Si-phian 16 - 現代台語譯本羅馬字版(TTVR)-闽南语

Tāi-pi̍t ê kim-si.Sìn-khò ê Kî-tó

1Siōng-tè ah, kiû lí pó-hō͘ góa,

in-ūi lí sī góa ê pī-lān-só͘.

2Góa bat tùi Siōng Chú kóng, “Lí sī góa ê Chú;

chí-ū lí sī góa hēng-hok ê goân-thâu.”

3Tōe-chiūⁿ ê sèng-tô͘ si̍t-chāi chin chun-kùi;

kap in chòe-hé sī góa siōng-tōa ê hoaⁿ-hí.

4Khì tè pa̍t-ê sîn-bêng ê lâng it-tēng ke-thiⁿ thòng-khó͘!

Góa m̄ chham-ú in ê hiàn-chè,

mā m̄ kèng-pài in ê sîn-bêng.

5Siōng Chú, lí sī góa ê sán-gia̍p, góa ê hok-poe;

lí kò͘-siú góa èng-tit ê hūn-gia̍h.

6Lí chiong chin súi ê thó͘-tōe pun hō͘ góa;

góa tit--tio̍h ê sán-gia̍p si̍t-chāi chin hó!

7Góa beh chheng-chàn kà-sī góa ê Siōng Chú;

mî--sî, góa ê sim chí-tiám góa.

8Góa put-sî kám-siū Siōng Chú ê tông-chāi;

I tī góa ê chiàⁿ-pêng, góa bōe tōng-iâu.

9Só͘-í, góa ê sim hoaⁿ-hí, góa ê sîn khoài-lo̍k;

góa ê jio̍k-thé an-jiân chū-chāi.

10In-ūi lí bōe kā góa pàng-sak tī Im-hú,

mā bōe hō͘ lí tiong-sêng ê chú-bîn lo̍h-khì Chhim-ian.

11Lí ōe chí-sī góa oa̍h-miā ê tō-lō͘.

Tī lí bīn-chêng, góa ū móa-móa ê hoaⁿ-hí;

tī lí chiàⁿ-pêng, góa ū éng-oán ê khoài-lo̍k.

Learn More About Us