Í-se-kiat-su 9

Í-se-kiat-su 9 - 現代台語譯本羅馬字版(TTVR)-闽南语

Iâ-lō͘-sat-léng Siū Hêng-hoa̍t

1Liáu-āu, góa thiaⁿ-kìⁿ Siōng-tè tōa-siaⁿ hoah, “Lín chiah-ê hū-chek hêng-hoa̍t chit-ê siâⁿ ê lâng, lâi! Ta̍k-ê lâng tòa thâi-lâng ê bú-khì lâi!”

2Sûi-sî ū la̍k ê lâng, ta̍k-ê tòa thâi-lâng ê bú-khì, tùi sèng-tiān gōa-tiâⁿ ê pak-mn̂g kè--lâi, kî-tiong ū chi̍t ê chhēng iù-môa-pò͘ chòe ê saⁿ, io ū siá-jī ê pit kap ba̍k. In chìn-chêng lâi, khiā tī tâng ê chè-tôaⁿ piⁿ.

3Pún-lâi thêng tī thiⁿ-sài ki-lō͘-pek téng-bīn ê Í-sek-lia̍t Siōng-tè ê êng-kng, seng-koân kàu sèng-tiān ê ji̍p-kháu. Siōng-tè kiò hit-ê chhēng iù-môa-pò͘ ê saⁿ, io tòa pit-ba̍k ê lâng lâi.

4Siōng Chú tùi i kóng, “Lí khì, kiâⁿ-thàu choân Iâ-lō͘-sat-léng-siâⁿ, kā hiah-ê ūi-tio̍h siâⁿ-lāi só͘ hoat-seng thang iàm-ò͘ⁿ ê pháiⁿ-sū teh thó͘-khùi thî-khàu ê lâng ê thâu-hia̍h chòe kì-hō.”

5Góa koh thiaⁿ-kìⁿ Siōng Chú tùi kî-tha ê lâng kóng, “Lín tio̍h tè i ê āu-bīn, kiâⁿ-thàu choân-siâⁿ, hē-chhiú thâi-lâng; m̄-bián khó-lîn, m̄-bián thiàⁿ-sioh in.

6Bô-lūn sī lāu-lâng, siàu-liân-lâng, siàu-lú, hū-lú kap gín-á, lóng tio̍h thâi-sí; m̄-kú m̄-thang thâi hiah-ê thâu-hia̍h ū kì-hō ê lâng. Tùi góa ê sèng-só͘ khai-sí hē-chhiú!” Án-ni, in hē-chhiú thâi tī sèng-tiān thâu-chêng ê tiúⁿ-ló.

7I tùi in kóng, “Tio̍h kā sèng-tiān ê tiâⁿ tui-móa si-thé, phah lâ-sâm sèng-tiān. Hiān-chāi chiū khai-sí!” In chiū chhut--khì, khai-sí tī siâⁿ--ni̍h thâi-lâng.

8In tī siâⁿ--ni̍h teh thâi-lâng ê sî, góa chi̍t ê lâng lâu tī sèng-tiān. Góa bīn phak tī thô͘-kha ai-kiû, kóng, “Chì-koân ê Siōng Chú ah, lí chin-chiàⁿ beh chiong lí ê siū-khì piàⁿ-lo̍h tī Iâ-lō͘-sat-léng, kā Í-sek-lia̍t só͘ chhun ê lâng lóng siau-bia̍t sī--bô?”

9I ìn kóng, “Í-sek-lia̍t-lâng kap Iû-tāi-lâng chōe-tāi-ok-ke̍k. Choân-kok ta̍k só͘-chāi lóng ū thâi-lâng lâu-huih ê sū-kiāⁿ; Iâ-lō͘-sat-léng chhiong-móa put-gī. In kóng, ‘Siōng Chú í-keng khì-sak chit-tè thó͘-tōe, I lóng bô teh chhap goán.’

10Só͘-í, góa bô beh khó-lîn, bô beh thiàⁿ-sioh in. In án-chóaⁿ tùi-thāi pa̍t-lâng, góa mā beh án-ni tùi-thāi in.”

11Āu-lâi, hit-ê chhēng iù-môa-pò͘ ê saⁿ, io tòa pit-ba̍k ê lâng tńg--lâi, chiong chiah-ê sū ǹg Siōng Chú pò-kò, kóng, “Góa í-keng chiàu lí ê bēng-lēng khì chòe lah.”

Í-se-kiat-su 9 - 現代台語譯本羅馬字版(TTVR)-闽南语

Learn More About Us