Iâ-lī-bí-su 52

Iâ-lī-bí-su 52 - 現代台語譯本羅馬字版(TTVR)-闽南语

Iâ-lō͘-sat-léng Lûn-hām(2 Ông 24.18-25.7; 2 Tāi 36.11-21)

1 Se-tí-ka chē-ūi ê sî jī-cha̍p-it hè, tī Iâ-lō͘-sat-léng choh-ông cha̍p-it nî. I ê lāu-bú kiò-chòe Hap-bō͘-tha, sī Li̍p-ná-lâng Iâ-lī-bí ê cha-bó͘-kiáⁿ.

2I chòe Siōng Chú khòaⁿ-chòe pháiⁿ ê sū, chiàu Iok-ngá-kèng ê só͘-chòe khì chòe.

3Iâ-lō͘-sat-léng kap Iû-tāi hoat-seng chiah-ê sū, sī in-ūi Siōng Chú hoat siū-khì, tùi I ê bīn-chêng kā in kóaⁿ--chhut-khì.

Se-tí-ka pōe-poān Pa-pí-lûn-ông.

4Se-tí-ka thóng-tī tē-káu nî, cha̍p-ge̍h chhoe-cha̍p, Pa-pí-lûn-ông Nî-pò͘-kah-nî-sat chhōa i ê tāi-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-siâⁿ.

5Siâⁿ siū ûi-khùn, it-ti̍t kàu Se-tí-ka-ông tē-cha̍p-it nî.

6Sì-ge̍h chhoe-káu, siâⁿ-lāi ki-hng chin giâm-tiōng, chū-bîn lóng bô mi̍h thang chia̍h,

7siâⁿ siū kong-phòa; só͘-ū ê peng-sū thàu-mî tùi ông-kiong hoe-hn̂g hù-kūn, nn̄g ê siâⁿ-chhiûⁿ tiong-kan ê mn̂g hit-tiâu lō͘ tô-cháu. Pa-pí-lûn kun-tūi iáu tī sì-ûi kong-siâⁿ ê sî, in ǹg A-la-pa ê hong-hiòng tô-cháu.

8Pa-pí-lûn ê kun-peng tui-jip Se-tí-ka-ông, tī Iâ-lī-ko ê pêng-goân jip-tio̍h i; i ê choân-kun lóng khì-sak i sì-sòaⁿ.

9Pa-pí-lûn ê kun-peng lia̍h-tio̍h Se-tí-ka, kā i lia̍h-khì Hap-má tōe-khu ê Lī-pí-la ê Pa-pí-lûn-ông hia, tī hia siū sím-phòaⁿ.

10Pa-pí-lûn-ông thâi-sí Se-tí-ka ê kiáⁿ, hō͘ i chhin-ba̍k khòaⁿ--tio̍h, koh tī Lī-pí-la thâi Iû-tāi só͘-ū ê kùi-cho̍k.

11Koh ó͘ i nn̄g lúi ba̍k-chiu, ēng tâng-liān kā i liān--teh, tòa i khì Pa-pí-lûn, kā i koaiⁿ tī kaⁿ--ni̍h, ti̍t-kàu i sí hit-ji̍t.

Sèng-tiān Siū Húi-hoāi(2 Ông 25.8-17)

12 Pa-pí-lûn-ông Nî-pò͘-kah-nî-sat tē-cha̍p-káu nî, gō͘-ge̍h chhoe-chhit, Pa-pí-lûn-ông ê jîn-sîn sī-ōe-tiúⁿ Nî-pò͘-sat-la-tàn chìn-ji̍p Iâ-lō͘-sat-léng,

13ēng hé sio Siōng Chú ê sèng-tiān, ông-kiong, kap Iâ-lō͘-sat-léng só͘-ū ê chhù, í-ki̍p só͘-ū kùi-cho̍k ê chhù.

14Tè sī-ōe-tiúⁿ ê Pa-pí-lûn kun-peng chiong Iâ-lō͘-sat-léng sì-ûi ê siâⁿ-chhiûⁿ lóng thiah-húi.

15Hit-sî, sī-ōe-tiúⁿ Nî-pò͘-sat-la-tàn chiong bîn-kan sòng-hiong-lâng, lâu tī siâⁿ-lāi só͘ chhun ê jîn-bîn, kap tâu-hâng Pa-pí-lûn-ông ê lâng, í-ki̍p só͘ chhun ê sai-hū lóng lia̍h--khì.

16M̄-kú sī-ōe-tiúⁿ Nî-pò͘-sat-la-tàn ū lâu chi̍t-kóa siōng sòng-hiong--ê, hō͘ in tī phû-tô-hn̂g kap chhân-hn̂g chèng-choh.

17 Pa-pí-lûn-lâng chiong Siōng Chú tiān-lāi ê tâng-thiāu, phûn-chō, kap tâng-hái lóng phah-phòa, chiong hiah-ê tâng ūn-khì Pa-pí-lûn.

