Sū-su-kì 9

Sū-su-kì 9 - 現代台語譯本羅馬字版(TTVR)-闽南语

A-pí-bí-le̍k

1 Iâ-lō͘-pa-le̍k ê kiáⁿ A-pí-bí-le̍k khì Sī-kiàm i ê bú-kū hia, tùi in kap i ê gōa-kong choân-ke ê lâng kóng,

2“Chhiáⁿ lín mn̄g Sī-kiàm ê chèng-lâng, khòaⁿ sī Iâ-lō͘-pa-le̍k chhit-cha̍p ê kiáⁿ thóng-tī lín, á-sī chi̍t ê lâng kā lín thóng-tī khah hó? Lín mā tio̍h tài-liām góa sī lín ê kut-jio̍k.”

3I hiah-ê bú-kū chiū chiong chiah-ê ōe kóng hō͘ Sī-kiàm ê lâng thiaⁿ; in chiū ióng-hō͘ A-pí-bí-le̍k, kóng, “I sī lán ê hiaⁿ-tī.”

4In tùi Pa-le̍k Pí-lī-thó͘ ê biō the̍h chhit-cha̍p ê gûn-á hō͘ A-pí-bí-le̍k; i chiū ēng chiah-ê gûn-á chhiàⁿ chi̍t-kóa húi-lūi lâi tè i.

5I khì Gô-hut-la in lāu-pē ê chhù, chiong i ê hiaⁿ-tī, chiū-sī Iâ-lō͘-pa-le̍k ê chhit-cha̍p ê kiáⁿ, lóng thâi-sí tī chi̍t tè chio̍h-pôaⁿ téng; chí-ū Iâ-lō͘-pa-le̍k ê soah-bé-kiáⁿ Iok-thán ū cháu-khì bih, bô sí.

6Sī-kiàm-lâng kap Pek Bí-lô-lâng lóng chū-chi̍p, tī Sī-kiàm siōng-chhiū piⁿ--á ê thiāu-siōng hia, siat-li̍p A-pí-bí-le̍k choh-ông.

7 Iok-thán chi̍t-ē thiaⁿ-tio̍h chit-ê tāi-chì, chiū khì khiā tī Ki-lī-sim soaⁿ-téng, tùi Sī-kiàm-lâng tōa-siaⁿ hoah, kóng, “Sī-kiàm-lâng, tio̍h thiaⁿ góa kóng, Siōng-tè chiū ōe thiaⁿ lín.

8Ū chi̍t piàn, chhiū-á beh siat-li̍p chi̍t châng chhiū chòe in ê ông. In khì kā kaⁿ-ná-chhiū kóng, ‘Chhiáⁿ lí chòe goán ê ông.’

9Kaⁿ-ná-chhiū ìn in kóng, ‘Góa ná thang thêng-chí seng-sán hō͘ Siōng-tè kap lâng tit-tio̍h êng-kng ê iû, khì tī lín ê téng-bīn tián-ui?’

10Chiah-ê chhiū khì kā bû-hoa-kó-chhiū kóng, ‘Chhiáⁿ lí chòe goán ê ông.’

11Bû-hoa-kó-chhiū ìn in kóng, ‘Góa ná thang thêng-chí seng-sán góa tiⁿ koh hó-chia̍h ê ké-chí, khì tī lín ê téng-bīn tián-ui?’

12Chiah-ê chhiū khì kā phû-tô-chhiū kóng, ‘Chhiáⁿ lí chòe goán ê ông.’

13Phû-tô-chhiū ìn in kóng, ‘Góa ná thang thêng-chí seng-sán hō͘ Siōng-tè kap lâng hoaⁿ-hí khoài-lo̍k ê sin-chiú, khì tī lín ê téng-bīn tián-ui?’

14Chiah-ê chhiū tùi chhì-phè kóng, ‘Lí chòe goán ê ông.’

