Í-sài-a-su 55

Í-sài-a-su 55 - 現代台語譯本羅馬字版(TTVR)-闽南语

Siōng-tè Beh Si Lîn-bín

1“Chhùi-ta ê lâng, lâi, chia ū chúi!

Bô-chîⁿ ê lâng mā lâi, lâi bóe, lâi chia̍h!

Lâi bóe chiú, bóe lin!

M̄-bián chîⁿ, m̄-bián tāi-kè.

2Ná tio̍h khai-chîⁿ bóe bōe-chia̍h--tit ê mi̍h?

Ná tio̍h ēng lô-khó͘ thàn ê chîⁿ bóe chia̍h bōe pá ê mi̍h?

Lín chù-ì thiaⁿ góa kóng, chiū ū hó-mi̍h thang chia̍h,

thang hióng-siū siōng-hó ê chia̍h-mi̍h, hō͘ lín boán-chiok.

3“Lín tio̍h àⁿ hī-khang thiaⁿ, lâi chiū-kūn góa;

tio̍h thiaⁿ, lín chiah ōe oa̍h.

Góa beh kap lín li̍p éng-oán ê iok,

hō͘ lín tit-tio̍h góa èng-ún Tāi-pi̍t hit-ê khak-si̍t put-piàn ê thiàⁿ.

4Góa ū chí-phài i chòe bān-kok ê kiàn-chèng-jîn,

chòe bān-bîn ê léng-siù thóng-tī in.

5Lí khòaⁿ, lí ōe tiàu-chi̍p lí í-chêng m̄-bat ê kok-bîn;

m̄ bat lí ê kok-bîn lóng ōe chông-lâi tâu-khò lí.

Siōng Chú — lí ê Siōng-tè beh chhiok-sêng chit-ê sū;

Í-sek-lia̍t sîn-sèng ê Siōng-tè beh hō͘ lí siū chun-tiōng, tit-tio̍h êng-iāu.”

6Tio̍h thàn Siōng Chú chhē ōe tio̍h ê sî, chhē-kiû I;

thàn I tī sin-piⁿ ê sî, kiû-kiò I.

7Siâ-ok ê lâng tio̍h khì-sak in ê tō-lō͘;

put-gī ê lâng tio̍h kái-piàn in ê siūⁿ-hoat.

In tio̍h kui-ǹg Siōng Chú, I ōe lîn-bín in;

tio̍h kui-ǹg lán ê Siōng-tè, I ōe khoan-hông sià-bián in.

8Siōng Chú kóng,

“Góa ê ì-liām m̄-sī lín ê ì-liām;

góa ê tō-lō͘ m̄-sī lín ê tō-lō͘.

9Thiⁿ pí tōe khah koân,

siâng-khoán, góa ê tō-lō͘ pí lín ê tō-lō͘ khah koân,

góa ê ì-liām mā pí lín ê ì-liām khah koân.

10“Chhin-chhiūⁿ hō͘ kap seh tùi thiⁿ kàng-lo̍h, bô koh tò-tńg,

beh lūn-te̍k tāi-tōe,

hō͘ ngó͘-kok puh-íⁿ tōa-châng,

hō͘ iā-chéng--ê ū chéng-chí, hō͘ lâng ū bí-niû;

11tùi góa ê chhùi kóng-chhut ê ōe mā ōe án-ni;

góa ê ōe choa̍t-tùi ōe si̍t-hiān, bōe lo̍k-khong.

Góa ê ōe beh oân-sêng góa ê kè-ōe;

góa ê ōe beh sêng-chiū góa ài chòe ê tāi-chì.

12“Lín ōe hoaⁿ-hoaⁿ-hí-hí lī-khui,

siū ín-chhōa pêng-pêng-an-an tńg--khì.

Tōa-soaⁿ sió-soaⁿ ōe tī lín bīn-chêng chhut-siaⁿ chhiùⁿ-koa;

chhân-iá ê chhiū-ba̍k ōe phah-pho̍k-á hoaⁿ-hí.

13Í-chêng ū chhì-phè ê só͘-chāi ōe hoat chhêng-peh;

ū chháu-chhì ê só͘-chāi ōe hoat tiông-chheng-chhiū.

Che beh chòe éng-kiú put-bia̍t ê kì-hō,

hō͘ lín ōe-kì-tit Siōng Chú ê chok-ûi.”

Í-sài-a-su 55 - 現代台語譯本羅馬字版(TTVR)-闽南语

Learn More About Us