Si-phian 106

Si-phian 106 - 現代台語譯本羅馬字版(TTVR)-闽南语

Siōng Chú Un-thāi I ê Chú-bîn

1Ha-lé-lú-iah, chheng-chàn Siōng Chú!

Tio̍h kám-siā Siōng Chú, in-ūi I chì-siān;

I ê chû-ài sòa kàu éng-oán!

2Siáⁿ-lâng ōe-hiáu kóng-khí Siōng Chú ê tōa koân-lêng?

Siáⁿ-lâng ōe-tàng oân-choân piáu-bêng tùi I ê chheng-chàn?

3Só͘-ū ûi-hō͘ kong-pêng,

put-sî si̍t-chián kong-gī ê lâng chin ū hok-khì!

4Siōng Chú ah, lí un-thāi lí chú-bîn ê sî, kiû lí ōe-kì-tit góa;

lí chín-kiù in ê sî, kiû lí koàn-kò͘ góa.

5Kiû lí hō͘ góa khòaⁿ-kìⁿ lí ê soán-bîn heng-ōng,

hō͘ góa kap lí ê kok-bîn hun-hióng khoài-lo̍k,

kap lí ê chú-bîn chòe-hé khoa-iāu.

6Goán kap goán ê chó͘-sian kâng-khoán ū hoān-chōe;

goán phian-lī chiàⁿ-lō͘ chòe pháiⁿ.

7Goán ê chó͘-sian tī Ai-ki̍p bô bêng-pe̍k lí só͘ chòe ê kî-sū,

bōe-kì-tit lí hong-sēng ê chû-ài,

hoán-tńg tī Âng-hái pōe-poān lí.

8M̄-kú Chú, in-ūi I ê miâ ê iân-kò͘, kái-kiù in,

beh hián-bêng I ê tōa koân-lêng.

9I chi̍t-ē hoah Âng-hái, hái chiū ta--khì;

I chhōa in keng-kè hái chhim ê só͘-chāi, ná teh keng-kè ta-tōe.

10I kiù in thoat-lī oàn-hūn in ê lâng ê chhiú,

tùi tùi-te̍k ê chhiú-tiong kái-kiù in.

11In ê tùi-te̍k lóng hō͘ chúi im-ba̍t,

liân chi̍t ê to bô lâu--teh.

12Hit-chūn, in chiah sìn I ê ōe,

chiah chhiùⁿ-koa chheng-chàn I.

13In chin kín chiū bōe-kì-tit I ê só͘-chòe,

bô thèng-hāu I ê chí-sī.

14In tī khòng-iá tōa-tōa khí tham-io̍k,

tī hong-po͘ chhì-thàm Siōng-tè.

15In só͘ kiû--ê, I ū hō͘ in,

m̄-kú mā hō͘ in lóng soe-lám siau-sán.

16In tī iâⁿ-tiong oàn-tò͘ Mô͘-se

kap Siōng Chú sèng-pia̍t ê A-lûn.

17Tōe chiū li̍h--khui, thun-bia̍t Tāi-tan,

am-ba̍t A-pí-lân hit-kûn lâng.

18Ū hé tī in tiong-kan to̍h--khí-lâi,

hé-iām sio-bia̍t hiah-ê pháiⁿ-lâng.

19In tī Hô-lia̍t-soaⁿ chō gû-á,

phak-pài só͘ chù ê siōng.

20Án-ni, in ēng chia̍h-chháu ê gû-á chòe siōng,

thòe-ōaⁿ Siōng-tè ê êng-kng.

21In bōe-kì-tit kā in chín-kiù ê Siōng-tè;

I bat tī Ai-ki̍p chòe tōa tāi-chì,

22tī Hâm ê tōe kiâⁿ kî-sū,

tī Âng-hái chòe thang-kiaⁿ ê sū.

23Só͘-í, I kóng beh kā in siau-bia̍t;

nā m̄-sī I só͘ kéng-soán ê Mô͘-se khiā tī I bīn-chêng ke̍k-le̍k sin-sò͘,

siau-tû I ê siū-khì, I í-keng kā in siau-bia̍t lah.

