Nî-hi-bí-kì 5

Nî-hi-bí-kì 5 - 現代台語譯本羅馬字版(TTVR)-闽南语

Nî-hi-bí Chhú-lí Koaⁿ-tiúⁿ ê Pak-siah

1Jîn-bîn kap in ê bó͘ tōa-siaⁿ bâi-oàn in ê Iû-thài tông-pau.

2Ū lâng kóng, “Goán kap goán ê kiáⁿ cha-bó͘-kiáⁿ chiah chōe lâng, ūi-tio̍h beh seng-oa̍h su-iàu chin chōe niû-si̍t.”

3Ū-ê kóng, “Goán í-keng chiong chhân-hn̂g, phû-tô-hn̂g, chhù-the̍h the̍h-khì tí-ah, chiah ōe-tàng tō͘-oa̍h.”

4Ū-ê kóng, “Goán í-keng ēng chhân-hn̂g kap phû-tô-hn̂g chioh-chîⁿ, kā ông la̍p-sè.

5Goán kap pa̍t-lâng kâng-khoán sī Iû-thài-lâng, goán ê kiáⁿ-jî mā bô khah su in ê kiáⁿ-jî; taⁿ goán ê kiáⁿ-jî tio̍h khì chòe lâng ê lô͘-lē, goán ê cha-bó͘-kiáⁿ ū-ê í-keng khì chòe lô͘-lē, goán mā bōe-tàng chòe sím-mi̍h; in-ūi goán ê chhân-hn̂g kap phû-tô-hn̂g í-keng lóng hō͘ pa̍t-lâng the̍h--khì.”

6Góa thiaⁿ-tio̍h in ê ai-kiò kap oàn-giân, chiū hui-siông siū-khì.

7Góa keng-kè sīn-tiōng khó-lū, chiū chek-pī hiah-ê kùi-cho̍k kap koaⁿ-tiúⁿ, kā in kóng, “Lín ta̍k-ê lâng kèng-jiân kā tông-pau the̍h tāng-lī.”

Tùi án-ni, góa tiàu-chi̍p tāi-hōe lâi chhú-lí in.

8Góa kā in kóng, “Goán í-keng chīn-la̍t chiong bōe hō͘ gōa-pang-lâng ê Iû-thài tông-pau sio̍k-hôe, lín kèng-jiân bōe lín ê hiaⁿ-tī, beh koh hō͘ goán kā in sio̍k--tńg-lâi sī--bô?” In lóng tiām-tiām, bô ōe thang ìn.

9Góa koh kóng, “Lín án-ni chòe m̄-tio̍h; lín chòe tāi-chì eng-kai tio̍h kèng-ùi lán ê Siōng-tè, chiah bián hō͘ lia̍t-kok lán ê tùi-te̍k thí-chhiò.

10Góa kap góa ê ka-sio̍k, í-ki̍p góa ê pō͘-hā, mā ū chiong chîⁿ kap niû-si̍t chioh hō͘ jîn-bîn. Hiān-chāi lán mài koh kā in the̍h lī-sek.

11Kin-á-ji̍t lín tio̍h chiong in tí-ah ê chhân-hn̂g, phû-tô-hn̂g, kaⁿ-ná-hn̂g, chhù-the̍h, í-ki̍p lín tùi in the̍h ê tāng-lī, chiū-sī chîⁿ-gûn, niû-si̍t, chiú, iû, lóng hêng in.”

12Kùi-cho̍k kap koaⁿ-tiúⁿ kóng, “Goán it-tēng hêng in, bô koh tùi in iau-kiû sím-mi̍h, beh chiàu lí ê ōe chòe.”

Góa chiū kiò chè-si lâi, hō͘ kùi-cho̍k kap koaⁿ-tiúⁿ chiù-chōa, it-tēng chiàu só͘ kóng--ê khì chòe.

13Góa chiū tháu-khui io-tòa, iāⁿ-iāⁿ--leh, kóng, “Bô chiàu chiù-chōa khì chòe ê lâng, goān Siōng-tè mā chiong in ê chhù-the̍h kap in lô-lo̍k tit--tio̍h-ê, iāⁿ kah khang-khang-khang.”

Hōe-chiòng lóng ìn kóng, “Amen!” In koh chheng-chàn Siōng Chú. Jîn-bîn chiū lóng chiàu án-ni chòe.

Nî-hi-bí Thiàⁿ-sioh Jîn-bîn

14Góa siū phài chòe Iû-tāi-tōe ê séng-tiúⁿ, tùi A-ta̍t-sih-se ông jī-cha̍p nî kàu saⁿ-cha̍p-jī nî, kiōng cha̍p-jī nî kú, góa kap góa ê ka-sio̍k lóng bô chia̍h séng-tiúⁿ èng-tit ê niû-si̍t.

15Góa í-chêng hiah-ê séng-tiúⁿ hō͘ jîn-bîn ê hū-tam chin tāng; in tùi jîn-bîn iau-kiû ngó͘-kok kap chiú, í-ki̍p sì-pah gō͘-cha̍p-la̍k kong-khek ê gûn-á; sīm-chì in ê po̍k-jîn mā ap-chè jîn-bîn. M̄-kú góa bô án-ni chòe, in-ūi góa kèng-ùi Siōng-tè.

16Góa choan-sim chòe tiông-kiàn siâⁿ-chhiûⁿ ê kang-thêng, bô bóe chhân-hn̂g; góa só͘-ū ê pō͘-hā mā lóng chham-ka tiông-kiàn ê kang-chok.

17Tû-liáu hiah-ê tùi sì-ûi kok-ka lâi góa chia ê lâng í-gōa, ū Iû-thài-lâng í-ki̍p koaⁿ-tiúⁿ chi̍t-pah gō͘-cha̍p lâng kap góa chòe-hé chia̍h.

18Múi chi̍t ji̍t, góa tio̍h chún-pī chi̍t chiah gû-káng, la̍k chiah pûi ê iûⁿ; koh chún-pī chin chōe chiah koe; cha̍p ji̍t chi̍t piàn, chún-pī ta̍k-khoán ê chiú. Sui-jiân án-ni, góa mā bô niá séng-tiúⁿ èng-tit ê niû-si̍t, in-ūi jîn-bîn ê hū-tam chin tāng.

19Góa ê Siōng-tè ah, kiû lí ōe-kì-tit góa ūi-tio̍h jîn-bîn só͘ chòe it-chhè ê sū, sù-hok góa.

Nî-hi-bí-kì 5 - 現代台語譯本羅馬字版(TTVR)-闽南语

Learn More About Us