Thoân-tō-su 2

Thoân-tō-su 2 - 現代台語譯本羅馬字版(TTVR)-闽南语

1Góa tùi ka-kī kóng: Lâi, lâi tui-kiû hióng-lo̍k, khòaⁿ ū sím-mi̍h hó-chhù. Kiat-kó, che mā-sī khang-hu.

2Góa kóng: Sńg-chhiò sī tian-kông; hióng-lo̍k mā-sī khang-khang.

3Góa siūⁿ-beh ēng chiú hō͘ seng-khu sóng-khoài, kè gû-gōng ê seng-oa̍h. M̄-kú, góa ê sim iáu-kú ài hō͘ tì-hūi ín-chhōa, thang chai lâng té-té ê it-seng sím-mi̍h sī siōng-hó ê seng-oa̍h.

4Góa ūi-tio̍h ka-kī heng-khí tōa kang-thêng: Khí chin chōe chhù, chai-chèng phû-tô,

5siu-chō hoe-hn̂g kap ké-chí-hn̂g, tī hit lāi-bīn chai-chèng ta̍k-chióng ké-chí-chhiū;

6koh khui chúi-tî koàn-ak chhiū-nâ lāi ê chhiū-á-chai.

7Góa ū bóe lâm-lú lô͘-lē, mā ū chhut-sì tī góa ke-lāi--ê; koh ū chin chōe gû-kûn, iûⁿ-kûn, pí góa í-chêng tī Iâ-lō͘-sat-léng hiah-ê lâng só͘-ū--ê khah chōe.

8Góa mā ūi ka-kī chek-chū kim gûn, siu-chi̍p lia̍t-ông kap ta̍k-séng ê châi-pó; koh tit-tio̍h chhiùⁿ-koa ê lâm-lú, chin chōe kiong-hui, í-ki̍p sè-kan-lâng só͘ ì-ài ê hióng-siū.

9Án-ni góa chiū pí í-chêng só͘-ū tī Iâ-lō͘-sat-léng ê lâng koh-khah heng-ōng; koh tì-hūi mā bô lī-khui góa.

10Góa ê ba̍k-chiu só͘ ài--ê, góa bô kā i chó͘-tòng; góa ê sim só͘ hoaⁿ-hí--ê, góa bô kā i kìm-chí; in-ūi góa ê sim tùi góa só͘ phah-piàⁿ--ê kám-kak boán-chiok; che sī góa phah-piàⁿ tit--tio̍h ê pò-siúⁿ.

11M̄-kú góa khòaⁿ góa ê chhiú só͘ chòe ê it-chhè, í-ki̍p góa lô-lo̍k só͘ ta̍t-sêng--ê, lóng sī khang-hu, lóng sī lia̍h-hong; ji̍t-kng ê ē-bīn lóng bô lī-ek.

12Góa oa̍t-tńg lâi koan-chhat tì-hūi, tian-kông, kap gû-gōng. Ông ê kè-sêng-jîn kiám ōe-tàng koh chòe sím-mi̍h? Put-kò chòe í-chêng ê ông só͘ chòe--ê nā-tiāⁿ.

13Góa khòaⁿ-chhut tì-hūi pí gû-gōng khah hó, chhin-chhiūⁿ kng-bêng pí o͘-àm khah hó.

14Tì-hūi ê lâng khòaⁿ chheng-chhó thâu-chêng ê lō͘, gû-gōng ê lâng tī o͘-àm tiong bong bô lō͘. M̄-kú góa mā chai in ê kiat-kio̍k lóng siâng-khoán.

15Góa sim-lāi siūⁿ, gōng-lâng tú--tio̍h-ê, góa mā ōe tú--tio̍h; án-ni góa ū tì-hūi ū sím-mi̍h lī-ek? Góa sim-lāi kóng: Che mā-sī khang-hu.

16Tì-hūi ê lâng kap gû-gōng ê lâng pîⁿ-pîⁿ lóng bōe éng-oán hō͘ lâng kì-liām, in-ūi kàu-bé lóng ōe hō͘ lâng bōe-kì--tit. Hài! Gû-gōng ê lâng sí, tì-hūi ê lâng mā tio̍h sí.

17Só͘-í góa oàn-chhoeh sìⁿ-miā, in-ūi ji̍t-kng ê ē-bīn só͘ hoat-seng ê tāi-chì lóng hō͘ góa iu-khó͘. Che lóng sī khang-hu, lóng sī lia̍h-hong.

18Góa iàm-ò͘ⁿ it-chhè ê lô-lo̍k, in-ūi góa tī ji̍t-kng ê ē-bīn lô-lo̍k só͘ ta̍t-sêng--ê, lóng tio̍h lâu hō͘ góa ê kè-sêng-jîn.

19Hit-ê lâng sī tì-hūi á-sī gû-gōng siáⁿ-lâng chai; góa tī ji̍t-kng ê ē-bīn, ēng tì-hūi phah-piàⁿ só͘ chòe--ê, lóng ōe hō͘ i chiáng-koán. Che mā-sī khang-hu.

20Án-ni, tùi chêng-kàu-taⁿ tī ji̍t-kng ē-bīn ê lô-khó͘ phah-piàⁿ, góa kám-kak chin sit-bāng.

21Ū lâng ēng tì-hūi, ēng tì-sek, ēng pún-sū phah-piàⁿ tit--tio̍h-ê, soah tio̍h lâu hō͘ m̄-bat ūi-tio̍h hiah-ê châi-sán phah-piàⁿ ê lâng chòe sán-gia̍p. Che mā-sī khang-hu, sī tōa put-hēng.

22Lâng tī ji̍t-kng ê ē-bīn phah-piàⁿ chhau-hoân, ū tit-tio̍h sím-mi̍h?

23I it-seng ê nî-ji̍t chhau-hoân, lô-lo̍k kang-chok, liân mî--sî sim to bô an-lêng. Che mā-sī khang-hu.

24Lâng siōng-hó sī lâi chia̍h lâi lim, hióng-siū in phah-piàⁿ tit--tio̍h ê sêng-kó. Góa khòaⁿ che mā-sī Siōng-tè ê an-pâi.

25Nā m̄-sī tùi Siōng-tè, siáⁿ-lâng ōe-tàng lim-chia̍h, hióng-lo̍k?

26Siōng-tè chiong tì-hūi, tì-sek, khoài-lo̍k sù hō͘ I só͘ hoaⁿ-hí ê lâng; m̄-kú ū-chōe ê lâng Siōng-tè hō͘ in lô-khó͘, chiong in siu-khioh chek-chū--ê, kui hō͘ I só͘ hoaⁿ-hí ê lâng. Che mā-sī khang-hu, mā-sī lia̍h-hong.

Thoân-tō-su 2 - 現代台語譯本羅馬字版(TTVR)-闽南语

Learn More About Us