24In khòaⁿ-khin hit-ê hó ê tōe,

m̄ sìn I ê ōe;

25in tī ka-kī ê pò͘-pîⁿ lāi bâi-oàn,

m̄ thiaⁿ-thàn Siōng Chú ê ōe.

26Só͘-í I tùi in gia̍h-chhiú li̍p-sè,

beh hō͘ in sí tī khòng-iá;

27hō͘ in ê kiáⁿ-sun sí tī gōa-kok,

sì-sòaⁿ tī ta̍k só͘-chāi.

28In tàu-tīn khì pài Pí-ní ê Pa-le̍k,

chia̍h hiàn hō͘ bô sìⁿ-miā ê sîn-bêng ê chè-mi̍h.

29In án-ni chòe, jiá-khí I ê siū-khì,

chiū ū un-e̍k tī in tiong-kan thoân-jiám.

30Hit-sî Hui-nî-hap khí-lâi thòe in pâi-kái,

un-e̍k chiū soah.

31Chit-ê tāi-chì Siōng-tè kā i sǹg-chòe gī,

tùi hit-sî khí, ti̍t-kàu éng-oán.

32In tī Bí-lī-pa ê chúi-chôaⁿ piⁿ koh jiá Siōng Chú siū-khì,

ūi-tio̍h in ê iân-kò͘, Mô͘-se siū liân-lūi;

33in-ūi in pōe-poān Siōng-tè,

tì-kàu Mô͘-se kóng-chhut chhong-pōng ê ōe.

34In bô thiaⁿ-thàn Siōng Chú ê hoan-hù,

bô châu-bia̍t gōa-cho̍k ê peh-sìⁿ;

35hoán-tńg kap gōa-pang-lâng thong-hun,

o̍h in ê só͘-chòe,

36ho̍k-sāi in ê ngó͘-siōng;

kiat-kó ka-kī poa̍h-lo̍h hām-chíⁿ.

37In chiong kiáⁿ, cha-bó͘-kiáⁿ chòe chè-mi̍h hiàn hō͘ kúi-sîn;

38in lâu bô chōe ê lâng ê huih, thâi ka-kī ê kiáⁿ, cha-bó͘-kiáⁿ,

chiong in chòe chè-mi̍h hiàn hō͘ Ka-lâm ê ngó͘-siōng,

hit-ê tōe chiū siū-tio̍h huih ù-jiám.

39Án-ni, in siū ka-kī ê hêng-ûi ù-jiám,

in ê só͘-chòe hoān-tio̍h îm-hēng.

40Só͘-í, Siōng Chú tùi I ê chú-bîn hoat siū-khì,

iàm-ò͘ⁿ I ê sán-gia̍p Í-sek-lia̍t.

41I chiong in kau tī gōa-pang-lâng ê chhiú,

hō͘ oàn-hūn in ê lâng koán-hat in.

42In ê tùi-te̍k ap-chè in,

in chiū khut-ho̍k tī tùi-te̍k ê chhiú-ē.

43Siōng Chú chi̍t-piàn koh chi̍t-piàn kái-kiù in;

m̄-kú in kò͘-ì pōe-ge̍k I,

in-ūi ka-kī ê chōe-ok tì-kàu tūi-lo̍h.

44I thiaⁿ-tio̍h in ê ai-kiò,

thé-thiap in ê khùn-khó͘.

45I ūi-tio̍h in siūⁿ-khí I ê iok,

in-ūi hong-sēng ê chû-ài hôe-sim-tńg-ì,

46hō͘ in tit-tio̍h só͘-ū lia̍h in ê lâng ê lîn-bín.

47Siōng Chú — goán ê Siōng-tè ah, kiû lí chín-kiù goán,

chū-chi̍p goán, chhōa goán tùi lia̍t-kok tńg--lâi,

hō͘ goán thang kám-siā lí ê sèng-miâ,

ēng chheng-chàn lí chòe goán siōng-tōa ê hoaⁿ-hí.

48Goān chheng-chàn kui hō͘ Siōng Chú — Í-sek-lia̍t ê Siōng-tè,

tùi éng-oán kàu éng-oán.

Goān choân-thé jîn-bîn lóng kóng: Amen!

Ha-lé-lú-iah, chheng-chàn Siōng Chú!

Si-phian 106 - 現代台語譯本羅馬字版(TTVR)-闽南语

Learn More About Us