Sū-su-kì 10

Sū-su-kì 10 - 現代台語譯本羅馬字版(TTVR)-闽南语

Tô-la

1 A-pí-bí-le̍k sí liáu-āu, ū Í-sat-ka chi-cho̍k ê lâng Tó-to ê sun, Phó͘-óa ê kiáⁿ, Tô-la heng-khí, kái-kiù Í-sek-lia̍t-lâng; i tòa tī Í-hoat-liân soaⁿ-khu ê Sa-bi̍t.

2I chòe Í-sek-lia̍t ê sū-su jī-cha̍p-saⁿ nî. I sí, lâng kā i an-chòng tī Sa-bi̍t.

Gâi-ní

3 Tô-la sí liáu-āu, Ki-lia̍t-lâng Gâi-ní heng-khí, chòe Í-sek-lia̍t ê sū-su jī-cha̍p-jī nî.

4I ū saⁿ-cha̍p ê kiáⁿ, khiâ saⁿ-cha̍p chiah lû-á, koh ū saⁿ-cha̍p chō siâⁿ, lóng tī Ki-lia̍t tōe-khu; chiah-ê siâⁿ kàu kin-á-ji̍t iáu kiò-chòe Hap-o-te̍k Gâi-ní.

5Gâi-ní sí, lâng kā i an-chòng tī Ka-bûn.

Iâ-hut-tha

6 Í-sek-lia̍t-lâng koh chòe Siōng Chú khòaⁿ-chòe pháiⁿ ê sū, khì ho̍k-sāi Pa-le̍k kap A-su-tha-lio̍k, í-ki̍p Sū-lī-a, Se-tùn, Mô͘-ap, A-bûn-lâng, kap Hui-lī-sū-lâng ê sîn-bêng; in khì-sak Siōng Chú, bô ho̍k-sāi I.

7Siōng Chú tùi Í-sek-lia̍t-lâng hoat siū-khì, chiong in kau hō͘ Hui-lī-sū-lâng kap A-bûn-lâng.

8In jiáu-loān koh ap-chè tòa tī Iok-tàn-hô tang-pêng, A-mô͘-lī-lâng kéng-lāi, Ki-lia̍t tōe-khu ê Í-sek-lia̍t-lâng ū cha̍p-poeh nî kú.

9A-bûn-lâng koh kè Iok-tàn-hô, khì kong-kek Iû-tāi, Piān-ngá-bín, kap Í-hoat-liân chiah-ê chi-cho̍k, Í-sek-lia̍t-lâng chiū hui-siông khùn-khó͘.

10 Í-sek-lia̍t-lâng ai-kiû Siōng Chú, kóng, “Goán ū tek-chōe lí, in-ūi goán khì-sak goán ê Siōng-tè, khì ho̍k-sāi Pa-le̍k.”

11Siōng Chú tùi Í-sek-lia̍t-lâng kóng, “Góa kiám bô chiong lín tùi Ai-ki̍p-lâng, A-mô͘-lī-lâng, A-bûn-lâng, kap Hui-lī-sū-lâng ê chhiú kái-kiù--chhut-lâi?

12Se-tùn-lâng, A-má-le̍k-lâng, kap Má-hûn-lâng ap-chè lín, lín ai-kiû góa, góa mā ū kái-kiù lín thoat-lī in ê chhiú.

13Taⁿ lín kèng-jiân pàng-sak góa, khì ho̍k-sāi pa̍t-ê sîn-bêng, só͘-í góa bô beh koh kiù lín.

14Lín khì ai-kiû lín só͘ kéng ê sîn-bêng, hō͘ in tī lín hoān-lān ê sî kái-kiù lín.”

15 Í-sek-lia̍t-lâng tùi Siōng Chú kóng, “Goán ū hoān-chōe, chhut-chāi lí ê ì-sù tùi-thāi goán; m̄-kú khún-kiû lí kin-á-ji̍t kái-kiù goán.”

16In chiū chiong in tiong-kan ê gōa-pang sîn-bêng tû--khì, chí-ū ho̍k-sāi Siōng Chú; Siōng Chú tùi Í-sek-lia̍t-lâng ê khùn-khó͘ chin put-jím-sim.

17 A-bûn-lâng koh chū-chi̍p, tī Ki-lia̍t chat-iâⁿ; Í-sek-lia̍t-lâng mā chū-chi̍p, chat-iâⁿ tī Bí-su-pa.

18Ki-lia̍t ê kun-peng kap koaⁿ-tiúⁿ chham-siông koat-tēng, kóng, “Sím-mi̍h-lâng seng khì kong-kek A-bûn-lâng, i chiū chòe Ki-lia̍t chū-bîn ê léng-siù.”

Sū-su-kì 10 - 現代台語譯本羅馬字版(TTVR)-闽南语

Learn More About Us