Ngá-ko 7 - 現代台語譯本羅馬字版(TTVR)-闽南语

(Lâm)

1Chun-kùi ê cha-bó͘ gín-á, lí chhēng-ôe ê kha ná hiah súi!

Lí tōa-thúi ê khiok-sòaⁿ, súi chhin-chhiūⁿ chu-pó,

sī gē-su̍t-ka ê kia̍t-chok.

2Lí ê tō͘-châi chhin-chhiūⁿ poe îⁿ-îⁿ,

ū tiâu-hô ê chiú put-sî móa-kîⁿ.

Lí ê pak-tó͘ chhin-chhiūⁿ kui-tui ê be̍h,

ū pek-ha̍p-hoe ûi--teh.

3Lí nn̄g lia̍p lin chhin-chhiūⁿ chi̍t tùi lo̍k-á,

chhin-chhiūⁿ lo̍k-bú ê siang-siⁿ-kiáⁿ.

4Lí ê ām-kún chhin-chhiūⁿ chhiūⁿ-gê ê thah,

ba̍k-chiu chhin-chhiūⁿ Hi-si̍t-pún ê chúi-tî,

tī Pa-te̍k La-pèng ê siâⁿ-mn̂g piⁿ.

Lí ê phīⁿ chhin-chhiūⁿ Lê-pa-lūn ê thah, bīn ǹg Tāi-má-sū-kek.

5Lí ê thâu gia̍h-koân-koân chhin-chhiūⁿ Ka-bi̍t-soaⁿ,

sûi--lo̍h-lâi ê thâu-mn̂g sī chí-sek,

ông ê sim hō͘ i tîⁿ--teh.

6Góa sim-ài--ê, lí ná hiah súi, hiah khó-ài,

ná hiah-ni̍h hō͘ lâng ì-ài!

7Lí ê sin-châi chhin-chhiūⁿ iâ-chó-chhiū;

lí ê lin chhin-chhiūⁿ kui-pha ê ké-chí.

8Góa kóng: Góa beh peh-khí-khì chit-châng iâ-chó-chhiū bán ké-chí.

Goān lí ê lin chhin-chhiūⁿ kui-pha ê phû-tô,

lí ê khùi chhin-chhiūⁿ phōng-kó hiah-ni̍h phang,

9lí ê chhùi chhin-chhiūⁿ siōng-hó ê chiú.

(Lú)

Goān hit-ê chiú lâu-ji̍p góa chhin-ài--ê ê chhùi,

lim-liáu ku̍t-âu.

10Góa sio̍k góa chhin-ài--ê,

i só͘ loân-bō͘--ê sī góa.

11Góa chhin-ài--ê ah, lâi, lán lâi-khì iá-gōa,

lâi-khì chng-kha hioh-mî.

12Lán thàu-chá khí--lâi, lâi-khì phû-tô-hn̂g,

khòaⁿ phû-tô puh-íⁿ khui-hoe á bē,

sia̍h-liû khui-hoe á bē;

tī hia góa beh chiong ài-chêng hiàn hō͘ lí.

13Chhui-chêng-kó chhut phang-bī;

tī lán ê mn̂g-piⁿ ū ta̍k-khoán chin hó ê ké-chí,

sin--ê kū--ê lóng ū;

Góa chhin-ài--ê, che lóng sī góa kā lí pó-chûn--ê.

Learn More About Us