Si-phian 140 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Kî-kiû Siōng Chú Pó-hō͘

1Siōng Chú ah, kiû lí kiù góa thoat-lī pháiⁿ-lâng,

pó-hō͘ góa thoat-lī hiong-ok ê lâng.

2In sim-lāi tô͘-bô͘ siâ-ok,

put-sî chè-chō hun-cheng.

3In ê chi̍h chhin-chhiūⁿ to̍k-chôa ê chi̍h hiah-ni̍h lāi;

in ê chhùi-tûn ū to̍k-chôa ê to̍k.

4Siōng Chú ah, kiû lí pó-siú góa thoat-lī pháiⁿ-lâng ê chhiú,

pó-hō͘ góa thoat-lī kiông-pō ê lâng;

in tô͘-bô͘ beh kā góa chhia-tó.

5Kiau-ngō͘ ê lâng àm-tiong ku̍t hām-chíⁿ, tiuⁿ lô-bāng,

tī lō͘-piⁿ siat khoân-thò beh hāi góa.

6Góa tùi Siōng Chú kóng, “Lí sī góa ê Siōng-tè.”

Siōng Chú ah, kiû lí àⁿ hī-khang thiaⁿ góa khún-kiû ê siaⁿ.

7Chì-koân ê Siōng Chú — góa tōa khùi-la̍t ê Chín-kiù-chiá ah,

tī kau-chiàn ê sî, lí ū pó-hō͘ góa.

8Siōng Chú ah, kiû lí m̄-thang hō͘ pháiⁿ-lâng ê sim-goān si̍t-hiān,

m̄-thang hō͘ in ê kè-bô͘ sêng-kong, tì-kàu chū-ko.

9M̄-thang hō͘ ûi-khùn góa ê lâng sèng-lī;

tio̍h hō͘ in chhùi-tûn ê to̍k-hāi hāi-tio̍h in ka-kī.

10Kiû lí ēng teh to̍h ê hé-thòaⁿ kàng-lo̍h tī in sin-chiūⁿ;

kā in hiat-lo̍h hé, tàn tī Chhim-khiⁿ, bōe koh khí--lâi.

11Kiû lí hō͘ chè-chō sī-hui ê lâng tī tōe-chiūⁿ khiā bōe tiâu,

tio̍h hō͘ chai-hō kā kiông-pō ê lâng tè-tiâu-tiâu, lóng kā in phah-tó.

12Góa chai Siōng Chú ōe ūi-tio̍h khùn-khó͘ ê lâng sin-oan,

ūi-tio̍h sàn-chhiah-lâng chú-chhî kong-tō.

13Gī-lâng it-tēng ōe kám-siā lí;

chèng-ti̍t ê lâng ōe-tàng tī lí bīn-chêng khiā-khí.

Learn More About Us