Sat-ka-lī-a-su 7

Sat-ka-lī-a-su 7 - 現代台語譯本羅馬字版(TTVR)-闽南语

Chek-pī Hu-ké ê Kìm-chia̍h

1 Tāi-liû-sū chòe Pho-su Hông-tè tē-sì nî káu--ge̍h, chiū-sī Ki-su-liû-ge̍h chhoe-sì, Siōng Chú tùi Sat-ka-lī-a kóng-ōe.

2Hit-sî, Pek-te̍k-lī-lâng í-keng chhe Sa-lī-sek kap Lī-kian Bí-le̍k, í-ki̍p tè in ê lâng khì khún-kiû Siōng Chú si-un.

3In mn̄g Siōng Chú — Bān-kun ê Thóng-sòe sèng-tiān ê chè-si í-ki̍p sian-ti kóng, “Chin chōe nî lâi, goán tī gō͘--ge̍h lóng ū teh ai-siong kìm-chia̍h, hiān-chāi kiám tio̍h koh án-ni chòe?”

4Siōng Chú — Bān-kun ê Thóng-sòe tùi góa kóng,

5“Lí tio̍h kā chit só͘-chāi ê jîn-bîn kap chè-si kóng, ‘Lín chhit-cha̍p nî kú, tī gō͘--ge̍h, chhit--ge̍h ai-siong kìm-chia̍h, kiám chin-chiàⁿ sī ūi-tio̍h góa?

6Lín chia̍h lín lim, kiám m̄-sī ūi-tio̍h lín ka-kī?

7Iâ-lō͘-sat-léng kap chiu-ûi ê siâⁿ jîn-kháu chōe koh hoân-êng, lâm-pêng ê khòng-iá kap sai-pêng ê soaⁿ-po͘ ū lâng khiā-khí ê sî, Siōng Chú kau-tài í-chêng ê sian-ti soan-iông--ê, kiám m̄-sī siâng-khoán chiah-ê ōe?’”

Pōe-ge̍k Tì-kàu Liû-hòng

8Siōng Chú koh tùi Sat-ka-lī-a kóng,

9“Siōng Chú — Bān-kun ê Thóng-sòe ū án-ni kóng, ‘Lín sím-phòaⁿ tio̍h chiàu chin-si̍t kong-chèng; tio̍h ēng chû-ài lîn-bín saⁿ tùi-thāi.

10M̄-thang khi-hū ko͘-jî, kóaⁿ-hū, tòa tī lín tiong-kan ê gōa-cho̍k-lâng, kap sàn-chhiah-lâng; m̄-thang kè-bô͘ pháiⁿ-tāi, hō͘-siōng hām-hāi.’

11“M̄-kú in oa̍t-tńg-sin, m̄-khéng thiaⁿ-thàn,

12koh hō͘ ka-kī ê sim ngī kah chhin-chhiūⁿ soān-chio̍h hiah-ni̍h tēng, m̄-khéng thiaⁿ-thàn lu̍t-hoat, m̄ thiaⁿ góa Siōng Chú — Bān-kun ê Thóng-sòe thong-kè I ê sîn chhe-khián í-chêng ê sian-ti thoân-ta̍t ê ōe; só͘-í, góa Siōng Chú — Bān-kun ê Thóng-sòe hoat tōa siū-khì,

13in-ūi góa ū kiò, in m̄ thiaⁿ. Góa Siōng Chú — Bān-kun ê Thóng-sòe kóng, ‘Án-ni, in kiû-kiò, góa mā m̄ thiaⁿ.

14Góa beh ēng kńg-lê-á-hong kā in chhe-sòaⁿ, chhe khì in m̄-bat ê lia̍t-kok hia. In lī-khui liáu-āu, chit-ê tōe chiū hong-hòe, bô lâng chhut-ji̍p; in hō͘ pûi-súi ê tōe pìⁿ-chòe hong-po͘.’”

Sat-ka-lī-a-su 7 - 現代台語譯本羅馬字版(TTVR)-闽南语

Learn More About Us