Si-phian 39 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ Iâ-tō͘-tùn.Siū-khó͘ ê Lâng ê Kî-tó

1Góa bat kóng, “Góa beh kín-sīn góa ê giân-hêng,

chiah bián góa ê chi̍h hoān-chōe;

pháiⁿ-lâng tī góa bīn-chêng ê sî,

góa beh ēng chhùi-am iok-sok ka-kī ê chhùi-chi̍h.”

2Góa tiām-tiām bô chhut-siaⁿ,

liân hó-ōe to bô kóng chhut-chhùi;

góa ê thòng-khó͘ chiū ná ke-thiⁿ.

3Góa lāi-sim it-ti̍t sio--khí-lâi,

góa jú siūⁿ hé jú to̍h,

góa chiū khui-chhùi kóng,

4“Siōng Chú ah, kiû lí hō͘ góa chai ka-kī ê kiat-kio̍k,

ka-kī ê nî-hè ū jōa-chōe,

hō͘ góa chai ka-kī ê sìⁿ-miā chin kín chiū bô--khì.

5“Lí hō͘ góa ê ji̍t-chí si̍t-chāi chin té;

góa ê hè-siū tùi lí khòaⁿ--khí-lâi chha-put-to sī bô;

lâng put-kò sī chi̍t ê khùi.

6Lâng teh oa̍h chhin-chhiūⁿ iáⁿ;

in bô-êng-chhih-chhih si̍t-chāi bô-chhái-kang;

in só͘ chek-chū--ê m̄-chai siáⁿ-lâng ōe tit--khì.

7“Chú ah, taⁿ góa tio̍h thèng-hāu sím-mi̍h?

Góa ê ǹg-bāng chāi-tī lí.

8Kiû lí kiù góa thoat-lī góa it-chhè ê kè-sit,

hō͘ góa bián siū gōng-lâng ê lêng-jio̍k.

9In-ūi sī lí hō͘ góa siū-khó͘,

góa chēng-chēng bô khui-chhùi.

10Lí hō͘ góa ê chek-hoa̍t, kiû lí kā góa tû--khì;

in-ūi lí ê chhiú ê tok-chek, góa teh-beh siau-bia̍t.

11Lí chek-hoa̍t lâng, in-ūi in hoān-chōe;

lí hō͘ in só͘ ì-ài--ê chhin-chhiūⁿ tio̍h chiù-thâng hu--khì.

Lâng put-kò sī chi̍t ê khùi.

12“Siōng Chú ah, kiû lí thiaⁿ góa ê kî-tó,

àⁿ hī-khang thiaⁿ góa ê khún-kiû;

góa lâu ba̍k-sái, kiû lí m̄-thang bô chhut-siaⁿ.

Góa sī i-óa lí ê chhut-gōa-lâng,

kap góa ê lia̍t-chó͘ siâng-khoán sī kià-ku--ê.

13Kiû lí khoan-iông góa,

hō͘ góa iáu-bē sí í-chêng tit-tio̍h hoaⁿ-hí khoài-lo̍k.”

Learn More About Us