Sat-bó-ní-kì Hā-koàn 22

Sat-bó-ní-kì Hā-koàn 22 - 現代台語譯本羅馬字版(TTVR)-闽南语

Tāi-pi̍t Khái-soân ê Koa(Si 18)

1Siōng Chú kiù Tāi-pi̍t thoat-lī só͘-ū ê tùi-te̍k kap Sò-lô ê chhiú liáu-āu, i ǹg Siōng Chú liām chit-siú si:

2Siōng Chú sī góa ê soaⁿ-giâm, góa ê iàu-sài, góa ê Chín-kiù-chiá;

3sī góa ê Siōng-tè, góa ê chio̍h-pôaⁿ, góa beh óa-khò I;

I sī góa ê tún-pâi, kiù góa ê khùi-la̍t, góa ê pó-lúi, góa ê pī-lān-só͘.

Góa ê Chín-kiù-chiá, lí ū kiù góa thoat-lī kiông-pō.

4Góa kiû-kiò eng-kai siū chheng-chàn ê Siōng Chú,

góa chiū tit-tio̍h kái-kiù thoat-lī tùi-te̍k.

5Sí-bông ê tōa-éng ûi-khùn góa;

húi-bia̍t ê tōa-chúi hō͘ góa kiaⁿ.

6Im-hú ê soh khún-pa̍k góa;

Sí-bông ê lô-bāng bāng-tio̍h góa.

7Góa tī khó͘-lān tiong kî-kiû Siōng Chú,

tùi góa ê Siōng-tè kiû-kiò;

I tī I ê tiān-lāi thiaⁿ góa ê siaⁿ;

góa ê khún-kiû ū ji̍p I ê hī-khang.

8I siū-khì, tōe chiū iô-choah;

thiⁿ ê kun-ki mā tín-tāng iô koh choah.

9Tùi I ê phīⁿ-khang ū ian chhèng-chhut;

tùi I ê chhùi ū hé hoat-chhut,

liân thô͘-thòaⁿ mā to̍h--khí-lâi.

10I thí-khui thiⁿ, chhin-sin kàng-lîm;

I kha-ē ū kāu-kāu ê o͘-hûn.

11I khiâ thiⁿ-sài ki-lō͘-pek teh pe;

I chē hong ê si̍t hián-hiān.

12I ēng o͘-àm chòe I ún-ba̍t ê só͘-chāi,

ēng chúi kap ba̍t-hûn ûi khí-lâi chòe tiùⁿ-pâng.

13I hoat-chhut ê kng,

hō͘ thòaⁿ to̍h--khí-lâi.

14Siōng Chú tùi thiⁿ-téng tân-lûi,

Chì-koân ê Siōng-tè chhut-siaⁿ.

15I siā-chìⁿ, hō͘ tùi-te̍k sì-sòaⁿ;

I hoat-chhut sih-nà, hō͘ in hūn-loān.

16Siōng Chú chi̍t-ē chek-pī,

phīⁿ-khang ê khùi chi̍t-ē chhut,

hái-tóe chiū lō͘-chhut,

tāi-tōe ê kun-ki mā lō͘-hiān.

17I tùi téng-bīn chhun-chhiú khiú góa,

tùi tōa-chúi kā góa kiù--chhut-lâi.

18I kiù góa thoat-lī hiong-béng ê tùi-te̍k,

thoat-lī oàn-hūn góa ê lâng;

in-ūi in pí góa khah kiông.

19Góa tú-tio̍h chai-lān ê sî, in lâi kong-kek góa;

m̄-kú Siōng Chú sī góa ê óa-khò.

20I chhōa góa kàu khui-khoah an-choân ê só͘-chāi;

I kiù góa, in-ūi I ì-ài góa.

21Siōng Chú in-ūi góa chèng-ti̍t pò-tap góa,

in-ūi góa ê só͘-chòe chheng-khì pò-siúⁿ góa.

22Góa chun-siú Siōng Chú ê tō-lō͘,

m̄-bat choh-pháiⁿ lī-khui góa ê Siōng-tè.

23I só͘-ū ê bēng-lēng góa ū chun-siú;

I ê kui-lē góa m̄-bat pàng-sak.

24Góa tī I ê bīn-chêng bô thang chí-chek;

góa pó-siú ka-kī lī-khui chōe-ok.

25In-ūi góa chèng-ti̍t, Siōng Chú pò-siúⁿ góa;

tī I ê ba̍k-chiu chêng, góa ê só͘-chòe chheng-khì.

26Chû-ài ê lâng, lí ēng chû-ài tùi-thāi i;

sûn-choân ê lâng, lí ēng sûn-choân tùi-thāi i;

27chheng-khì ê lâng, lí ēng chheng-khì tùi-thāi i;

m̄-kú, kan-chà ê lâng, lí ēng oan-khiau tùi-thāi i.

