Iâ-lī-bí-su 33

Iâ-lī-bí-su 33 - 現代台語譯本羅馬字版(TTVR)-闽南语

Koh-chài Èng-ún Ho̍k-kok

1 Iâ-lī-bí iáu hō͘ lâng koaiⁿ tī kaⁿ-ga̍k ê sî, Siōng Chú tē-jī piàn tùi i kóng-ōe,

2“Hit-ūi chhòng-chō tāi-tōe, hō͘ i chiâⁿ-hêng, hō͘ i kian-kò͘ ê Siōng Chú án-ni kóng,

3‘Lí kiû góa, góa chiū ìn lí, beh chiong lí m̄-chai, úi-tāi ò-pì ê sū chí-sī lí.

4Chiam-tùi siâⁿ-lāi hiah-ê ūi-tio̍h beh chó͘-tòng tùi-te̍k chō thô͘-tui, ēng to-kiàm kong-siâⁿ só͘ thiah-húi ê chhù kap Iû-tāi kun-ông ê kiong-tiān, góa Siōng Chú — Í-sek-lia̍t ê Siōng-tè án-ni kóng:

5Lín kap Pa-pí-lûn-lâng kau-chiàn ê sî, in beh chiong góa tī hùn-lō͘ kap tōa siū-khì tiong thâi-sí ê lâng ê sin-si, tóe-móa chiah-ê chhù; in-ūi lín chōe-ok koàn-boán, góa í-keng pàng-sak chit-ê siâⁿ.

6M̄-kú, góa beh hō͘ chit-ê siâⁿ ho̍k-goân, beh i-tī siâⁿ-lāi ê lâng, hō͘ in ê khang-chhùi siⁿ-bah kè-phê, hō͘ in chhiong-hun hióng-siū hô-pêng an-choân.

7Góa beh kā siū-lia̍h ê Iû-tāi-lâng kap Í-sek-lia̍t-lâng chhōa--tò-lâi, tiông-kiàn in ê ka-hn̂g.

8Góa beh kā in tek-chōe góa ê chōe sóe chheng-khì, koh sià-bián in só͘-ū pōe-poān góa ê chōe.

9In-ūi góa ê iân-kò͘, chit-ê siâⁿ tī tōe-chiūⁿ bān-kok tiong ōe tit-tio̍h hoaⁿ-hí, siōng-chàn, kap chun-êng, ūi-tio̍h án-ni lâi chhut-miâ. Lia̍t-kok beh in-ūi thiaⁿ-tio̍h góa sù hō͘ chit-ê siâⁿ ê lâng hoân-êng kap hok-khì lóng kiaⁿ-ùi góa.’”

10Siōng Chú án-ni kóng, “Lín lóng kóng ‘Chit-tè thó͘-tōe sī hong-po͘, bô lâng tòa, bô cheng-siⁿ ê tōe’; m̄-kú, pha-hng, bô lâng tòa, bô lâng-iáⁿ, bô cheng-siⁿ ê Iû-tāi siâⁿ-tìn kap Iâ-lō͘-sat-léng ê koe-lō͘, ōe koh thiaⁿ-tio̍h

11hoaⁿ-hí khoài-lo̍k ê siaⁿ, hun-iàn hí-khèng ê siaⁿ, koh thiaⁿ-tio̍h lâng tòa chè-mi̍h lâi kàu Siōng Chú ê sèng-tiān kám-siā ê siaⁿ, kóng:

Tio̍h kám-siā Siōng Chú — Bān-kun ê Thóng-sòe, in-ūi Siōng Chú chì-siān,

I ê chû-ài éng-oán chûn-sio̍k!

Góa beh chhōa in tùi siū-lia̍h ê tōe tò--lâi, hō͘ in hôe-ho̍k chá-chêng ê sēng-hóng.” Siōng Chú án-ni soan-pò͘.

12Siōng Chú — Bān-kun ê Thóng-sòe án-ni kóng, “Chit-ê pha-hng, bô lâng-iáⁿ, bô cheng-siⁿ ê só͘-chāi, hia só͘-ū ê siâⁿ-tìn ōe koh ū bo̍k-chiá ê chháu-tiûⁿ, hō͘ iûⁿ tó tī hia hioh-khùn.

