Si-phian 78

Si-phian 78 - 現代台語譯本羅馬字版(TTVR)-闽南语

A-sat kà-sī ê si.Siōng-tè Ín-chhōa Pōe-ge̍k ê Chú-bîn

1Góa ê chú-bîn ah, tio̍h thiaⁿ góa ê kà-sī,

chù-ì thiaⁿ góa kóng ê ōe.

2Góa beh khui-chhùi kóng phì-jū,

beh kóng-chhut kó͘-chá ê ò-pì,

3chiū-sī goán só͘ thiaⁿ--kìⁿ, só͘ chai,

goán ê chó͘-sian só͘ thoân hō͘ goán ê sū.

4Goán bô beh chiong chiah-ê sū tùi kiáⁿ-sun ún-môa,

beh chiong Siōng Chú ê miâ-siaⁿ kap I ê koân-lêng,

í-ki̍p I só͘ chòe kî-biāu ê sū, thoân hō͘ āu sè-tāi.

5I tī Ngá-kok siat kài-bēng, tī Í-sek-lia̍t tēng Lu̍t-hoat,

koh bēng-lēng lán ê chó͘-sian chiong chiah-ê thoân hō͘ in ê kiáⁿ-sun,

6hō͘ hō͘-tāi, chiū-sī teh-beh chhut-sì ê kiáⁿ-sun chai;

chiah-ê kiáⁿ-sun mā beh thoân hō͘ in ê kiáⁿ-kiáⁿ-sun-sun.

7Án-ni, in thang chiong ǹg-bāng khǹg tī Siōng-tè,

hō͘ in bô bōe-kì-tit Siōng-tè ê chok-ûi,

chun-siú I ê kài-bēng;

8chiah bián chhin-chhiūⁿ in chó͘-sian ê sè-tāi, ngī-sim pōe-ge̍k;

in tùi Siōng-tè sim bô kian-tēng, sim-lêng bô chin-si̍t.

9 Í-hoat-liân ê kiáⁿ-sun gia̍h bú-khì kap keng-chìⁿ,

cheng-chiàn ê ji̍t, khiok oa̍t-tńg-sin tô-cháu.

10In bô chun-siú Siōng-tè ê iok,

kū-choa̍t chiàu I ê Lu̍t-hoat seng-oa̍h.

11In bōe-kì-tit I ê chok-ûi,

bōe-kì-tit I hō͘ in khòaⁿ-kìⁿ kî-biāu ê sū.

12I tī Ai-ki̍p-tōe, Só-an ê chhân-iá,

tī in chó͘-sian ê ba̍k-chiu chêng chòe kî-īⁿ ê sū.

13I kā hái hun-khui, hō͘ in kè--khì;

I hō͘ chúi khiā--khí-lâi chhin-chhiūⁿ piah.

14I ji̍t--sî ēng hûn chhōa in,

kui-mî ēng hé ê kng ín-chhōa in.

15I tī khòng-iá hō͘ chio̍h-pôaⁿ piak-li̍h,

hō͘ in ū chin chōe chúi thang lim,

chhin-chhiūⁿ tùi chhim-ian chhèng-chhut.

16I hō͘ chúi tùi chio̍h-pôaⁿ chhèng-chhut,

chhin-chhiūⁿ kang-hô lâu--lo̍h-lâi.

17M̄-kú in iáu kè-sio̍k tek-chōe I,

tī khòng-iá pōe-ge̍k Chì-koân Siōng-tè.

18In sim-lāi chhì-thàm Siōng-tè,

chiàu ka-kī ì-ài--ê kiû chia̍h-mi̍h.

19In lām-sám gī-lūn Siōng-tè, kóng,

“Siōng-tè kiám ōe tī khòng-iá pān-toh?

20I bat kòng chio̍h-pôaⁿ, hō͘ chúi chhèng-chhut,

khoe-chúi móa--chhut-lâi;

I kiám ōe sù bí-niû?

I kiám ōe kā I ê chú-bîn chún-pī bah?”

21Só͘-í, Siōng Chú thiaⁿ--tio̍h chiū siū-khì,

ēng iām-hé sio Ngá-kok,

tùi Í-sek-lia̍t hoat siū-khì.

