Í-sài-a-su 15 - 現代台語譯本羅馬字版(TTVR)-闽南语

Siōng-tè Beh Húi-bia̍t Mô͘-ap

1Che sī iú-koan Mô͘-ap ê sìn-sit:

Mô͘-ap ê A-ní hong-hòe,

tī chi̍t mî ê tiong-kan lóng bô--khì lah!

Mô͘-ap ê Ki-ní hong-hòe,

tī chi̍t mî ê tiong-kan lóng bô--khì lah!

2 Tí-pún ê jîn-bîn chiūⁿ-khì in ê sī-biō,

tī hia thî-khàu.

Mô͘-ap-lâng ūi-tio̍h Nî-pho kap Bí-tí-pa ai-khàu.

Só͘-ū ê lâng thâu-khak thì-kng-kng;

ta̍k-ê lâng ê chhùi-chhiu thì-liáu-liáu.

3In tī koe-lō͘ lóng hâ môa-pò͘,

tī kóng-tiûⁿ kap ka-kī ê chhù-bé-téng thî-khàu,

ba̍k-sái chha̍p-chha̍p-tih.

4 Hi-si̍t-pún kap Í-lī-a-lī chhut-siaⁿ khàu;

in pi-ai ê siaⁿ tī Ngá-cha̍p to thiaⁿ ōe tio̍h.

Só͘-í, Mô͘-ap bú-chong ê kun-jîn tōa-siaⁿ hoah;

in ê sim sit-táⁿ, ngia̍uh-ngia̍uh-chhoah.

5Góa ê sim ūi-tio̍h Mô͘-ap thî-khàu;

in ê lān-bîn tô-cháu khì Só-ní,

kàu I-ki-la Si-lī-si-a.

In peh-chiūⁿ Ló͘-hi ê soaⁿ-phiâⁿ, ná peh ná khàu;

in tô-cháu khì Hô-lô-liām, in-ūi siū húi-bia̍t tōa-siaⁿ ai-khàu.

6 Lêng-lîm-khoe ê chúi ta--khì;

khoe-piⁿ ê chháu lian--khì,

chhài-soe sí--khì,

chhiⁿ-chhùi ê mi̍h lóng bô--khì.

7Só͘-í, in tit--tio̍h ê châi-bu̍t,

só͘-ū tún-chek ê mi̍h-kiāⁿ,

lóng ōe poaⁿ-khì Liú-chhiū-khoe hit-pêng.

8In-ūi ai-chhám ê siaⁿ í-keng thoân-piàn Mô͘-ap sù-kéng;

thî-khàu ê siaⁿ thàng kàu Í-ki-liân,

thoân kàu Pí-ní Í-lîm.

9 Tí-bûn hô-liû ê chúi lóng sī huih;

m̄-kú, góa Siōng-tè beh ke-thiⁿ Tí-bûn ê chai-lān,

ū sai lâi tui-jip Mô͘-ap ê lān-bîn

kap hit só͘-chāi liû-bông sí-bô-khì ê lâng.

Learn More About Us