15Chhì-phè ìn in kóng, ‘Lín nā chin-chiàⁿ beh siat-li̍p góa chòe lín ê ông, tio̍h lâi góa ê ìm-ńg-ē hō͘ góa pó-hō͘; nā m̄, hé chiū ōe tùi chhì-phè hoat-chhut, sio-húi Lê-pa-lūn ê pek-hiuⁿ-chhiū.’

16“Lín nā sêng-sim-si̍t-ì siat-li̍p A-pí-bí-le̍k choh-ông, nā chiàu Iâ-lō͘-pa-le̍k ūi-tio̍h lín só͘ chòe--ê, kong-tō tùi-thāi i kap i ê ke —

17góa ê lāu-pē bat bô kò͘ sìⁿ-miā ūi-tio̍h lín kau-chiàn, kiù lín thoat-lī Bí-tiân-lâng ê chhiú;

18lín kin-á-ji̍t kèng-jiân kong-kek goán lāu-pē ê ke, tī chi̍t tè chio̍h-pôaⁿ téng thâi-sí i chhit-cha̍p ê kiáⁿ, koh siat-li̍p i lú-pī ê kiáⁿ, lín ê hiaⁿ-tī A-pí-bí-le̍k chòe Sī-kiàm-lâng ê ông;

19lín kin-á-ji̍t nā chin-sêng kong-tō tùi-thāi Iâ-lō͘-pa-le̍k kap i ê ke, góa chiok lín kap A-pí-bí-le̍k lóng hoaⁿ-hí khoài-lo̍k;

20nā bô, goān hé tùi A-pí-bí-le̍k hoat-chhut, sio-bia̍t Sī-kiàm-lâng kap Pek Bí-lô-lâng; goān hé mā tùi Sī-kiàm-lâng kap Pek Bí-lô-lâng hoat-chhut, sio-sí A-pí-bí-le̍k.”

21Iok-thán in-ūi kiaⁿ i ê hiaⁿ-tī A-pí-bí-le̍k, chiū tô-cháu khì bih tī Pí-ní, tòa tī hia.

22 A-pí-bí-le̍k thóng-tī Í-sek-lia̍t saⁿ nî.

23Siōng-tè phài pháiⁿ-sîn khì tī A-pí-bí-le̍k kap Sī-kiàm-lâng ê tiong-kan, hō͘ Sī-kiàm-lâng pōe-poān A-pí-bí-le̍k,

24lâi pò-èng A-pí-bí-le̍k, in-ūi i thâi-sí Iâ-lō͘-pa-le̍k chhit-cha̍p ê kiáⁿ; mā pò-ho̍k Sī-kiàm-lâng, in-ūi in pang-chān A-pí-bí-le̍k chân-hāi i ê hiaⁿ-tī.

25Sī-kiàm-lâng hoán-tùi A-pí-bí-le̍k, chiū tī soaⁿ-téng bâi-ho̍k, chhiúⁿ só͘-ū keng-kè hit-tiâu lō͘ ê lâng; ū lâng chiong chit-hāng tāi-chì kā A-pí-bí-le̍k pò-kò.

26 Í-pia̍t ê kiáⁿ Ka-le̍k kap i ê hiaⁿ-tī lâi kàu Sī-kiàm; Sī-kiàm-lâng lóng sìn-jīm i.

27In chhut-khì hn̂g--ni̍h siu phû-tô, ta̍h chiú, khèng-chiok, tī in ê sîn-biō ia̍h-chia̍h-ia̍h-lim, chiù-chó͘ A-pí-bí-le̍k.

28Í-pia̍t ê kiáⁿ Ka-le̍k kóng, “A-pí-bí-le̍k sǹg siáⁿ? Lán Sī-kiàm-lâng sī sím-mi̍h khoán lâng, ná tio̍h ho̍k-sāi i? I put-kò sī Iâ-lō͘-pa-le̍k ê kiáⁿ; Se-pò͘-le̍k put-kò sī i ê pō͘-hā. Lán tio̍h ho̍k-sāi lán Sī-kiàm ê khai-thok-chiá Hap-boat ê hō͘-tāi, ná beh ho̍k-sāi A-pí-bí-le̍k?

