Iok-ní-su 1

Iok-ní-su 1 - 現代台語譯本羅馬字版(TTVR)-闽南语

1Ē-bīn sī Siōng Chú tùi Pí-thó͘-ní ê kiáⁿ Iok-ní kóng ê ōe:

Ūi-tio̍h Lông-chok-bu̍t Sún-hāi Ai-siong

2Lāu-lâng ah, tio̍h thiaⁿ!

Chit só͘-chāi ê chū-bîn ah, lóng tio̍h chù-ì thiaⁿ!

Tī lín ê ji̍t, á-sī lín lia̍t-chó͘ ê ji̍t,

kiám bat hoat-seng chit-khoán tāi-chì?

3Tio̍h chiong chit-ê tāi-chì thoân hō͘ lín ê kiáⁿ-jî,

kiáⁿ-jî thoân hō͘ sun,

sun thoân hō͘ hō͘-tāi.

4Tōa-chiah chháu-meh chia̍h chhun--ê, chháu-meh lâi chia̍h;

chháu-meh chia̍h chhun--ê, chháu-meh-á-kiáⁿ lâi chia̍h;

chháu-meh-á-kiáⁿ chia̍h chhun--ê, chháu-meh-kong lâi chia̍h.

5Chiú-chùi ê lâng ah, tio̍h chhíⁿ, tio̍h khàu;

hò͘ⁿ-chiú ê lâng ah, tio̍h ūi-tio̍h sin-chiú ai-khàu;

in-ūi lín bô koh ū chiú thang lim lah.

6Ū chi̍t kûn chháu-meh lâi chhim-hoān góa ê tōe,

kiông-béng, sò͘-bo̍k sǹg bōe liáu;

in ê khí chhin-chhiūⁿ sai-kang ê khí,

in ê gê chhin-chhiūⁿ sai-bú ê gê;

7in húi-hoāi góa ê phû-tô-chhiū,

kā góa ê bû-hoa-kó-chhiū ê chhiū-phê pak kah kng-liu-liu,

pàng-teh hō͘ sí.

8Lí tio̍h ai-khàu, chhin-chhiūⁿ siàu-lú io hâ môa-pò͘,

ūi-tio̍h i tī siàu-liân ê sî sit-khì bī-hun-hu ai-khàu.

9Siōng Chú ê tiān bô sò͘-chè kap tiān-chiú-chè thang hiàn;

ho̍k-sāi Siōng Chú ê chè-si mā ai-khàu.

10Chhân-hn̂g hong-hòe,

tōe pi-ai;

in-ūi ngó͘-kok húi-hoāi,

sin-chiú ta--khì,

iû khiàm-kheh.

11Choh-sit-lâng ah, tio̍h kiàn-siàu;

chai-chèng phû-tô ê lâng ah, tio̍h ai-khàu,

in-ūi tōa-be̍h sió-be̍h kap chhân-hn̂g ê siu-sêng lóng bô--khì.

12Phû-tô-chhiū ta--khì, bû-hoa-kó-chhiū ko͘-tâ,

sia̍h-liû-chhiū, iâ-chó-chhiū, phōng-kó-chhiū, liân chhân-iá it-chhè ê chhiū-ba̍k lóng ko͘-tâ;

jîn-kan ê khoài-lo̍k mā lóng siau-sit.

13Chè-si ah, tio̍h hâ môa-pò͘ thî-khàu;

tī chè-tôaⁿ ho̍k-sāi ê lâng ah, tio̍h ai-khàu;

chòe góa ê Siōng-tè chhe-ēng ê lâng ah, tio̍h lâi, chhēng môa-saⁿ kè-mî;

in-ūi bô lâng the̍h sò͘-chè kap tiān-chiú-chè

lâi lín ê Siōng-tè ê tiān hōng-hiàn.

14Lín tio̍h siat chi̍t ê sèng-ji̍t lâi kìm-chia̍h,

tiàu-chi̍p giâm-siok-hōe,

chio-chi̍p sī-tōa, kap kok-lāi só͘-ū ê chū-bîn

lâi Siōng Chú — lín ê Siōng-tè ê tiān,

tùi Siōng Chú ai-kiû.

15Hit-ji̍t lín chhám ah!

In-ūi Siōng Chú ê ji̍t kūn lah,

Choân-lêng-chiá beh lâi húi-bia̍t lah.

16Niû-si̍t tī lán ê ba̍k-chiu chêng toān-choa̍t lah!

Hoaⁿ-hí khoài-lo̍k tī lán Siōng-tè ê tiān siau-sit lah!

17Chéng-chí tī thô͘--ni̍h nōa--khì;

chhng-khò͘ hong-hòe, chhek-chhng tó-hoāi,

in-ūi bô ngó͘-kok thang siu-sêng.

18Cheng-siⁿ háu kah chin chhiⁿ-chhám,

gû-kûn loān-loān-chông,

in-ūi bô chháu;

iûⁿ-kûn mā siū-khó͘.

19Siōng Chú ah, góa kiû-kiò lí,

in-ūi hé sio-bia̍t khòng-iá ê chháu-po͘,

hé-iām sio-chīn chhân-iá ê chhiū-ba̍k.

20Chhân-iá ê cháu-siù mā tùi lí ai-kiò,

in-ūi khoe-chúi ta--khì,

hé sio-bia̍t khòng-iá ê chháu-po͘.

Iok-ní-su 1 - 現代台語譯本羅馬字版(TTVR)-闽南语

Learn More About Us