Má-thài Hok-im 11

Má-thài Hok-im 11 - 現代台語譯本羅馬字版(TTVR)-闽南语

Si-sóe-chiá Iok-hān Chhe Bûn-tô͘ Khì Kìⁿ Iâ-so͘(Lō͘ 7.18-35)

1Iâ-so͘ kà-sī cha̍p-jī ê bûn-tô͘ í-āu lī-khui hit só͘-chāi, khì hù-kūn ê siâⁿ-chhī kà-sī lâng kap thoân hok-im.

2 Iok-hān tī kaⁿ--ni̍h thiaⁿ-tio̍h Ki-tok só͘ chòe ê sū, chiū chhe i ê bûn-tô͘ khì

3mn̄g I, “Lí chiū-sī teh-beh lâi Hit-ūi, á-sī goán tio̍h thèng-hāu pa̍t-lâng?”

4Iâ-so͘ ìn kóng, “Lín chiong só͘ thiaⁿ--tio̍h, só͘ khòaⁿ--tio̍h-ê khì kā Iok-hān kóng,

5chiū-sī sit-bêng ê lâng koh khòaⁿ--kìⁿ, kha-pái ê lâng kiâⁿ-lō͘, bâ-hong pīⁿ-lâng chheng-khì, hī-khang bōe thiaⁿ--kìⁿ ê lâng thiaⁿ--kìⁿ, sí-lâng koh-oa̍h, sàn-chhiah-lâng ū hó-siau-sit thoân hō͘ in.

6Tùi góa bô sit-khì sìn-sim ê lâng chin ū hok-khì!”

7 Iok-hān ê bûn-tô͘ lī-khui liáu-āu, Iâ-so͘ chiah tùi kûn-chiòng kóng-khí Iok-hān ê sū. I kóng, “Lín chhut-khì khòng-iá sī beh khòaⁿ sím-mi̍h? Beh khòaⁿ hō͘ hong chhe iô-lâi-iô-khì ê lô͘-úi sī--bô?

8Nā m̄-sī, lín chhut--khì beh khòaⁿ sím-mi̍h? Beh khòaⁿ chhēng ko-kùi i-ho̍k ê lâng sī--bô? Lín khòaⁿ, chhēng ko-kùi i-ho̍k ê lâng sī tī ông-kiong.

9Án-ni, lín chhut--khì beh khòaⁿ sím-mi̍h? Beh khòaⁿ sian-ti sī--bô? Sī, m̄-kú góa kā lín kóng, i pí sian-ti koh-khah úi-tāi.

10Koan-hē Iok-hān, Sèng-keng ū án-ni kì-chài:

Khòaⁿ ah, góa chhe góa ê sù-chiá chòe lí ê sian-hong;

i beh tī lí ê thâu-chêng kā lí khui-lō͘.

11“Góa si̍t-chāi kā lín kóng, hū-jîn-lâng só͘ siⁿ--ê bô chi̍t ê pí Si-sóe-chiá Iok-hān khah úi-tāi; m̄-kú, tī Thian-kok siōng bî-sòe--ê iáu pí i koh-khah úi-tāi.

12Tùi Si-sóe-chiá Iok-hān ê ji̍t kàu hiān-chāi, Thian-kok it-ti̍t siū kiông-lia̍t ê kong-kek, hiong-béng ê lâng ēng pō-le̍k kā i chhiúⁿ--khì.

13Sian-ti kap Lu̍t-hoat só͘-ū ê ū-giân kàu Iok-hān ûi-chí.

14Lín nā goān-ì chiap-siū chiah-ê ū-giân, chiū ōe bêng-pe̍k Iok-hān chiū-sī hit-ê teh-beh lâi ê Í-lī-a.

15Ū hī-khang--ê, tio̍h thiaⁿ!

16“Góa beh ēng sím-mi̍h pí-phēng chit sè-tāi? In chhin-chhiūⁿ chi̍t tīn gín-á chē tī chhī-tiûⁿ-kháu tùi lēng-gōa chi̍t tīn hoah:

17Goán tùi lín pûn phín-á, lín bô thiàu-bú!

Goán chhiùⁿ ai-ko, lín mā bô pi-siong!

18 Iok-hān lâi, bô chia̍h bô lim, lâng chiū kóng, ‘I hō͘ kúi hū-sin!’

19Jîn-chú lâi, mā chia̍h mā lim, lâng chiū kóng, ‘I sī tham-chia̍h hò͘ⁿ-chiú ê lâng, sī ba̍uh-sè--ê kap chōe-jîn ê pêng-iú!’ Put-kò, si̍t-chāi ê tì-hūi tùi hêng-ûi tit-tio̍h chèng-si̍t.”

Chek-pī Bô Hóe-kái ê Siâⁿ(Lō͘ 10.13-15)

20Iâ-so͘ ū tī chi̍t-kóa siâⁿ-chhī kiâⁿ chin chōe sîn-jiah, m̄-kú hiah-ê siâⁿ-chhī ê lâng lóng bô hóe-kái, I chiū kā in chek-pī.

21I kóng, “Ko-lia̍p-sìn, lí chhám ah! Pek-sài-tāi, lí chhám ah! Góa tī lín tiong-kan kiâⁿ ê sîn-jiah nā tī Thài-ní kap Se-tùn kiâⁿ, in chá chiū chhēng môa-saⁿ sám hé-hu hóe-kái lah.

22Góa kā lín kóng, tī Sím-phòaⁿ ê Ji̍t, Thài-ní kap Se-tùn siū ê hêng-hoa̍t ōe pí lín tio̍h siū--ê khah hó jím-siū.

23Lí leh, Ka-pek-lông,

Lí ài lâng kā lí hû-chiūⁿ thiⁿ sī--bô?

Bōe, Siōng-tè ōe kā lí hiat-lo̍h Im-hú.

Tī lí hia kiâⁿ ê sîn-jiah nā tī Só͘-to-má kiâⁿ, Só͘-to-má it-tēng iáu lâu kàu kin-á-ji̍t.

24Chóng-sī góa kā lín kóng, tī Sím-phòaⁿ ê Ji̍t, Só͘-to-má tōe-khu siū ê hêng-hoa̍t pí lí tio̍h siū--ê khah hó jím-siū.”

Lâi Góa Chia Tit An-hioh(Lō͘ 10.21-22)

25Hit-sî, Iâ-so͘ kóng, “Pē ah, thiⁿ-tōe ê Chú, góa kám-siā lí, in-ūi lí ū chiong chiah-ê sū tùi ū tì-hūi ū ha̍k-būn ê lâng khàm--khí-lâi, m̄-kú tùi sòe-hàn gín-á khé-sī.

26Pē ah, sī lah, in-ūi che sī lí ê hó chí-ì.

27“Góa ê Pē í-keng ū chiong it-chhè lóng kau-thok góa. Pē í-gōa bô lâng bat Kiáⁿ; Kiáⁿ kap Kiáⁿ ài-beh khé-sī ê lâng í-gōa mā bô lâng bat Pē.

28“Lô-khó͘ pē tāng-tàⁿ ê lâng lóng tio̍h lâi góa chia, góa beh hō͘ lín an-hioh.

29Tio̍h pē góa ê taⁿ, lâi tùi góa o̍h, in-ūi góa ê sim un-jiû khiam-sùn. Án-ni, lín ê sim-sîn chiū ōe tit-tio̍h an-hioh.

30Góa ê taⁿ ha̍h-ēng, góa ê tàⁿ chin khin.”

Má-thài Hok-im 11 - 現代台語譯本羅馬字版(TTVR)-闽南语

Learn More About Us