22In-ūi in m̄ sìn-ho̍k Siōng-tè,

m̄ óa-khò I ê kiù-un.

23M̄-kú I iáu bēng-lēng téng-bīn ê kiong-chhong,

koh khui thiⁿ ê mn̂g;

24I kàng-lo̍h má-ná hō͘ in chia̍h,

chiong thiⁿ ê bí-niû sù hō͘ in.

25In ta̍k-ê lâng chia̍h thiⁿ-sài ê chia̍h-mi̍h;

Siōng-tè sù bí-niû hō͘ in chia̍h kàu pá.

26I tùi thiⁿ khí tang-hong,

ēng I ê koân-lêng chhe lâm-hong,

27I kàng-lo̍h bah hō͘ in, ná thô͘-hún hiah chōe,

kàng-lo̍h pe-chiáu ná hái-soa hiah chōe,

28lo̍h tī in ê iâⁿ-tiong,

tī in khiā-khí ê só͘-chāi ê sì-ûi.

29In chiū chia̍h, chia̍h kàu pá-pá;

I ū chiàu in só͘ ài--ê hō͘ in.

30In só͘ ài--ê iáu-bē pá-chiok,

chia̍h-mi̍h iáu tī chhùi-lāi ê sî,

31Siōng-tè chiū tùi in hoat siū-khì,

thâi-sí in tiong-kan ióng-chòng ê lâng,

phah-tó Í-sek-lia̍t ê siàu-liân-lâng.

32Sui-jiân án-ni, in kè-sio̍k hoān-chōe,

bô in-ūi Siōng-tè kî-biāu ê chok-ûi lâi sìn I.

33Só͘-í I hō͘ in khang-khang kè-ji̍t,

hō͘ in nî-nî tī kiaⁿ-hiâⁿ tiong keng-kè.

34Siōng-tè thâi in ê sî, in chiah lâi kiû I;

oa̍t tò-tńg pek-chhiat chhē-kiû I.

35In chiah ōe-kì-tit Siōng-tè sī in ê pó-hō͘-chiá,

Chì-koân-chiá Siōng-tè sī in ê Kiù-sio̍k-chú.

36M̄-kú in ēng chhùi kā I phô͘-tháⁿ,

ēng chi̍h tùi I kóng pe̍h-chha̍t.

37In tùi I bô tiong-sìn,

bô chin-si̍t siú I ê iok.

38M̄-kú I iáu chhiong-móa lîn-bín,

sià-bián in ê chōe-kò, bô kā in húi-bia̍t,

chi̍t-piàn koh chi̍t-piàn jím--teh,

siū-khì bô lóng hoat--chhut-lâi.

39I tài-liām in put-kò sī ōe-sí ê lâng,

sī chhe--kè-khì bōe koh tò-tńg--lâi ê hong.

40In tī khòng-iá put-sî pōe-ge̍k I,

tī hong-po͘ hō͘ I iu-būn.

41In chi̍t-piàn koh chi̍t-piàn chhì-thàm Siōng-tè,

kek Í-sek-lia̍t sîn-sèng ê Siōng-tè siū-khì.

42In bōe-kì-tit I ê koân-lêng,

bōe-kì-tit I kái-kiù in thoat-lī tùi-te̍k ê ji̍t.

43I tī Ai-ki̍p án-chóaⁿ kiâⁿ sîn-jiah,

tī Só-an ê chhân-iá hián-chhut kî-sū:

44I chiong in ê kang-hô pìⁿ-chòe huih,

tì-kàu chúi lóng bōe-lim--tit.

45I hō͘ kui-kûn hô͘-sîn lâi in hia thun-chia̍h,

hō͘ chhân-kap-á lâi sún-hāi.

46I chiong in ê thó͘-sán hō͘ chháu-meh-kong húi-hoāi,

chiong in lô-khó͘ tit--tio̍h ê mi̍h hō͘ chháu-meh thun-chia̍h.

47I lo̍h-pha̍uh húi-hoāi in ê phû-tô-chhiū,

lo̍h-sng húi-hoāi in ê sng-châi-chhiū;

48koh chiong in ê cheng-siⁿ kau hō͘ peng-pha̍uh,

chiong in kui-kûn ê cheng-siⁿ kau hō͘ sih-nà.

