t-sih-se hông-tè ê phoe soan-tho̍k hō͘ chóng-tok Lī-hông, su-kì Sin-sòe, kap in ê tông-sū chai liáu-āu, in chiū kóaⁿ-kín khì Iâ-lō͘-sat-léng, ēng sè-le̍k kiông-pek Iû-thài-lâng thêng-kang.

Hôe-ho̍k Tiông-kiàn Sèng-tiān

24Tùi án-ni Iâ-lō͘-sat-léng Siōng-tè sèng-tiān tiông-kiàn ê kang-thêng chiū thêng-chí, thêng kàu Pho-su hông-tè Tāi-liû-sū chē-ūi ê tē-jī nî.

Í-su-la-kì 4 - 現代台語譯本羅馬字版(TTVR)-闽南语

Learn More About Us