Thoân-tō-su 12

Thoân-tō-su 12 - 現代台語譯本羅馬字版(TTVR)-闽南语

1Tio̍h tī siàu-liân ê sî kì-liām chhòng-chō lí ê Chú. Tī nî-lāu thòng-khó͘ ê ji̍t iáu-bē kàu, chiū-sī lí só͘ kóng “Góa bô khoài-lo̍k” ê nî iáu-bē lâi í-chêng;

2tī ji̍t kap kng, ge̍h kap chhiⁿ iáu-bē piàn àm, hō͘ lo̍h-liáu o͘-hûn iáu-bē koh lâi í-chêng;

3hit-sî, kò͘-chhù ê lâng phi̍h-phi̍h-chhoah, ū-la̍t ê ta-po͘-lâng khiau-ku, oe-bō ê cha-bó͘-lâng kiám-chió soah thêng-kang, tùi thang-á teh khòaⁿ ê hū-jîn-lâng ba̍k-chiu ian-n̄g,

4thàng koe-lō͘ ê tōa-mn̂g koaiⁿ--teh, oe-bō ê siaⁿ jú sòe-siaⁿ, chiáu-á teh háu ê siaⁿ kiông-beh thiaⁿ bô, cha-bó͘ gín-á chhiùⁿ-koa ê siaⁿ teh-beh tiām--khì;

5lâng kiaⁿ peh-koân, kiaⁿ lō͘--ni̍h gûi-hiám m̄-káⁿ chhut-mn̂g; hēng-chhiū khui-hoe, chháu-meh pûi kah bōe thiàu, io̍k-chêng soe-thè; lâng tńg-khì éng-oán ê chhù, kui-tīn sàng-chòng ê lâng tī koe-lō͘ ná kiâⁿ ná háu;

6tī gûn-liān-á iáu-bē tn̄g, kim-óaⁿ iáu-bē phòa, chúi-chôaⁿ piⁿ ê chúi-pân iáu-bē sún-hoāi, chhiūⁿ kó͘-chíⁿ-chúi ê chhia-lûn iáu-bē pháiⁿ--khì,

7thô͘-hún kui-hôe tāi-tōe, lêng-hûn tò-tńg-khì sù oa̍h-miā ê Siōng-tè hia í-chêng, tio̍h kì-liām chhòng-chō lí ê Chú.

8Thoân-tō-chiá kóng, “Khang-hu ê khang-hu, it-chhè lóng sī khang-hu.”

Kiat-lūn

9Thoân-tō-chiá m̄-nā ū tì-hūi, koh kè-sio̍k tùi bîn-chiòng thoân-siū tì-sek; i koh chēng-chēng thiaⁿ, chhâ-khó, chiàu chhù-sū phian-pâi chin chōe chim-giân.

10Thoân-tō-chiá choan-sim chhē kek-lē lâng ê ōe, chèng-khak kì-lio̍k chin-lí ê ōe.

11Tì-hūi ê lâng ê ōe chhin-chhiūⁿ chhì-kùn; phian-chi̍p-chiá ê ōe chhin-chhiūⁿ tèng-tiâu-tiâu ê teng-á, lóng sī tùi kâng chi̍t ê bo̍k-chiá lâi--ê.

12Góa ê kiáⁿ ah, iáu ū chi̍t hāng, lí tio̍h siū khoàn-kài; tù-chheh chōe, bû-kiông-chīn; chheh tha̍k chōe, seng-khu ōe ià-siān.

13Chiah-ê sū lí lóng í-keng thiaⁿ-liáu, kiat-bé lâi kóng, tio̍h kèng-ùi Siōng-tè, kín-sīn siú I ê kài-bēng; che sī choh-lâng èng chīn ê pún-hūn.

14Lâng só͘ chòe ê tāi-chì kap it-chhè pì-bi̍t ê sū, bô-lūn hó á-sī pháiⁿ, Siōng-tè lóng beh sím-phòaⁿ.

Thoân-tō-su 12 - 現代台語譯本羅馬字版(TTVR)-闽南语

Learn More About Us