Ná-hông-su 1

Ná-hông-su 1 - 現代台語譯本羅馬字版(TTVR)-闽南语

1Ē-bīn sī iú-koan Nî-nî-bî ê soan-kò, chiū-sī I-le̍k-ko-su-lâng Ná-hông só͘ khòaⁿ--kìⁿ ê īⁿ-siōng ê kì-lio̍k.

Siōng Chú tùi Nî-nî-bî Hoat Siū-khì

2Siōng Chú sī iau-kiû choan-chêng, koh sī ōe pò-ho̍k ê Siōng-tè;

Siōng Chú ōe pò-ho̍k, ōe hoat tōa siū-khì.

Siōng Chú ōe pò-ho̍k I ê tùi-te̍k,

tùi I ê te̍k-jîn hoat tōa siū-khì.

3Siōng Chú bōe khoài siū-khì, m̄-kú ū tōa khùi-la̍t;

I it-tēng bōe kā ū-chōe--ê phòaⁿ-chòe bô-chōe.

Siōng Chú keng-kè ê lō͘ ōe ká kńg-lê-á-hong, ōe khí kông-hong;

hûn sī I ê kha ká--khí-lâi ê thô͘-hún.

4I chek-pī hái, hái chiū ta--khì,

só͘-ū ê hô lóng bô chúi.

Pa-san kap Ka-bi̍t ê chháu lóng ta--khì,

Lê-pa-lūn ê hoe mā siā--khì.

5Tōa-soaⁿ in-ūi Siōng Chú tín-tāng,

sió-soaⁿ siau-iûⁿ;

tāi-tōe tī I bīn-chêng iô-choah,

sè-kài kap tiàm tī hit tiong-kan--ê phi̍h-phi̍h-chhoah.

6I khí siū-khì, siáⁿ-lâng khiā ōe tiâu?

I hoat sèng-tē, siáⁿ-lâng tng ōe khí?

I ê tōa siū-khì chhin-chhiūⁿ hé phùn-chhut;

chio̍h-pôaⁿ tī I bīn-chêng piak kah chhùi-chhùi-chhùi.

7Siōng Chú chì-siān.

Tī hoān-lān ê ji̍t, I sī pī-lān-só͘;

I chiàu-kò͘ só͘-ū óa-khò I ê lâng.

8M̄-kú I ōe ēng hoàn-lām ê tōa-chúi húi-bia̍t Nî-nî-bî,

kā tùi-te̍k kóaⁿ-ji̍p o͘-àm.

9Lín bô-lūn siat sím-mi̍h kè-bô͘ tí-te̍k Siōng Chú,

I ōe thiat-tóe kā lín châu-bia̍t;

lín bōe-tàng koh-chài pōe-poān.

10Lín chhin-chhiūⁿ lim chiú-chùi ê lâng,

chhin-chhiūⁿ kiat kui-kiû ê chhì-phè,

koh chhin-chhiūⁿ ta--khì ê be̍h-kó ōe hō͘ hé sio-bia̍t.

11 Nî-nî-bî ah, ū chi̍t ê lâng ōe tùi lí hia chhut--lâi,

tô͘-bô͘ siâ-ok, siat-kè kong-kek Siōng Chú.

12Siōng Chú tùi Iû-tāi ê chú-bîn kóng,

“A-su̍t-lâng sui-jiân kiông koh chōe,

mā ōe siū húi-bia̍t siau-sit.

Góa ê chú-bîn ah, góa bat hō͘ lín siū-khó͘,

m̄-kú í-āu bōe koh hō͘ lín siū-khó͘.

13Hiān-chāi góa beh kòng-tn̄g in hō͘ lín ê taⁿ,

chhoah-tn̄g in khún-pa̍k lín ê soh.”

14Siōng Chú tùi Nî-nî-bî soan-kò,

“Lí bô koh ū hō͘-tāi thang iân-sio̍k lí ê miâ.

Góa beh tùi lí ê sîn-biō tû-bia̍t tiau-khek ê ngó͘-siōng,

kap chù-chō ê sîn-siōng;

góa beh kā lí chún-pī hûn-bōng,

in-ūi lí bô koh ū oa̍h--teh ê kè-ta̍t.”

15Khòaⁿ leh, thoân-pò hó siau-sit,

soan-pò͘ hô-pêng ê lâng peh-chiūⁿ soaⁿ-téng, kóng,

“Iû-tāi ah, tio̍h siú choeh-kî, siā lín ê goān;

pháiⁿ-lâng bōe koh chhim-hoān lín,

in ōe thiat-tóe siū húi-bia̍t.”

Ná-hông-su 1 - 現代台語譯本羅馬字版(TTVR)-闽南语

Learn More About Us