28Khùn-khó͘ ê lâng, lí kái-kiù i;

chū-ko ê lâng, lí te̍k-sī i, kā i kàng-kē.

29Siōng Chú, lí sī góa ê teng;

Siōng Chú kā góa ê o͘-àm pìⁿ-chòe kng-bêng.

30Góa in-ūi óa-khò lí, ōe-tàng kong-phòa te̍k-kun;

óa-khò góa ê Siōng-tè, ōe-tàng thiàu-kè siâⁿ-chhiûⁿ.

31Chit-ūi Siōng-tè, I ê tō-lō͘ oân-choân.

Siōng Chú ê ōe ū kè hé thoàn-liān;

óa-khò I--ê, I chòe tún-pâi pó-hō͘ in.

32Siōng Chú í-gōa, kiám ū pa̍t-ê Siōng-tè?

Goán ê Siōng-tè í-gōa, kiám ū chio̍h-pôaⁿ thang óa-khò?

33Chit-ūi Siōng-tè sī góa kian-kò͘ ê iàu-sài;

I ín-chhōa góa kiâⁿ an-choân ê lō͘.

34I hō͘ góa ê kha chhin-chhiūⁿ lo̍k gâu cháu,

koh hō͘ góa khiā-chāi tī koân ê só͘-chāi.

35I hùn-liān góa ê chhiú gâu kau-chiàn,

hō͘ góa ê chhiú ōe khui tâng ê keng.

36Lí ēng tún-pâi kái-kiù góa;

lí ê pang-chān hō͘ góa kian-kiông.

37Lí hō͘ góa ta̍h ê tōe khui-khoah an-choân;

góa ê kha m̄-bat ta̍h-thu̍t.

38Góa tui góa ê tùi-te̍k kàu jip--tio̍h in;

in bô bia̍t-bông, góa bōe tò-tńg.

39Góa phah in thiám-thiám, hō͘ in peh bōe khí--lâi,

kàu in tó tī góa ê kha-ē.

40Lí sù góa khùi-la̍t hō͘ góa gâu kau-chiàn;

lí hō͘ kong-kek góa ê lâng lóng hâng-ho̍k tī góa ē-bīn.

41Lí hō͘ góa ê tùi-te̍k oa̍t-tńg-sin tô-cháu,

koh hō͘ góa châu-bia̍t oàn-hūn góa ê lâng.

42In kiû-kiò, bô lâng kiù in;

kiû-kiò Siōng Chú, I mā bô ìn.

43Góa kā in tûi kàu chhùi-chhùi, chhin-chhiūⁿ tōe-chiūⁿ ê thô͘-hún,

kā in thún-ta̍h, chhin-chhiūⁿ koe-lō͘ ê thô͘-bê.

44Lí kiù góa thoat-lī hoán-poān góa ê jîn-bîn;

lí pó-hō͘ góa, hō͘ góa chòe lia̍t-pang ê thâu.

Góa m̄-bat ê jîn-bîn ōe ho̍k-sāi góa;

45gōa-pang ê lâng khut-sin tâu-hâng,

in chi̍t-ē thiaⁿ-tio̍h góa ê miâ chiū sūn-ho̍k.

46Gōa-pang ê lâng sit-táⁿ,

kiâⁿ-chhut in ê tīn-tōe, chún-pī beh chok-chiàn.

47Siōng Chú éng-oán oa̍h--teh!

Goān góa óa-khò ê chio̍h-pôaⁿ siū chheng-chàn;

goān kiù góa ê chio̍h-pôaⁿ — Siōng-tè siū ko-kú.

48I chiū-sī ūi góa sin-oan hit-ūi Siōng-tè;

I hō͘ chèng-lâng hâng-ho̍k tī góa kha-ē.

49I kiù góa thoat-lī góa ê tùi-te̍k.

Lí thê-poa̍t góa koân-kè kong-kek góa ê lâng;

lí kiù góa thoat-lī kiông-pō ê lâng.

50Siōng Chú ah, in-ūi án-ni góa beh tī lia̍t-pang tiong kám-siā lí,

chhiùⁿ-koa chheng-chàn lí ê miâ.

51Siōng Chú sù ke̍k-tōa ê kiù-un hō͘ I siat-li̍p ê ông,

si-lo̍h chû-ài hō͘ I boah-iû soán-li̍p ê lâng,

hō͘ Tāi-pi̍t kap i ê hō͘-tāi, ti̍t-kàu éng-oán.

Sat-bó-ní-kì Hā-koàn 22 - 現代台語譯本羅馬字版(TTVR)-闽南语

Learn More About Us