13Soaⁿ-tōe, soaⁿ-po͘, Nî-kek-hu, Piān-ngá-bín tōe-khu, Iâ-lō͘-sat-léng chiu-ûi, í-ki̍p Iû-tāi ê siâⁿ-tìn, ōe koh ū lâng tiám-sǹg tùi in chhiú-ē keng-kè ê iûⁿ-kûn.” Siōng Chú án-ni soan-pò͘.

14Siōng Chú kóng, “Sî-ji̍t teh-beh kàu, góa tùi Í-sek-lia̍t-lâng kap Iû-tāi-lâng èng-ún ê chiok-hok lóng beh si̍t-hiān.

15Tī hiah-ê sî-ji̍t, góa beh hō͘ Tāi-pi̍t ê sè-hē hoat chi̍t ki kong-gī ê Ki; i beh tī chit-ê thó͘-tōe si-hêng kong-pêng kap chèng-gī.

16In-ūi i ê chip-chèng, Iû-tāi beh tit-tio̍h kái-kiù, Iâ-lō͘-sat-léng ōe-tàng an-ku-lo̍k-gia̍p. Lâng ōe kā i kiò-chòe ‘Siōng Chú sī goán ê kong-gī’.

17In-ūi Siōng Chú án-ni kóng: Tāi-pi̍t ê hō͘-tāi kè-sio̍k ōe ū lâng thóng-tī Í-sek-lia̍t;

18Lī-bī chi-cho̍k it-tēng ōe ū chè-si kè-sio̍k hiàn sio-hòa-chè kap sò͘-chè, sio chè-mi̍h ho̍k-sāi góa, pān-lí hiàn-chè ê sū.”

19Siōng Chú tùi Iâ-lī-bí kóng,

20“Góa Siōng Chú án-ni kóng: Lín nā ōe-tàng hòe-tû góa kap ji̍t--sî, mî--sî tēng ê iok, hō͘ in bô chiàu só͘ tēng ê sî-kan ūn-choán,

21chiah ōe-tàng kā góa kap góa ê po̍k-jîn Tāi-pi̍t li̍p ê iok soan-kò bô-hāu, hō͘ i bô hō͘-tāi chē ông-ūi, mā chiah ōe-tàng kā góa kap ho̍k-sāi góa ê Lī-bī-lâng chè-si só͘ li̍p ê iok soan-kò bô-hāu.

22Góa beh hō͘ góa ê po̍k-jîn Tāi-pi̍t ê hō͘-tāi kap ho̍k-sāi góa ê Lī-bī-lâng ke-thiⁿ, chhin-chhiūⁿ thiⁿ-téng ê chhiⁿ bōe-sǹg--tit, chhin-chhiūⁿ hái-piⁿ ê soa bōe-niû--tit.”

23Siōng Chú koh kā Iâ-lī-bí kóng,

24“Chiah-ê jîn-bîn kóng ‘Siōng Chú só͘ kéng-soán nn̄g ê cho̍k, I lóng kā in pàng-sak lah’, lí ū thiaⁿ--tio̍h bô? In án-ni kóng sī khòaⁿ-khin góa ê chú-bîn, bô koh kā in khòaⁿ-chòe chi̍t ê kok-ka.

25Góa Siōng Chú án-ni soan-pò͘: Góa nā bô kap ji̍t--sî, mî--sî tēng-iok, bô kā thiⁿ-tōe tēng tēng-lu̍t,

26góa chiah ōe kā Ngá-kok kap góa ê po̍k-jîn Tāi-pi̍t ê kiáⁿ-sun khì-sak, bô beh tùi Tāi-pi̍t ê kiáⁿ-sun soán-li̍p lâng thóng-tī A-pek-la-hán, Í-sat, Ngá-kok ê hō͘-tāi. Góa beh lîn-bín in, hō͘ hiah-ê liû-hòng ê lâng tò-tńg--lâi.”

Iâ-lī-bí-su 33 - 現代台語譯本羅馬字版(TTVR)-闽南语

Learn More About Us