18In mā chiong tiáⁿ, thuh-á, teng-sim ê chián-to, óaⁿ-pôaⁿ-á, khǹg hiuⁿ ê phiat-á, kap sèng-tiān só͘-ū tâng ê khì-khū lóng poaⁿ--khì;

19poe, khǹg hé-thòaⁿ ê phûn, pôaⁿ, tiáⁿ, teng-tâi, khǹg hiuⁿ ê phiat-á, au-á, só͘-ū kim-khì ê kim, gûn-khì ê gûn, sī-ōe-tiúⁿ lóng the̍h--khì.

20Koh chiong Só͘-lô-bûn-ông ūi Siōng Chú ê tiān só͘ chō nn̄g ki thiāu, chi̍t ê tâng-hái, kap chō-ē cha̍p-jī chiah tâng-gû tòa--khì; chiah-ê khì-khū ê tâng chōe kah bōe-chhìn--tit.

21-22Chit nn̄g ki thiāu siâng-khoán, múi chi̍t ki koân poeh kong-chhioh, chiu-ûi gō͘ kong-chhioh saⁿ-cha̍p kong-hun, kāu chhit-cha̍p-gō͘ kong-lî, tiong-ng khang-khak; thiāu ê téng-bīn ū tâng ê thiāu-táu; thiāu-táu koân chi̍t kong-chhioh saⁿ-cha̍p kong-hun; thiāu-táu ê chiu-ûi ū tâng chòe ê bāng-á kap sia̍h-liû.

23Sì-bīn ū sia̍h-liû káu-cha̍p-la̍k lia̍p; bāng-á ê chiu-ûi sia̍h-liû chóng-kiōng chi̍t-pah lia̍p.

Iû-tāi Jîn-bîn Siū-lia̍h Khì Pa-pí-lûn(2 Ông 25.18-21)

24Sī-ōe-tiúⁿ Nî-pò͘-sat-la-tàn lia̍h tōa-chè-si Se-lâi-ngá, hù-chè-si Se-hoan-ngá, kap saⁿ ê sèng-tiān mn̂g-kháu ê siú-ōe;

25koh tùi siâⁿ-lāi lia̍h chi̍t ê koán-peng ê koaⁿ-oân, ông ê chhit ê chhin-sìn, kap teng-bō͘ peng-sū ê hù-chí-hui-koaⁿ, í-ki̍p tī siâⁿ-lāi tú--tio̍h ê la̍k-cha̍p ê kok-bîn.

26Sī-ōe-tiúⁿ chiong chiah-ê lâng tòa-khì tī Lī-pí-la ê Pa-pí-lûn-ông hia.

27Pa-pí-lûn-ông tī Hap-má tōe-khu ê Lī-pí-la lóng kā in thâi-sí.

Án-ni, Iû-tāi ê jîn-bîn siū-lia̍h lī-khui in pún-tōe.

28Ē-bīn sī Nî-pò͘-kah-nî-sat só͘ lia̍h ê jîn-sò͘:

Tī i thóng-tī tē-chhit nî, lia̍h Iû-tāi-lâng saⁿ-chheng khòng jī-cha̍p-saⁿ lâng;

29Tē-cha̍p-poeh nî, tùi Iâ-lō͘-sat-léng lia̍h poeh-pah saⁿ-cha̍p-jī lâng;

30Tē-jī-cha̍p-saⁿ nî, sī-ōe-tiúⁿ Nî-pò͘-sat-la-tàn lia̍h Iû-tāi-lâng chhit-pah sì-cha̍p-gō͘ lâng;

chóng-kiōng ū sì-chheng la̍k-pah lâng.

Iok-ngá-kun Siū Tháu-pàng(2 Ông 25.27-30)

31 Pa-pí-lûn-ông Í-bī Bí-lô-ta̍t tī i chē-ūi hit-nî, chiū-sī Iû-tāi-ông Iok-ngá-kun siū-lia̍h liáu-āu tē-saⁿ-cha̍p-chhit nî, cha̍p-jī-ge̍h jī-cha̍p-gō͘ ji̍t, te̍k-sià Iû-tāi-ông Iok-ngá-kun, pàng i chhut-kaⁿ,

32koh ēng hó-ōe an-ùi i, hō͘ i pí siū-lia̍h tī Pa-pí-lûn kî-tha kok-ka ê ông ū khah-koân ê tōe-ūi.

33Iok-ngá-kun thǹg-khì kaⁿ-lāi só͘ chhēng ê saⁿ, chi̍t-sì-lâng kap Pa-pí-lûn-ông chòe-hé chia̍h.

34Iok-ngá-kun oa̍h--teh ê sî, Pa-pí-lûn-ông siúⁿ-sù i só͘ su-iàu ê seng-oa̍h hùi-iōng, ti̍t-kàu i sí hit-ji̍t.

Iâ-lī-bí-su 52 - 現代台語譯本羅馬字版(TTVR)-闽南语

Learn More About Us