49I hoat tōa siū-khì,

ēng siū-khì, thòng-hūn, khó͘-lān

chòe kui-tīn ê sù-chiá lâi kā in húi-bia̍t.

50I lún bōe tiâu siū-khì,

bô kò͘-liām in ê sìⁿ-miā,

ēng un-e̍k kā in húi-bia̍t.

51I thâi-sí Ai-ki̍p só͘-ū ê tōa-kiáⁿ,

tī Hâm ê pò͘-pîⁿ phah-sí in ê thâu-chiūⁿ-kiáⁿ.

52I chhin-chhiūⁿ teh chhōa iûⁿ kā ka-kī ê chú-bîn chhōa--chhut-lâi,

chhōa in keng-kè khòng-iá.

53I chhōa in, hō͘ in an-ún bô kiaⁿ-hiâⁿ,

hō͘ hái im-sí in ê tùi-te̍k.

54I koh chhōa in kàu sèng-tōe ê kéng-lāi,

kàu I ēng khùi-la̍t tit--tio̍h ê soaⁿ-tōe.

55I tī in ê bīn-chêng kóaⁿ-chhut lia̍t-pang;

ēng soh-á niû thó͘-tōe hō͘ Í-sek-lia̍t ê chi-cho̍k chòe sán-gia̍p,

hō͘ in khiā-khí tī ka-kī ê pò͘-pîⁿ.

56In iû-goân chhì-thàm Chì-koân-chiá Siōng-tè, pōe-ge̍k I,

bô siú I ê kài-bēng.

57In sit-sìn pōe-ge̍k, kap in ê chó͘-sian siâng-khoán,

chhin-chhiūⁿ lēng--khì ê keng bōe-khò--tit.

58In pài soaⁿ-thâu-tôaⁿ, jiá I siū-khì,

pài tiau-khek ê ngó͘-siōng, hō͘ I thòng-hūn.

59Siōng-tè thiaⁿ--tio̍h chin siū-khì,

chiū oân-choân khì-sak Í-sek-lia̍t.

60I khì-sak Sī-lô ê hōe-bō͘,

khì-sak I tī lâng ê tiong-kan só͘ tah ê pò͘-pîⁿ.

61I ún-chún lâng kā iok-kūi chhiúⁿ--khì,

chiong I ê khùi-la̍t kap êng-kng kau hō͘ tùi-te̍k.

62I tùi I ê ke-gia̍p Í-sek-lia̍t hoat siū-khì,

chiong I ê chú-bîn kau hō͘ tùi-te̍k sat-hāi.

63In ê siàu-liân-lâng siū chiàn-hé sio-bia̍t;

in ê chāi-sek-lú bōe-tàng thiaⁿ-tio̍h kiat-hun ê chiok-koa.

64In ê chè-si tó tī to-ē;

in ê kóaⁿ-hū khàu bōe chhut--lâi.

65Hit-sî Chú chhin-chhiūⁿ lâng khùn cheng-sîn,

chhin-chhiūⁿ ióng-sū chiú-āu hán-hoah.

66I chiū kā tùi-te̍k phah-thè,

hō͘ in éng-oán siū lêng-jio̍k.

67I khì-sak Iok-sek ê hō͘-tāi,

bô kéng-soán Í-hoat-liân chi-cho̍k.

68I kéng-soán Iû-tāi chi-cho̍k,

I só͘ ì-ài ê Sek-an-soaⁿ.

69I khí-chō sèng-só͘ chhin-chhiūⁿ thiⁿ hiah koân,

chhin-chhiūⁿ I kiàn-li̍p ê tāi-tōe éng-oán kian-kò͘.

70I kéng-soán I ê po̍k-jîn Tāi-pi̍t,

tùi iûⁿ-tiâu chhōa i chhut--lâi,

71hō͘ i bô koh iúⁿ-chhī iûⁿ-kûn,

sī beh hō͘ i bo̍k-ióng Chú ê chú-bîn Ngá-kok, I ê ke-gia̍p Í-sek-lia̍t.

72 Tāi-pi̍t chiū ēng sûn-chèng ê sim bo̍k-ióng in,

ēng láu-liān ê chhiú ín-chhōa in.

Si-phian 78 - 現代台語譯本羅馬字版(TTVR)-闽南语

Learn More About Us