Ná-hông-su 2 - 現代台語譯本羅馬字版(TTVR)-闽南语

Nî-nî-bî Tó-hoāi

1 Nî-nî-bî, hit-ê beh phah-chhùi lia̍t-kok--ê í-keng chhut-peng kong-kek lín;

tio̍h kò͘-siú pó-lúi, hông-pī iàu-tō,

chi̍p-tiong le̍k-liōng, chún-pī èng-chiàn.

2Sui-jiân te̍k-jîn ū kā Ngá-kok chhiúⁿ-kiap,

húi-hoāi Í-sek-lia̍t ê phû-tô-hn̂g,

Siōng Chú beh hôe-ho̍k in ê êng-kng,

hôe-ho̍k in ê hoân-êng.

3I ê ióng-sū gia̍h âng ê tún-pâi,

chiàn-sū lóng chhēng chu-âng-sek ê chè-ho̍k;

tī kau-chiàn ê ji̍t, chiàn-chhia ê kǹg-thih chhin-chhiūⁿ hé iām-iām-sih,

in gia̍h chhiuⁿ bú-lâi-bú-khì.

4Chiàn-chhia tī koe-lō͘ khoài-sok ti̍t-chhiong,

tī khui-khoah ê só͘-chāi chông-chêng-chông-āu;

in khòaⁿ--khí-lâi chhin-chhiūⁿ hé-pé,

chhiong-lâi-chhiong-khì chhin-chhiūⁿ sih-nà.

5Kun-koaⁿ siū tiàu-chi̍p, chhiⁿ-chhiⁿ-pōng-pōng kóaⁿ óa--lâi,

piàⁿ kàu siâⁿ-chhiûⁿ téng, chiong hông-ōe ê tòng-pâi chhāi--khí-lâi.

6Chúi-mn̂g lóng phah-khui,

kiong-tiān chhiong bô--khì.

7Ông-hō͘ siū lêng-jio̍k hō͘ lâng lia̍h--khì;

kiong-lú tûi-heng, ai-khàu chhin-chhiūⁿ hún-chiáu ê siaⁿ.

8 Nî-nî-bî chá-chêng chhin-chhiūⁿ tóe-chúi ê chúi-tî,

taⁿ lâng it-ti̍t tô-cháu--chhut-khì;

ū lâng hoah “Thêng leh, thêng leh”,

m̄-kú bô lâng oa̍t tò-tńg--lâi.

9Chhiúⁿ o͘h, chhiúⁿ i ê gûn!

Kiap i ê kim!

Siâⁿ-lāi ū sǹg bōe liáu ê châi-pó,

ū ta̍k-khoán ê pó-pòe.

10 Nî-nî-bî lóng khang-khang lah, bia̍t-bông lah, hong-hòe lah!

Lâng ê sim sit-táⁿ, kha-thâu-u phi̍h-phi̍h-chhoah, io bô-la̍t, bīn chhiⁿ-sún-sún.

11Sai ê tōng-hia̍t, sai-á-kiáⁿ chia̍h-mi̍h ê só͘-chāi tī tó-ūi?

Liân sai-kang, sai-bú, sai-á-kiáⁿ sì-kòe kiâⁿ, bô siū heh-kiaⁿ ê só͘-chāi mā lóng bô--khì lah.

12Sai-kang ūi-tio̍h sai-á-kiáⁿ thiah-li̍h kàu-gia̍h ê chia̍h-mi̍h,

ūi-tio̍h sai-bú kā-sí la̍h-bu̍t;

i chiong thiah-li̍h--ê tún-móa i ê tōng,

chiong kā--tio̍h-ê, chek-móa i ê hia̍t.

13Siōng Chú — Bān-kun ê Thóng-sòe kóng,

“Lí khòaⁿ, góa beh kong-kek lí,

pàng-hé sio-húi lí ê chiàn-chhia,

ēng to-kiàm thâi-sí lí ê chiàn-sū.

Góa beh tùi tōe-chiūⁿ húi-tiāu lí ê chiàn-lī-phín;

lâng bōe koh thiaⁿ-tio̍h lí ê sù-chiá ê siaⁿ.”

Learn More About Us