Si-phian 34 - 現代台語譯本羅馬字版(TTVR)-闽南语

Tāi-pi̍t ê si. I tī A-pí-bí-le̍k bīn-chêng ké hong-tian, siū kóaⁿ--chhut-khì ê sî chòe ê si.Kám-siā Siōng Chú ê Pó-hō͘

1Góa beh put-sî chheng-chàn Siōng Chú;

góa ê chhùi beh siông-siông o-ló I.

2Góa ê sim-sîn beh khoa-kháu Siōng Chú;

khùn-khó͘ ê lâng thiaⁿ--kìⁿ mā ōe hoaⁿ-hí.

3Tio̍h kap góa chheng-chàn Siōng Chú chòe tōa,

chòe-hé chun-chông I ê miâ.

4Góa kiû-kiò Siōng Chú, I ū ìn góa,

kiù góa thoat-lī it-chhè ê kiaⁿ-hiâⁿ.

5Gióng-bōng I ê lâng bīn ū kong-chhái, sim khoài-lo̍k;

in éng-oán bōe tì-kàu kiàn-siàu sit-bāng.

6Sàn-chhiah-lâng kiû-kiò, Siōng Chú ū thiaⁿ--kìⁿ,

kiù i thoat-lī it-chhè ê kan-lân.

7Siōng Chú ê sù-chiá tī kèng-ùi I ê lâng ê sì-ûi chat-iâⁿ,

kiù in thoat-chhut khùn-kéng.

8Chhin-sin thé-giām, chiū chai Siōng Chú chin hó;

chhē I chòe pī-lān-só͘ ê lâng chin ū hok-khì.

9Siōng Chú sèng ê chú-bîn ah, tio̍h kèng-ùi I,

in-ūi kèng-ùi I ê lâng lóng bô khiàm-kheh.

10Siàu-chòng ê sai mā ōe khiàm-kheh, ōe iau,

m̄-kú chhē-kiû Siōng Chú ê lâng sím-mi̍h hó-mi̍h to bô khiàm.

11Sòe-kiáⁿ ah, tio̍h lâi thiaⁿ,

góa beh kà-sī lín kèng-ùi Siōng Chú.

12Lín tiong-kan siáⁿ-lâng ì-ài sìⁿ-miā,

ài tn̂g-hè-siū thang hióng-hok?

13Tio̍h kìm ka-kī ê chi̍h bô kóng pháiⁿ-ōe,

kìm-chí chhùi-tûn bô kóng khúi-chà.

14Tio̍h kū-choa̍t pháiⁿ, chòe hó-sū,

jia̍t-sim tui-kiû hô-pêng.

15Siōng Chú ê ba̍k-chiu khòaⁿ-kò͘ gī-lâng;

I ê hī-khang thiaⁿ in ê kî-tó.

16Siōng Chú tùi choh-pháiⁿ ê lâng pìⁿ-bīn,

tùi sè-kan chhat-siau in ê miâ.

17Siōng Chú thiaⁿ gī-lâng ê kiû-kiò,

kiù in thoat-lī it-chhè ê kan-lân.

18Siōng Chú chhin-kūn sim-lêng phò-chhùi ê lâng,

chín-kiù sim thòng-hóe ê lâng.

19Gī-lâng ū chin chōe khó͘-lān,

m̄-kú Siōng Chú kiù in lóng thoat-lī.

20Siōng Chú pó-choân in lóng-chóng ê kut-thâu,

chi̍t ki to bô phah-chi̍h.

21Chōe-ok ōe hāi-sí pháiⁿ-lâng;

oàn-hūn gī-lâng--ê, ōe siū tēng-chōe.

22Siōng Chú kiù-sio̍k I ê po̍k-jîn;

óa-khò I ê lâng liân chi̍t ê to bōe siū tēng-chōe.

Learn More About Us