Ai-ko 2

Ai-ko 2 - 現代台語譯本羅馬字版(TTVR)-闽南语

Siōng Chú Hêng-hoa̍t Iâ-lō͘-sat-léng

1Ài ah! Siōng Chú kèng-jiân hoat tōa siū-khì, hō͘ Sek-an kiàn-siàu!

I chiong Í-sek-lia̍t ê êng-hôa tùi thiⁿ hiat-lo̍h tōe;

tī I siū-khì ê ji̍t,

liân ka-kī ê kha-tiam, sèng-tiān, I mā bô kò͘-liām.

2Siōng Chú húi-bia̍t Ngá-kok lóng-chóng ê chháu-po͘,

chi̍t-sut-á to bô lîn-bín.

I hoat tōa siū-khì, thiah-húi Iû-tāi ê pó-lúi,

hō͘ Iû-tāi kap i ê léng-siù thiat-tóe siū lêng-jio̍k.

3I hoat tōa siū-khì, siau-bia̍t Í-sek-lia̍t só͘-ū ê khùi-la̍t;

tùi-te̍k lâi ê sî, I m̄ chhun-chhiú pó-hō͘.

I chhin-chhiūⁿ hé-iām thun-bia̍t Ngá-kok,

chiong i só͘-ū--ê lóng sio-húi.

4I chhin-chhiūⁿ tùi-te̍k ǹg góa khui keng,

chhin-chhiūⁿ te̍k-jîn ēng chìⁿ siā góa.

I chiong goán ióng-chòng ê siàu-liân-lâng lóng thâi-sí;

I ê tōa siū-khì hoat-chhut, chhin-chhiūⁿ hé sio-húi Sek-an ê pò͘-pîⁿ.

5Siōng Chú chhin-chhiūⁿ tùi-te̍k, húi-bia̍t Í-sek-lia̍t;

I thiah-húi Í-sek-lia̍t ê kiong-tiān,

hō͘ pó-lúi hong-hòe;

I ke-thiⁿ Iû-tāi jîn-bîn ê pi-siong kap ai-khàu.

6I húi-hoāi I ka-kī khiā-khí ê só͘-chāi, chhin-chhiūⁿ húi-hoāi hn̂g-á;

I thiah-húi sèng-tiān.

Siōng Chú hō͘ Sek-an ê lâng bōe-kì-tit choeh-kî kap An-hioh-ji̍t;

I tī tōa siū-khì tiong khì-sak kun-ông kap chè-si.

7Siōng Chú hòng-khì ka-kī ê chè-tôaⁿ,

pàng-sak I ê sèng-só͘;

I chiong kiong-tiān ê ûi-chhiûⁿ kau hō͘ tùi-te̍k, chhut-chāi in thiah-húi.

In tī Siōng Chú ê tiān-lāi,

tōa-siaⁿ soan-hoa, chhin-chhiūⁿ teh kè-choeh.

8Siōng Chú koat-tēng beh thiah-húi Sek-an ê siâⁿ-chhiûⁿ;

I giú chún-chîn, beh phò-hoāi;

I ê chhiú bô koh siu-hôe.

I hō͘ siâⁿ-lâu kap siâⁿ-chhiûⁿ ai-khàu,

chòe-hé tó-hoāi.

9 Sek-an ê siâⁿ-mn̂g í-keng tâi tī thô͘--ni̍h;

Siōng Chú kòng-tn̄g siâⁿ-mn̂g ê mn̂g-chhòaⁿ.

Kun-ông kap léng-siù lóng siū hòng-tio̍k khì lia̍t-kok.

Sek-an bô lâng káng-kái lu̍t-hoat;

sian-ti bô koh tùi Siōng Chú tit-tio̍h īⁿ-siōng.

10 Sek-an ê tiúⁿ-ló chē tī thô͘-kha,

tiām-tiām bô chhut-siaⁿ.

In iā thô͘-soa-hún sám thâu-khak, seng-khu chhēng môa-saⁿ;

Iâ-lō͘-sat-léng ê siàu-lú thâu-lôe-lôe tàm kàu thô͘-kha.

11Góa ê ba̍k-chiu in-ūi lâu ba̍k-sái sit-bêng,

góa ê tn̂g-á kiáu-ká,

góa ê ngó͘-chōng siau-iûⁿ;

góa ê tông-pau siū châu-bia̍t,

gín-á kap eⁿ-á hūn-tó tī siâⁿ-lāi ê kóng-tiûⁿ.

