Si-phian 55

Si-phian 55 - 現代台語譯本羅馬字版(TTVR)-闽南语

Tāi-pi̍t kà-sī ê si, kau hō͘ sèng-ga̍k-tiúⁿ; ēng hiân ê ga̍k-khì phōaⁿ-chàu.Siū Chhut-bōe ê Lâng ê Kî-tó

1Siōng-tè ah, kiû lí àⁿ hī-khang thiaⁿ góa ê kî-tó,

m̄-thang bih--khí-lâi, m̄ thiaⁿ góa ê khún-kiû.

2Kiû lí thiaⁿ góa, ìn góa;

góa chhau-hoân ut-chut, sim put-an,

3lóng sī in-ūi tùi-te̍k háng-hoah, pháiⁿ-lâng ap-chè;

in chiong chōe-kò thia̍p khí-lâi teh góa;

in hoat siū-khì khún-pek góa.

4Góa ê sim kiáu-ká thòng-khó͘;

sí-bông ê kiaⁿ-hiâⁿ lîm-kàu góa.

5Kiaⁿ-hiâⁿ ngia̍uh-ngia̍uh-chhoah pau-ûi góa;

khióng-pò͘ khàm-ba̍t góa.

6Góa kóng, “Góa chin ài chhin-chhiūⁿ hún-chiáu ū si̍t,

thang pe-khì chhē-tio̍h an-hioh ê só͘-chāi.

7Góa beh pe-khì hn̄g-hn̄g,

hioh tī khòng-iá,

8kín kàu pī-lān ê só͘-chāi,

thang thoat-lī kông-hong-pō-ú.”

9Chú ah, kiû lí phah-loān in ê gú-giân, hō͘ in ê ōe hūn-loān;

in-ūi góa khòaⁿ-tio̍h siâⁿ-lāi ū kiông-pō hun-cheng,

10pháiⁿ-lâng mî-ji̍t tī siâⁿ-chhiûⁿ téng kiâⁿ-se̍h,

siâⁿ-lāi chhiong-móa chai-lān siâ-ok.

11Siâⁿ-lāi tò-chhù ū phò-hoāi;

koe-lō͘ ta̍k-ūi ū ap-chè kap kan-chà.

12Bú-jio̍k góa--ê m̄-sī tùi-te̍k,

nā sī, góa mā iáu ōe-tàng iông-jím.

Chū-ko khòaⁿ-khin góa--ê m̄-sī oàn-hūn góa ê lâng,

nā sī, góa mā iáu ōe-tàng siám-khui.

13Bô phah-sǹg sī lí, kap góa kâng sin-hūn ê lâng,

sī góa ê tâng-phōaⁿ, góa ti-kí ê pêng-iú.

14Lán í-chêng siông-siông hō͘-siōng chhin-bi̍t tâm-lūn,

kap chèng-lâng tī Siōng-tè ê tiān chòe-hé kèng-pài.

15Goān sí-bông hut-jiân lîm-kàu in,

hō͘ in oa̍h-oa̍h lo̍h Im-hú;

in-ūi in khiā-khí ê só͘-chāi chhiong-móa siâ-ok.

16Góa leh, góa beh kiû-kiò Siōng-tè;

Siōng Chú ōe kiù góa.

17Ē-hng, chá-khí, tiong-tàu, góa ai-siong thó͘-khùi;

I lóng ōe thiaⁿ góa ê siaⁿ.

18Sui-jiân hoán-tùi góa ê lâng chin chōe,

I ōe kiù-sio̍k góa ê sìⁿ-miā thoat-lī kong-kek góa ê lâng,

hō͘ góa pêng-an tò-tńg--lâi.

19Tùi kó͘-chá éng-oán chûn-chāi ê Siōng-tè ōe thiaⁿ--kìⁿ,

mā ōe kā in pò-èng;

in-ūi in m̄ kái-piàn, bô beh kèng-ùi Siōng-tè.

20In chhun-chhiú kong-kek ka-kī ê tâng-phōaⁿ,

ûi-pōe kap in li̍p ê iok.

21In ê chhùi chhin-chhiūⁿ iû ku̍t-liu-liu;

in ê sim chhàng oàn-hūn;

in ê ōe pí iû khah jiû-nńg,

kî-si̍t sī pu̍ih--chhut-lâi ê to.

22Tio̍h chiong lí ê tàⁿ sià hō͘ Siōng Chú;

I ōe hû-chhî lí, choa̍t-tùi bōe hō͘ gī-lâng sit-pāi.

23Thâi-sí lâng--ê kap kan-chà ê lâng bōe oa̍h kàu tiong-liân;

Siōng-tè ah, lí ōe hō͘ in hām-lo̍h tī sí-bông ê Chhim-khiⁿ.

Nā-sī góa, góa beh óa-khò lí.

Si-phian 55 - 現代台語譯本羅馬字版(TTVR)-闽南语

Learn More About Us