29Chiah-ê jîn-bîn nā hō͘ góa chí-hui, góa chiū ōe kā A-pí-bí-le̍k siau-bia̍t.” I chiū kā A-pí-bí-le̍k chhiàng-siaⁿ, “Ke phài lí ê kun-peng, chhut-lâi su-iâⁿ!”

30Chhī-tiúⁿ Se-pò͘-le̍k thiaⁿ-tio̍h Í-pia̍t ê kiáⁿ Ka-le̍k ê ōe, hui-siông siū-khì,

31chiū àm-tiong phài lâng khì kā A-pí-bí-le̍k pò-kò, kóng, “Í-pia̍t ê kiáⁿ Ka-le̍k kap i ê hiaⁿ-tī lâi Sī-kiàm, siàn-tōng siâⁿ-lāi ê lâng hoán-khòng lí;

32só͘-í, lí kap lí ê pō͘-hā tio̍h thàu-mî chhut-hoat, tī iá-gōa bâi-ho̍k;

33ji̍t tú-á chhut ê sî, lí tio̍h kóaⁿ-kín kong-siâⁿ; Ka-le̍k kap tè i ê lâng chhut-lâi kong-kek lí, lí tio̍h choân-le̍k tùi-hù in.”

34 A-pí-bí-le̍k kap i ê pō͘-hā mî--sî chhut-hoat, pun-chòe sì tūi, tī Sī-kiàm hù-kūn bâi-ho̍k.

35Í-pia̍t ê kiáⁿ Ka-le̍k chhut--khì, khiā tī siâⁿ-mn̂g-kháu; A-pí-bí-le̍k kap i ê pō͘-hā tùi bâi-ho̍k ê só͘-chāi chhut--lâi.

36Ka-le̍k khòaⁿ-tio̍h hiah-ê lâng, chiū tùi Se-pò͘-le̍k kóng, “Lí khòaⁿ, ū lâng tùi soaⁿ-téng lo̍h--lâi.”

Se-pò͘-le̍k kóng, “He sī soaⁿ ê iáⁿ, lí soah khòaⁿ-chòe sī lâng.”

37 Ka-le̍k koh kóng, “Khòaⁿ leh, ū lâng tùi koân ê só͘-chāi lo̍h--lâi, koh ū chi̍t tūi tùi Bí-ok-nî-nî siōng-chhiū ê lō͘ kè--lâi.”

38 Se-pò͘-le̍k tùi i kóng, “Lí bat kóng, ‘A-pí-bí-le̍k sǹg siáⁿ? Lán ná tio̍h ho̍k-sāi i?’ Lí kóng ê tōa-siaⁿ ōe tī tó-ūi? Chiah-ê lâng kiám m̄-sī lí biáu-sī ê jîn-bîn? Taⁿ lí tio̍h chhut-khì kap in kau-chiàn.”

39Ka-le̍k chiū chhōa Sī-kiàm-lâng chhut--khì, kap A-pí-bí-le̍k kau-chiàn.

40A-pí-bí-le̍k tui-jip Ka-le̍k, Ka-le̍k chiū tô-cháu; sí-siong ê lâng chin chōe, tó kah móa-sì-kòe, it-ti̍t kàu siâⁿ-mn̂g-kháu.

41A-pí-bí-le̍k tòa tī A-ló͘-má; Se-pò͘-le̍k kóaⁿ Ka-le̍k kap i ê hiaⁿ-tī, m̄-chún in tiàm tī Sī-kiàm.

42Keh-ji̍t, Sī-kiàm-lâng chhut-khì iá-gōa; ū lâng kā A-pí-bí-le̍k kóng.

43I chiū chiong i ê pō͘-hā pun-chòe saⁿ tūi, bâi-ho̍k tī iá-gōa; khòaⁿ-tio̍h Sī-kiàm-lâng tùi siâⁿ-lāi chhut--lâi, chiū khí-lâi kong-kek in, thâi in.

