Si-phian 56

Si-phian 56 - 現代台語譯本羅馬字版(TTVR)-闽南语

Tāi-pi̍t ê kim-si, tī Ka-te̍k hō͘ Hui-lī-sū-lâng lia̍h--tio̍h ê sî chòe--ê, kau hō͘ sèng-ga̍k-tiúⁿ; tiāu, ēng “Hn̄g-hn̄g Bô Siaⁿ ê Hún-chiáu”.Sìn-khò Siōng-tè ê Kî-tó

1Siōng-tè ah, kiû lí lîn-bín góa, in-ūi lâng thún-ta̍h góa,

kui-ji̍t kong-kek ap-chè góa.

2Góa ê tùi-te̍k kui-ji̍t thún-ta̍h góa;

Chì-koân ê Siōng-tè ah, kong-kek góa ê lâng chin chōe.

3Góa kiaⁿ-hiâⁿ ê sî, góa beh óa-khò lí.

4Góa óa-khò Siōng-tè, góa beh chheng-chàn I èng-ún ê ōe;

óa-khò Siōng-tè, góa chiū bô kiaⁿ.

Ōe-sí ê lâng ōe-tàng kā góa án-chóaⁿ?

5In kui-ji̍t oai-khiok góa ê ōe,

só͘ siūⁿ--ê lóng sī beh hāi góa.

6In chū-chi̍p, bâi-ho̍k, teh siòng góa ê kha-pō͘,

tng-tán beh hāi góa ê sìⁿ-miā.

7In chòe pháiⁿ kiám ōe-tàng tô-thoat?

Siōng-tè ah, kiû lí hoat siū-khì hō͘ chiah-ê tùi-te̍k khut-ho̍k.

8Góa ê pi-siong, lí ū kì-lio̍k;

kiû lí chiong góa ê ba̍k-sái siu tī lí ê phê-tē.

Chiah-ê kiám bô lóng kì tī lí ê chheh?

9Góa kiû-kiò ê sî, tùi-te̍k lóng ōe oa̍t-tńg-sin thè--khì;

góa chai, Siōng-tè ūi góa.

10Góa óa-khò Siōng-tè, góa beh chheng-chàn I èng-ún ê ōe;

góa óa-khò Siōng Chú, góa beh o-ló I ê ōe.

11Góa óa-khò Siōng-tè, góa chiū bōe kiaⁿ;

lâng ōe-tàng kā góa án-chóaⁿ?

12Siōng-tè ah, góa beh chiàu góa ǹg lí só͘ hē ê goān,

tùi lí hiàn siā-un ê chè.

13In-ūi lí ū kiù góa ê sìⁿ-miā thoat-lī sí-bông,

pó-hō͘ góa ê kha bô poa̍h-tó,

hō͘ góa tit-tio̍h oa̍h-miā ê kng ín-chhōa, kiâⁿ tī lí bīn-chêng.

Si-phian 56 - 現代台語譯本羅馬字版(TTVR)-闽南语

Learn More About Us