Si-phian 5 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ; ēng pûn ê ga̍k-khì phōaⁿ-chàu.Kî-kiû Pó-hō͘ ê Chá-tó

1Siōng Chú ah, kiû lí thiaⁿ góa kóng,

chai góa ê khó͘-chêng.

2Góa ê Ông, góa ê Siōng-tè ah,

kiû lí thiaⁿ góa kiû-kiò ê siaⁿ, in-ūi góa tùi lí kî-tó.

3Siōng Chú ah, chá-khí-sî kiû lí thiaⁿ góa ê siaⁿ;

chá-khí-sî góa tùi lí khún-kiû, koh thèng-hāu.

4In-ūi lí m̄-sī ì-ài chōe-ok ê Siōng-tè;

siâ-ok, lí bōe iông-ún.

5Kiau-ngō͘ ê lâng bōe-tàng khiā tī lí bīn-chêng;

chòe pháiⁿ ê lâng lóng sī lí só͘ oàn-hūn.

6Kóng pe̍h-chha̍t--ê, lí beh bia̍t in;

thâi-lâng kap kan-chà--ê, lóng sī Siōng Chú só͘ iàm-ò͘ⁿ.

7M̄-kú in-ūi lí hong-sēng ê chû-ài, góa ōe-tàng ji̍p lí ê tiān,

sim chûn kèng-ùi, tī lí ê sèng-tiān kèng-pài.

8Siōng Chú ah, tùi-te̍k teh tng-tán góa,

kiû lí chiàu lí ê kong-gī, chhōa góa kiâⁿ chèng-ti̍t ê lō͘.

9In ê chhùi bô láu-si̍t,

in ê sim ok-to̍k móa-móa,

in ê nâ-âu sī khui-khui ê bōng,

in ê chi̍h gâu phô͘-tháⁿ.

10Siōng-tè ah, kiû lí tēng in ê chōe,

hō͘ in hām-lo̍h ka-kī ê kè-bô͘;

in-ūi in pōe-poān lí, chōe-kò chin tāng,

kiû lí kā in kóaⁿ-chhut.

11Só͘-ū chhē lí chòe pī-lān-só͘--ê, kiû lí hō͘ in hoaⁿ-hí,

hō͘ in hoaⁿ-hí chhut-siaⁿ bô-thêng, in-ūi lí pì-iū in.

Goān hiah-ê ì-ài lí ê miâ ê lâng lóng in-ūi lí hoaⁿ-hí khoài-lo̍k.

12Siōng Chú ah, lí beh sù-hok hō͘ gī-lâng;

lí beh ēng un-hūi, chhin-chhiūⁿ tún-pâi sì-bīn ûi in.

Learn More About Us