44A-pí-bí-le̍k kap tè i hit-tūi chhiong chìn-chêng, cha̍h tī siâⁿ-mn̂g-kháu; lēng-gōa hit nn̄g tūi ti̍t-ti̍t chhiong khì iá-gōa, thâi-sí hiah-ê lâng.

45A-pí-bí-le̍k kui-ji̍t kong-siâⁿ. I kong-chhú hit-ê siâⁿ liáu-āu, thâi-sí siâⁿ-lāi ê lâng, kā siâⁿ thiah-húi, koh iā iâm tī téng-bīn.

46Tòa tī Sī-kiàm siâⁿ-lâu ê lâng thiaⁿ--tio̍h, chiū cháu ji̍p-khì Pa-le̍k Pí-lī-thó͘

-biō ê tōe-hia̍t.

47Ū lâng kā A-pí-bí-le̍k kóng, “Sī-kiàm siâⁿ-lâu ê lâng lóng chi̍p-tiong tī chi̍t só͘-chāi.”

48A-pí-bí-le̍k kap tè i ê lâng chiū lóng chiūⁿ Sat-bûn-soaⁿ; A-pí-bí-le̍k chhiú gia̍h pó͘-thâu, chhò chi̍t ki chhiū-oe, giâ tī keng-thâu téng. I kā tè i ê lâng kóng, “Góa án-chóaⁿ chòe, lín tio̍h kóaⁿ-kín tè góa chòe.”

49Só͘-ū ê lâng chiū lóng chhò chhiū-oe, tè A-pí-bí-le̍k khì kàu tōe-hia̍t hia, chiong chhiū-oe thia̍p tī hit téng-bīn, pàng-hé sio, Sī-kiàm siâⁿ-lâu ê lâng lóng sí; lâm-lú tāi-iok chi̍t-chheng lâng.

50 A-pí-bí-le̍k khì kàu Thê-pī-su, tī hia chat-iâⁿ, kong-chhú hit-chō siâⁿ.

51Siâⁿ-lāi ū chi̍t chō kian-kò͘ ê siâⁿ-lâu; siâⁿ-lāi ê lâng, bô-lūn lâm-lú, lóng cháu-khì hia, koaiⁿ-mn̂g, chiūⁿ lâu-téng.

52A-pí-bí-le̍k lâi kàu siâⁿ-lâu ê mn̂g-chêng, beh pàng-hé sio siâⁿ-lâu.

53Ū chi̍t ê hū-jîn-lâng chiong chio̍h-bō ê téng-bīn-chō tàn--lo̍h-khì, tàn-tio̍h A-pí-bí-le̍k ê thâu-khak, lòng-phòa i ê thâu-khak-óaⁿ.

54I kóaⁿ-kín kiò thòe i gia̍h kun-khì ê siàu-liân-lâng, kā i kóng, “Pu̍ih to kā góa thâi-sí, chiah bián lâng kóng góa hō͘ cha-bó͘-lâng thâi-sí.” Siàu-liân-lâng chiū kā i chha̍k-sí.

55Í-sek-lia̍t-lâng khòaⁿ-tio̍h A-pí-bí-le̍k sí, chiū lóng tò-khì ta̍k-ê lâng ka-kī ê chhù.

56Án-ni, Siōng-tè pò-èng A-pí-bí-le̍k tùi i ê lāu-pē só͘ chòe siâ-ok ê sū, chiū-sī thâi-sí i chhit-cha̍p ê hiaⁿ-tī.

57Siōng-tè mā pò-èng Sī-kiàm-lâng só͘ chòe lóng-chóng ê pháiⁿ-sū. Iâ-lō͘-pa-le̍k ê kiáⁿ Iok-thán chiù-chó͘ ê ōe lóng chiàu án-ni hoat-seng.

Sū-su-kì 9 - 現代台語譯本羅馬字版(TTVR)-闽南语

Learn More About Us