Si-phian 60

Si-phian 60 - 現代台語譯本羅馬字版(TTVR)-闽南语

Tāi-pi̍t kap Bí-soh-put-ta̍t-bí-a, í-ki̍p Só-pa ê A-lân-lâng kau-chiàn ê sî, Iok-ap tò-lâi Iâm ê Soaⁿ-kok, thâi-sí Í-tong-lâng chi̍t-bān nn̄g-chheng. Hit-sî Tāi-pi̍t chòe chit-siú kim-si, hō͘ lâng ha̍k-si̍p; kau hō͘ sèng-ga̍k-tiúⁿ; tiāu, ēng “Kiàn-chèng ê Pek-ha̍p-hoe”.Ūi-tio̍h Sèng-lī Kî-tó

1Siōng-tè ah, lí ū khì-sak goán, phah-chhùi goán;

lí ū tùi goán siū-khì, taⁿ kiû lí koh tńg-lâi goán chia.

2Lí kā tōe iô tín-tāng, hō͘ i li̍h--khui;

kiû lí siu-pó͘ i ê li̍h-hûn, in-ūi tōe iáu-teh tín-tāng.

3Lí ū hō͘ lí ê chú-bîn tú-tio̍h khó͘-lān,

ū hō͘ goán lim hō͘ lâng tian-lâi-tian-khì ê chiú.

4Lí ūi-tio̍h kèng-ùi lí ê lâng ia̍t tōa-kî,

tiàu-chi̍p in, hō͘ in thoat-lī keng-chìⁿ ê kong-kek.

5Kiû lí hôe-èng goán, ēng lí tōa koân-lêng ê chhiú chín-kiù goán,

hō͘ lí só͘ thiàⁿ ê lâng tit-tio̍h kái-kiù.

6Siōng-tè tī I ê sèng-só͘ kóng,

“Góa tōa sèng-lī lah!

Góa beh hun-koah Sī-kiàm, hun-phòe So͘-kat ê soaⁿ-kok.

7 Ki-lia̍t sī góa ê, Má-ná-se mā sio̍k góa;

Í-hoat-liân sī góa ê thâu-khoe;

Iû-tāi sī góa koân-pèng ê koáiⁿ.

8 Mô͘-ap chòe góa ê e̍k-phûn;

góa hiat góa ê ôe tī Í-tong

ǹg Hui-lī-sū hoah sèng-lī ê siaⁿ.”

9Siáⁿ-lâng beh chhōa góa ji̍p-khì kian-kò͘ ê siâⁿ?

Siáⁿ-lâng beh chhōa góa ji̍p-khì Í-tong ê tōe?

10Siōng-tè ah, lí kiám ū khì-sak goán?

Siōng-tè ah, lí kiám bōe koh kap goán ê kun-tūi tàu-tīn chhut-cheng?

11Kiû lí oān-chō͘ goán kong-kek tùi-te̍k,

in-ūi lâng ê pang-chān bōe-khò--tit.

12Khò Siōng-tè goán chiah ōe tek-sèng;

I ōe phah-pāi goán ê tùi-te̍k.

Si-phian 60 - 現代台語譯本羅馬字版(TTVR)-闽南语

Learn More About Us