12In chhin-chhiūⁿ siū-siong ê chiàn-sū hūn-tó tī kóng-tiûⁿ,

tī lāu-bú ê heng-chêng bān-bān tn̄g-khùi;

in mn̄g lāu-bú, kóng:

Ū sím-mi̍h thang chia̍h--bô? Ū sím-mi̍h thang lim--bô?

13 Iâ-lō͘-sat-léng, góa ōe-tàng thòe lí kóng sím-mi̍h?

Góa ōe-tàng ēng sím-mi̍h pí-phēng lí?

Sek-an, góa thang ēng sím-mi̍h kap lí pí-kàu lâi an-ùi lí?

Lí ê khang-chhùi chhin-chhiūⁿ hái hiah-ni̍h tōa,

siáⁿ-lâng ōe-tàng kā lí i-tī?

14Lí ê sian-ti khòaⁿ--kìⁿ-ê sī bô-iáⁿ-chiah, phiàn--lâng ê īⁿ-siōng;

in m̄-bat chí-chhut lí ê chōe,

hō͘ lí hóe-kái, m̄-bián siū lia̍h;

in thoân hō͘ lí--ê sī hu-ké, kiâⁿ bê-lō͘ ê be̍k-sī.

15Só͘-ū ê kè-lō͘-lâng lóng phah-pho̍k-á,

hàiⁿ-thâu thí-chhiò Iâ-lō͘-sat-léng, kóng:

Che kiám sī lâng teh kóng hit-ê si̍p-choân-si̍p-bí ê siâⁿ?

Che kiám sī choân sè-kài ê lâng lóng teh o-ló ê siâⁿ?

16Só͘-ū ê tùi-te̍k lóng kā lí phì-siùⁿ;

in thí-chhiò lí, kā-gê-chhiat-chhí kóng:

Goán í-keng chiong i thun-bia̍t lah!

Goán chiū-sī teh thèng-hāu chit-ji̍t!

Taⁿ goán chhin-ba̍k khòaⁿ--tio̍h lah!

17Siōng Chú í-keng oân-sêng I ê kè-ōe,

si̍t-hiān I chá-chêng tiāⁿ-tio̍h ê kéng-kò;

I thiah-húi, chi̍t-sut-á to bô liû-chêng.

I hō͘ tùi-te̍k tùi lí khoa-kháu,

hō͘ in iāu-bú-iông-ui.

18Tio̍h tùi sim-tóe kiû-kiò Chú!

Iâ-lō͘-sat-léng ê siâⁿ-chhiûⁿ ah,

goān lí ê ba̍k-sái chhin-chhiūⁿ kang-hô ti̍t-ti̍t lâu, mî-ji̍t bô-thêng!

Goān lí ê ba̍k-chiu lâu ba̍k-sái bô hioh-khùn!

19Tio̍h tī ta̍k-àm ōaⁿ-kiⁿ ê sî khí-lâi kiû-kiò;

ǹg Siōng Chú thò͘-lō͘ lí ê sim-siaⁿ chhin-chhiūⁿ piàⁿ-chúi;

tio̍h gia̍h siang-chhiú ūi-tio̍h lín ê gín-á ê sìⁿ-miā kî-tó,

in tī koe-lō͘ iau kah teh-beh sí--khì.

20Siōng Chú, kiû lí khòaⁿ,

khòaⁿ lí kiám bat án-ni kā lâng chek-hoa̍t--kè?

Hū-jîn-lâng kiám thang chia̍h ka-kī só͘ siⁿ só͘ iúⁿ-chhī ê eⁿ-á?

Chè-si kap sian-ti ná thang tī Siōng Chú ê sèng-tiān siū sat-hāi?

21Siàu-liân-lâng kap lāu-lâng lóng tó tī koe-lō͘;

siàu-lú kap chheng-liân-lâng lóng sí tī to-ē.

Lí tī siū-khì ê ji̍t kā in thâi-sí,

chi̍t-sut-á to bô liû-chêng.

22Lí tùi sì-bīn tiàu-chi̍p góa ê tùi-te̍k,

chhin-chhiūⁿ kiò lâng lâi kè-choeh.

Tī Siōng Chú siū-khì ê ji̍t,

bô lâng ōe-tàng tô-thoat,

ōe-tàng pó-chûn sìⁿ-miā;

tùi-te̍k thâi-sí góa só͘-ū ióng-io̍k ê jî-lú.

Ai-ko 2 - 現代台語譯本羅馬字版(TTVR)-闽南语

Learn More About Us