Hô-se-a-su 4

Hô-se-a-su 4 - 現代台語譯本羅馬字版(TTVR)-闽南语

Siōng Chú Khòng-kò Í-sek-lia̍t-lâng

1 Í-sek-lia̍t-lâng, tio̍h thiaⁿ Siōng Chú ê ōe;

Siōng Chú beh khòng-kò chit-tè tōe ê chū-bîn,

in-ūi in bô sêng-si̍t, bô jîn-chû, bô lâng chin-chiàⁿ bat Siōng-tè,

2kan-ta teh lām-sám chiù-chōa, pōe-iok, hiong-sat,

thau-the̍h, kan-îm, kiông-pō, kè-sio̍k thâi-lâng lâu-huih.

3In-ūi án-ni, chit-ê tōe ōe ta--khì;

só͘-ū tòa tī chia--ê, liân chhân-iá ê siù, khong-tiong ê chiáu lóng ōe siau-bia̍t,

hái--ni̍h ê hî mā ōe bô--khì.

Siōng Chú Chek-pī Chè-si

4M̄-thang hō͘-siōng khòng-kò, m̄-thang pí-chhú chí-chek;

góa chek-pī--ê sī lín chiah-ê chòe chè-si--ê.

5Ji̍t--sî, lín ōe poa̍h-tó,

mî--sî, sian-ti mā ōe kap lín siâng-khoán poa̍h-tó;

góa beh siau-bia̍t lín ê jîn-bîn.

6Góa ê chú-bîn in-ūi bû-ti bia̍t-bông;

lín m̄ sêng-jīn góa,

góa mā m̄ sêng-jīn lín chòe chè-si.

Kì-jiân lín khì-sak lín ê Siōng-tè ê lu̍t-hoat,

góa mā it-tēng beh khì-sak lín ê kiáⁿ-sun.

7Lín chè-si ê jîn-sò͘ jú chōe jú tek-chōe góa;

só͘-í góa beh hō͘ lín ê chun-êng pìⁿ-chòe kiàn-siàu.

8Lín ài góa ê chú-bîn hoān khah-chōe ê chōe,

thang tit-tio̍h khah chōe sio̍k-chōe ê chè-mi̍h.

9Án-ni, lín chè-si ōe kap jîn-bîn siâng-khoán siū hêng-hoa̍t;

góa beh chiàu lín ê só͘-chòe pān lín, chiàu lín ê hêng-ûi pò-èng lín.

10Lín chia̍h, chia̍h bōe pá;

kiâⁿ-îm, seng-sán mā bōe cheng-ka;

in-ūi lín khì-sak Siōng Chú, khì tè pa̍t-ê sîn-bêng.

Siōng Chú khiàn-chek Pài Ngó͘-siōng

11Chiú kap sin-chiú ōe hō͘ lâng sit-khì liông-ti.

12Góa ê chú-bîn khì mn̄g chhâ-thâu,

thiu-chhiam pok-kòa kiû chí-sī;

îm-loān ê sîn chhōa in lī-khui chiàⁿ-lō͘,

in kiâⁿ-îm pōe-poān in ê Siōng-tè.

13In tī soaⁿ-téng hiàn-chè, tī soaⁿ-lûn-á sio-hiuⁿ,

tī hia ū siōng-chhiū, iông-chhiū, siông-chiat-chhiū liâng-sóng ê ìm-ńg.

In-ūi án-ni, lín ê cha-bó͘-kiáⁿ îm-loān, lín ê sin-pū hoān kan-îm.

14Sui-jiân lín ê cha-bó͘-kiáⁿ îm-loān, lín ê sin-pū hoān kan-îm,

góa bōe kā in hêng-hoa̍t,

in-ūi lín chiah-ê ta-po͘-lâng khì kap chhiong-ki lēng-gōa tòa,

kap sī-biō ê ki-lú tàu-tīn hiàn-chè;

chit-khoán bû-ti ê jîn-bîn it-tēng bia̍t-bông.

15Sui-jiân Í-sek-lia̍t îm-loān,

m̄-kú Iû-tāi m̄-thang hoān-chōe.

M̄-thang khì Kiat-kah,

m̄-thang chiūⁿ-khì Pek A-bûn,

m̄-thang kí éng-oa̍h ê Siōng Chú chiù-chōa.

16 Í-sek-lia̍t kò͘-chip chhin-chhiūⁿ ngī-phīⁿ ê gû-bú;

Siōng Chú kiám ōe iúⁿ-chhī in, chhin-chhiūⁿ tī khui-khoah ê só͘-chāi iúⁿ-chhī iûⁿ?

17Kì-jiân Í-hoat-liân

kap ngó͘-siōng kiat-liân, chhut-chāi in khì!

18In lim kah chùi-bâng-bâng koh kè-sio̍k kiâⁿ-îm;

in ài kiàn-siàu, bô ài êng-ū.

19Hong ōe ēng si̍t kā in kńg--khì;

in hiàn hō͘ ngó͘-siōng ê chè-sū ōe hō͘ in tì-kàu kiàn-siàu.

Hô-se-a-su 4 - 現代台語譯本羅馬字版(TTVR)-闽南语

Learn More About Us