Si-phian 101 - 現代台語譯本羅馬字版(TTVR)-闽南语

Tāi-pi̍t ê si.Ông tùi Siōng-tè Hē-goān

1Góa beh chhiùⁿ chû-ài kap kong-gī ê koa;

Siōng Chú ah, góa beh siōng-chàn lí.

2Góa beh kín-sīn kiâⁿ chèng-ti̍t ê lō͘;

lí sím-mi̍h sî chiah beh lâi góa chia?

Góa beh ēng chèng-ti̍t ê sim tī kiong-lāi seng-oa̍h.

3Hā-chiān ê sū, góa lóng m̄ khòaⁿ;

pōe-ge̍k Siōng-tè ê lâng ê só͘-chòe, góa chin iàm-ò͘ⁿ;

góa m̄ hō͘ i bak--tio̍h.

4Oan-khiau ê sim-su, góa lóng bô ài;

it-chhè ê pháiⁿ-tāi, góa lóng kū-choa̍t.

5Àm-tiong húi-pòng chhù-piⁿ ê lâng, góa beh kā i húi-bia̍t;

ba̍k-thâu-koân, sim kiau-ngō͘ ê lâng, góa bōe iông-ún.

6Góa beh koàn-kò͘ kok-lāi tiong-si̍t ê lâng, hō͘ in kap góa chòe-hé tòa;

góa beh hō͘ kiâⁿ chèng-ti̍t ê lō͘ ê lâng ho̍k-sāi góa.

7Khúi-chà ê lâng bōe-ēng-tit tòa góa ê kiong-lāi;

pe̍h-chha̍t ê lâng bōe-ēng-tit khiā tī góa ê ba̍k-chiu chêng.

8Ta̍k chá-khí góa beh húi-bia̍t kok-lāi ê pháiⁿ-lâng,

chiong só͘-ū chòe pháiⁿ ê lâng tùi Siōng Chú ê siâⁿ siau-tû.

Learn More About Us